ಪ್ರಕರಣ ದಾಖಲಿಸಿದ ಎಸ್‌ಐಗೆ ಕಪಾಳಮೋಕ್ಷ

ಬೆಂಗಳೂರು: ಪಾನಮತ್ತ ಚಾಲನೆ ವಿರುದ್ಧ ಪ್ರಕರಣ ದಾಖಲಿಸಿದ್ದಕ್ಕೆ ಕಾಮಾಕ್ಷಿಪಾಳ್ಯ ಸಂಚಾರ ಠಾಣೆಯ ಎಸ್‌ಐ ಶಿವಾನಂದ ಬೇವೂರ್ ಅವರಿಗೆ ಕಪಾಳಮೋಕ್ಷ ಮಾಡಿದ  ಪ್ರಾದೇಶಿಕ ಸಾರಿಗೆ ಕಚೇರಿಯ (ಆರ್‌ಟಿಒ) ಪ್ರಥಮ ದರ್ಜೆ ಸಹಾಯಕ ವೆಂಕಟಾಚಲ ಹಾಗೂ ಅವರ ಅಳಿಯ ಗಿರೀಶ್ ಎಂಬುವರನ್ನು ಪೊಲೀಸರು ಬಂಧಿಸಿದ್ದಾರೆ.

‘ವಾರಾಂತ್ಯದ ಕಾರಣದಿಂದ ಪಾನಮತ್ತ ಚಾಲಕರ ವಿರುದ್ಧ ಕ್ರಮ ಕೈಗೊಳ್ಳಲು ನಗರದಲ್ಲೆಡೆ ಶನಿವಾರ ರಾತ್ರಿ 9 ಗಂಟೆಯಿಂದ 12 ಗಂಟೆವರೆಗೆ ವಿಶೇಷ ಕಾರ್ಯಾಚರಣೆ ಹಮ್ಮಿಕೊಳ್ಳಲಾಗಿತ್ತು. ಅದರಂತೆ ಕಾಮಾಕ್ಷಿಪಾಳ್ಯ ಸಂಚಾರ ಠಾಣೆಯ ಎಸ್‌ಐಗಳಾದ ಶಿವಾನಂದ್, ಪುಟ್ಟರಾಜು ಹಾಗೂ ಮಂಜುನಾಥ್ ಅವರು ತಮ್ಮ ವ್ಯಾಪ್ತಿಯ ಮಾಳಗಾಳ ಸೇತುವೆ ಬಳಿ ಚಾಲಕರನ್ನು ತಪಾಸಣೆ ಮಾಡುತ್ತಿದ್ದರು’ ಎಂದು ಹಿರಿಯ ಅಧಿಕಾರಿಗಳು ಹೇಳಿದರು.

‘ರಾತ್ರಿ 10ರ ಸುಮನಹಳ್ಳಿ ಕಡೆಯಿಂದ ಬಂದ ಗಿರೀಶ್ ಕಾರನ್ನು ತಡೆದ ಸಿಬ್ಬಂದಿ, ಆಲ್ಕೋಮೀಟರ್‌ ಮೂಲಕ ತಪಾಸಣೆ ನಡೆಸಿದಾಗ ಅವರು ಪಾನ­ಮತ್ತರಾಗಿರುವುದು ಗೊತ್ತಾಯಿತು. ಹೀಗಾಗಿ  ಪುಟ್ಟ­ರಾಜು ಪ್ರಕರಣ ದಾಖ­ಲಿ­ಸಿದರು. ಇದರಿಂದ ಕೋಪಗೊಂಡ ಗಿರೀಶ್, ‘ನಾನು ಆರ್‌ಟಿಒ ಅಧಿ­ಕಾರಿ­ಯೊಬ್ಬರ ಅಳಿಯ. ಕಾರನ್ನು ಬಿಟ್ಟು ಕಳುಹಿಸದಿದ್ದರೆ  ಪರಿಣಾಮ ನೆಟ್ಟ­ಗಿರುವುದಿಲ್ಲ’ ಎಂದು ಧಮಕಿ ಹಾಕಿದರು. ವಾಹನ ಬಿಡಲು ಒಪ್ಪದಿದ್ದಾಗ ಮಾವ ವೆಂಕಟಾಚಲ ಅವರಿಗೆ ಕರೆ ಮಾಡಿದರು’ ಎಂದರು.

‘ವಿಷಯ ತಿಳಿದ 15 ನಿಮಿಷಗಳಲ್ಲೇ ಸ್ಥಳಕ್ಕೆ ಬಂದ ವೆಂಕಟಾಚಲ, ತಮ್ಮನ್ನು ಆರ್‌ಟಿಒ ಅಧಿಕಾರಿ ಎಂದು ಪರಿಚಯಿಸಿಕೊಂಡರು. ಹೀಗಾಗಿ ತಮ್ಮ ಗುರುತಿನ ಚೀಟಿ, ವಾಹನದ ಅಸಲಿ ದಾಖಲೆಗಳನ್ನು ತೋರಿಸಿ, ಕಾರನ್ನು ತೆಗೆದುಕೊಂಡು ಹೋಗುವಂತೆ ಸೂಚಿಸಿದೆವು. ದಾಖ­ಲೆ­ಗಳನ್ನು ತರುವುದಾಗಿ ಹೋದ ವೆಂಕಟಾಚಲ, ಸ್ವಲ್ಪ ಸಮಯದಲ್ಲೇ ಪಾನಮತ್ತ­ರಾಗಿ ಮತ್ತೆ ಸ್ಥಳಕ್ಕೆ ಬಂದರು’ ಎಂದು ಸ್ಥಳದಲ್ಲಿದ್ದ ಎಸ್‌ಐ ಮಂಜುನಾಥ್ ಘಟನೆಯನ್ನು ವಿವರಿಸಿದರು.

‘ಕುಡಿದ ಮತ್ತಿನಲ್ಲಿ ಅವರು ಅವಾಚ್ಯ ಶಬ್ದಗಳಿಂದ ನಿಂದಿಸಲು ಆರಂಭಿಸಿದರು. ಇದರಿಂದಾಗಿ ಸಿಬ್ಬಂದಿ ಸಹ ಅವರ ಜತೆ ವಾಗ್ವಾದಕ್ಕೆ ಇಳಿ­ದರು. ಈ ಹಂತದಲ್ಲಿ ಶಿವಾನಂದ್ ಅವರ ಕೆನ್ನೆಗೆ ಹೊಡೆದ ವೆಂಕಟಾಚಲ, ಬ್ಲಾಕ್‌ ಬೆರಿ ಉಪಕರಣವನ್ನು ಕಿತ್ತೆಸೆದರು’ ಎಂದು ಹೇಳಿದರು.

‘ಹಲ್ಲೆಯಿಂದ ಶಿವಾನಂದ ಕೆಳಗೆ ಬಿದ್ದಾಗ ಕನ್ನಡಕ ಚೂರಾಯಿತು.  ಅವರ ಈ ವರ್ತನೆಯನ್ನು ಪ್ರಶ್ನಿಸಲು ಮುಂದಾದ ಪುಟ್ಟರಾಜು ಮೇಲೂ ಹಲ್ಲೆಗೆ ಯತ್ನಿಸಿದ ವೆಂಕಟಾಚಲ, ವಾಕಿ–ಟಾಕಿ ಕಸಿದುಕೊಂಡು ನೆಲಕ್ಕೆ ಎಸೆದರು’ ಎಂದರು.