ಬೆಂಗಳೂರು: ಖೋಟಾನೋಟು ಚಲಾವಣೆ ಮಾಡುತ್ತಿದ್ದ ಆರೋಪಿಗಳನ್ನು ಬಂಧಿಸಿರುವ ನಗರದ ಕೇಂದ್ರ ಅಪರಾಧ ವಿಭಾಗದ (ಸಿಸಿಬಿ) ಪೊಲೀಸರು ರೂ 9.13 ಲಕ್ಷ ಖೋಟಾನೋಟು ಹಾಗೂ ರೂ 1.72 ಲಕ್ಷ ಮೌಲ್ಯದ ಅಸಲಿ ನೋಟುಗಳನ್ನು ವಶಪಡಿಸಿಕೊಂಡಿದ್ದಾರೆ.
ಕಾಡುಗೊಂಡನಹಳ್ಳಿಯ ಸೈಯದ್ ಆಸೀಫ್ (21), ಚಿಕ್ಕಬಳ್ಳಾಪುರ ಜಿಲ್ಲೆಯ ಅಫ್ರೋಜ್ (41), ಮೈಸೂರಿನ ಆಸೀಫ್ ಉಲ್ಲಾಖಾನ್ (21) ಮತ್ತು ಮಹೀಬ್ ಉಲ್ಲಾಖಾನ್ (31), ಪಶ್ಚಿಮಬಂಗಾಳ ಮೂಲದ ಸಾಬೀರ್ ಅಲಿಬಾಬು (23) ಹಾಗೂ ಮಸೂದ್ (19) ಬಂಧಿತರು.
‘ಆರೋಪಿಗಳು ಖೋಟಾನೋಟು ಚಲಾವಣೆ ಪ್ರಕರಣದಲ್ಲಿ ಬಂಧಿತರಾಗಿ ಕೋಲ್ಕತ್ತ ಜೈಲಿನಲ್ಲಿರುವ ಇಷಾಕ್ ಮತ್ತು ಶಾನ್ನವಾಜ್ ಎಂಬುವರ ಜತೆ ನಂಟು ಇಟ್ಟುಕೊಂಡಿದ್ದರು. ಇಷಾಕ್್ ಮತ್ತು ಶಾನ್ನವಾಜ್ ಸೂಚನೆಯಂತೆ ಆರೋಪಿಗಳು ಖೋಟಾನೋಟು ದಂಧೆ ನಡೆಸುತ್ತಿದ್ದರು’ ಎಂದು ನಗರ ಪೊಲೀಸ್ ಕಮಿಷನರ್ ಎಂ.ಎನ್.ರೆಡ್ಡಿ ಮಂಗಳವಾರ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.
ಆರೋಪಿಗಳು ಪಾಕಿಸ್ತಾನದಲ್ಲಿ ಮುದ್ರಿತವಾದ ಖೋಟಾನೋಟುಗಳನ್ನು ಬಾಂಗ್ಲಾದೇಶದ ಮೂಲಕ ಪಶ್ಚಿಮ ಬಂಗಾಳ ಮಾರ್ಗವಾಗಿ ದೇಶಕ್ಕೆ ತಂದು ಬೆಂಗಳೂರು ಮತ್ತು ಮೈಸೂರಿನಲ್ಲಿ ಚಲಾವಣೆ ಮಾಡುತ್ತಿದ್ದರು. ಆರೋಪಿಗಳಾದ ಅಜು, ಅಫುಲ್, ಮುನೀರ್ ತಲೆಮರೆಸಿಕೊಂಡಿದ್ದಾರೆ ಎಂದು ಹೇಳಿದರು.