ಬೆಂಗಳೂರು: ಅರಮನೆ ಮೈದಾನದ ಜಯಮಹಲ್ ಪ್ಯಾಲೇಸ್ ಹೋಟೆಲ್ನಲ್ಲಿ ಆಯೋಜನೆಯಾಗಿದ್ದ ಅಂತರರಾಷ್ಟ್ರೀಯ ವೈನ್ ಉತ್ಸವದಲ್ಲಿ ಮಳಿಗೆಯೊಂದರ ಮಾರಾಟ ಸಹಾಯಕಿ (ಸೇಲ್ಸ್ ಗರ್ಲ್) ಜತೆ ಅನುಚಿತವಾಗಿ ವರ್ತಿಸಿದ ಪಾನಮತ್ತ ಯುವಕರನ್ನು ಸಾರ್ವಜನಿಕರೇ ಹಿಡಿದು ಹಿಗ್ಗಾಮುಗ್ಗಾ ಥಳಿಸಿರುವ ಘಟನೆ ಭಾನುವಾರ ನಡೆದಿದೆ.
ಘಟನೆ ಸಂಬಂಧ ದೇವನಹಳ್ಳಿಯ ಕಿರಣ್ (28) ಮತ್ತು ಸುರೇಂದ್ರ (28) ಎಂಬುವರನ್ನು ಬಂಧಿಸಲಾಗಿದೆ. ಮತ್ತೊಬ್ಬ ಆರೋಪಿ ರವಿ ಪರಾರಿಯಾಗಿದ್ದಾನೆ ಎಂದು ಜೆ.ಸಿ.ನಗರ ಪೊಲೀಸರು ತಿಳಿಸಿದ್ದಾರೆ.
ಸ್ನೇಹಿತರಾದ ಆ ಮೂವರು ಸಂಜೆ ವೈನ್ ಉತ್ಸವಕ್ಕೆ ಬಂದಿದ್ದರು. ಉತ್ಸವದಲ್ಲಿ ಮದ್ಯಪಾನ ಮಾಡಿದ್ದ ಅವರು, ಹೋಟೆಲ್ನ ಶೌಚಾಲಯದಿಂದ ಮಳಿಗೆಗೆ ಹಿಂದಿರುಗುತ್ತಿದ್ದ ಮಾರಾಟ ಸಹಾಯಕಿಯನ್ನು ಅಡ್ಡಗಟ್ಟಿ ಚುಂಬಿಸಲು ಯತ್ನಿಸಿದ್ದಾರೆ.
ಆಗ ಮಾರಾಟ ಸಹಾಯಕಿ ಪ್ರತಿರೋಧ ತೋರಿದ್ದರಿಂದ ಆರೋಪಿಗಳು, ಅವರನ್ನು ಎಳೆದಾಡಿ ಅನುಚಿತವಾಗಿ ವರ್ತಿಸಿದ್ದಾರೆ. ಈ ವೇಳೆ ಮಾರಾಟ ಪ್ರತಿನಿಧಿ ಸಹಾಯಕ್ಕಾಗಿ ಕೂಗಿಕೊಂಡಿದ್ದಾರೆ. ಅವರ ಚೀರಾಟ ಕೇಳಿದ ಸಾರ್ವಜನಿಕರು ಕಿರಣ್ ಮತ್ತು ಸುರೇಂದ್ರನನ್ನು ಹಿಡಿದು ಹಿಗ್ಗಾಮುಗ್ಗಾ ಥಳಿಸಿದ್ದಾರೆ ಎಂದು ಪೊಲೀಸರು ಹೇಳಿದ್ದಾರೆ. ಕಾರು ಚಾಲಕನಾದ ರವಿ ತಪ್ಪಿಸಿಕೊಂಡು ಪರಾರಿಯಾಗಿದ್ದು, ಆತನ ಪತ್ತೆ ಕಾರ್ಯ ಮುಂದುವರಿದಿದೆ.