ನ್ಯೂಯಾರ್ಕ್‌ (ಪಿಟಿಐ): ‘ಟೈಮ್‌’ ನಿಯತಕಾಲಿಕ ನಡೆಸಿದ ಓದುಗರ ಆನ್‌ಲೈನ್‌ ಮತಗಣನೆಯಲ್ಲಿ ಜಗತ್ತಿನ 100 ಅತ್ಯಂತ ಪ್ರಭಾವಿಗಳ ಪಟ್ಟಿಯಲ್ಲಿ ಆಮ್‌ ಆದ್ಮಿ ಪಕ್ಷದ ಸಂಸ್ಥಾಪಕ ಅರವಿಂದ ಕೇಜ್ರಿವಾಲ್‌ ಅವರು ಬಿಜೆಪಿ ಪ್ರಧಾನಿ ಅಭ್ಯರ್ಥಿ ನರೇಂದ್ರ ಮೋದಿ ಮತ್ತು ಅಮೆರಿಕದ ಗಾಯಕಿ ಕ್ಯಾಟಿ ಪೆರಿ ಅವರನ್ನು ಹಿಂದಿಕ್ಕಿದ್ದಾರೆ.
ಭಾರತದ ದೀರ್ಘಾವಧಿಯ ಸಾರ್ವತ್ರಿಕ ಚುನಾವಣೆ ಪೂರ್ಣಗೊಳ್ಳಲು ಇನ್ನೂ ಮೂರು ವಾರ ಬಾಕಿ ಇರುವಾಗ ಭಾರತದ ರಾಜಕಾರಣಿಗಳು ಪ್ರಭಾವಿಗಳ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ. ಅತಿ ಹೆಚ್ಚು ಶೇಕಡಾವಾರು ಜನರು ಕೇಜ್ರಿವಾಲ್‌ ಪರವಾಗಿ ‘ಹೌದು’ ಮತಗಳನ್ನು ಚಲಾಯಿಸಿದ್ದಾರೆ.
ಮಂಗಳವಾರ ಬೆಳಿಗ್ಗೆವರೆಗೆ ಸುಮಾರು 31.68 ಲಕ್ಷ ಜನರು ಕೇಜ್ರಿವಾಲ್‌ (45) ಅವರಿಗೆ ಮತ ನೀಡಿದ್ದಾರೆ. ಆದರೆ ಮೋದಿ (63) ಅವರಿಗೆ 50.75 ಲಕ್ಷಕ್ಕೂ ಅಧಿಕ ಜನ ಮತ ಹಾಕಿದ್ದಾರೆ. ಈವರೆಗೆ ಕೇಜ್ರಿವಾಲ್‌ ಶೇ 71.5 ‘ಹೌದು’ ಮತ ಮತ್ತು ಶೇ 28.5 ‘ಇಲ್ಲ’ ಮತಗಳನ್ನು ಪಡೆದಿದ್ದಾರೆ. ಮೋದಿ ಶೇ 49.7 ‘ಹೌದು’ ಮತ್ತು ಶೇ 50.3 ‘ಇಲ್ಲ’ ಮತ ಗಳಿಸಿದ್ದಾರೆ.
ಇತರ ಎಲ್ಲ ಪ್ರಭಾವಿಗಳಿಗಿಂತಲೂ ಅತಿ ಹೆಚ್ಚಿನ ‘ಇಲ್ಲ’ ಮತಗಳನ್ನು ಗಳಿಸಿರುವ ಮೋದಿ, ಪ್ರಸಿದ್ಧ ಗಾಯಕರಾದ ಕ್ಯಾಟಿ ಪೆರಿ ಮತ್ತು ಜಸ್ಟಿನ್‌ ಬೀಬರ್‌ ಅವರನ್ನು ಮೀರಿಸಿದ್ದಾರೆ. ಕೇಜ್ರಿವಾಲ್‌ ಮತ್ತು ಮೋದಿ ಅವರ ನಂತರದ ಸ್ಥಾನವನ್ನು ಈಜಿಪ್ಟ್ ಸೇನಾ ಕಮಾಂಡರ್‌ ಅಬ್ದುಲ್‌ ಫತಾಹ್‌ ಅಲ್‌ ಸೈಸಿ ಪಡೆದಿದ್ದಾರೆ. ಕಾಂಗ್ರೆಸ್‌ ಉಪಾಧ್ಯಕ್ಷ ರಾಹುಲ್‌ ಗಾಂಧಿ (43) ಅವರು 96,070 ಮತಗಳೊಂದಿಗೆ ಪಟ್ಟಿಯಲ್ಲಿ 40ನೇ ಸ್ಥಾನ ಗಳಿಸಿದ್ದಾರೆ.
