‘ಹೊಸ ಆಶಾಕಿರಣ, ಜವಾಬ್ದಾರಿಯ ಯುಗ’

ನವದೆಹಲಿ (ಪಿಟಿಐ/ಐಎಎನ್‌ಎಸ್‌): ಬಡವರ, ಶೋಷಿತರ ಹಾಗೂ ಸೌಲಭ್ಯ ವಂಚಿತರನ್ನು ಮೇಲೆತ್ತುವುದಕ್ಕೆ ತಮ್ಮ ಸರ್ಕಾರ ಬದ್ಧ ಎಂದು ನಿಯೋಜಿತ ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ.

ಸಂಸತ್ತಿನ ಸೆಂಟ್ರಲ್‌ ಹಾಲ್‌ನಲ್ಲಿ ಮಂಗಳ­ವಾರ ನಡೆದ ಬಿಜೆಪಿ  ಸಂಸದರ ಸಭೆಯಲ್ಲಿ ಸಂಸದೀಯ ಪಕ್ಷದ ನಾಯಕನಾಗಿ  ಆಯ್ಕೆ­ಯಾದ ಬಳಿಕ ಮೋದಿ ಭಾವುಕರಾಗಿ ಸುಮಾರು 30 ನಿಮಿಷಗಳ ಕಾಲ ಭಾಷಣ ಮಾಡಿದರು.

ಮೋದಿ ಭಾಷಣದ ಪೂರ್ಣಪಾಠ: ‘ಜನ­ಸಾಮಾನ್ಯರಲ್ಲಿ ಹೊಸ ಆಶಾಕಿರಣ ಮೂಡಿದೆ. ಆ ಮೂಲಕ ಜವಾ­ಬ್ದಾರಿಯ ಯುಗ ಶುರು­ವಾಗಿದೆ. ಬಿಜೆಪಿಗೆ ಸಿಕ್ಕಿರುವ ಈ ಅಭೂತಪೂರ್ವ ವಿಜಯವು ನಂಬಿಕೆ ಹಾಗೂ ನಿರೀಕ್ಷೆಗೆ ಕೊಟ್ಟ ಜನಾದೇಶವಾಗಿದೆ. ಜನರ ನಿರೀಕ್ಷೆ ಈಡೇರಿಸು­ವುದಕ್ಕೆ ಶಕ್ತಿಮೀರಿ ಪ್ರಯತ್ನಿಸುತ್ತೇನೆ.

‘ಹಳೆಯ ಕೆಟ್ಟ ಅನುಭವಗಳನ್ನು ಮರೆ­ತು­ಬಿಡಿ. ನಿರಾಶಾವಾದದಿಂದ ಏನನ್ನೂ ಸಾಧಿಸ­ಲಾಗದು’.
‘ನಾನು ಶಿಸ್ತಿನ ಸಿಪಾಯಿ. ಕಡುಬಡ­ವರಿಗಾಗಿ ಹಾಗೂ ಯುವಜನತೆಗಾಗಿ ಕೆಲಸ ಮಾಡಲು ಬದ್ಧ. ಗ್ರಾಮೀಣ ಪ್ರದೇಶದಲ್ಲಿ ತಾಯಂದಿರ ಹಾಗೂ ಸಹೋದರಿಯ ಸುರಕ್ಷತೆಗೆ ಹೊಸ ಸರ್ಕಾರ ಬದ್ಧವಾಗಿರುತ್ತದೆ’.

‘ಪಕ್ಷಕ್ಕಿಂತ ನಾನು ದೊಡ್ಡವನಲ್ಲ. ಈ ಸಾಧನೆ ಪಕ್ಷದ ಸಂಘಟನಾ ಶಕ್ತಿಗೆ ದೊರೆತ ಜಯ. ಸ್ವತಂತ್ರ ಭಾರತದಲ್ಲಿ ಹುಟ್ಟಿದವರ ಕೈಗೆ ಮೊದಲ ಬಾರಿ ಅಧಿಕಾರ ಸಿಕ್ಕಿದೆ. ನಾವು ದೇಶದ ಸ್ವಾತಂತ್ರ್ಯ­ಕ್ಕಾಗಿ ಹೋರಾಟ ಮಾಡ­ಲಿಲ್ಲ.  ಆದರೆ, ಇನ್ನು ಮುಂದೆ ದೇಶ­ವನ್ನು ಅಭಿವೃದ್ಧಿ­ಯತ್ತ ಕೊಂಡೊಯ್ಯು­ವುದಕ್ಕೆ ಹಾಗೂ ಜನರ ಶ್ರೇಯೋಭಿ­ವೃದ್ಧಿಗೆ ನಮ್ಮ ಬದುಕನ್ನು ಮುಡಿ­ಪಾಗಿಡುತ್ತೇವೆ’

‘2019ರಲ್ಲಿ ನಮ್ಮ ಸಾಧನೆಯ ವರದಿ ಮಂಡಿ­ಸುತ್ತೇನೆ. ಸರ್ಕಾರ ನನಗಾಗಿ ಅಲ್ಲ, ದೇಶಕ್ಕಾಗಿ. ಈ ಹಿಂದಿನ ಎಲ್ಲ ಸರ್ಕಾರಗಳು ದೇಶದ ಶ್ರೇಯೋಭಿ­ವೃದ್ಧಿಗೆ ಕೊಡುಗೆ ನೀಡಿವೆ. ಹಿಂದಿನವರು ಮಾಡಿದ ಉತ್ತಮ ಕೆಲಸಗಳನ್ನು ನಾವು ಮುಂದುವರಿಸಿಕೊಂಡು ಹೋಗುತ್ತೇವೆ’.

‘ಐದು ಪೀಳಿಗೆಯ ಕಾರ್ಯಕರ್ತರ ತ್ಯಾಗ­ದಿಂದಾಗಿ ನಾವು ಈ ಮಟ್ಟಕ್ಕೆ ಬಂದಿ­ದ್ದೇವೆ. ಚುನಾವಣೆಯಲ್ಲಿ ಯಾರು ಗೆದ್ದರು, ಯಾರು ಸೋತರು ಎನ್ನುವುದೆಲ್ಲ ಮುಗಿದ ಅಧ್ಯಾಯ. ಭಾರತದ ಹಾಗೂ ವಿಶ್ವದ ಜನರಲ್ಲಿ ಭರವಸೆಯ ಹೊನ್ನ ಕಿರಣ ಮೂಡಿದೆ. ಈಗೇನಿದ್ದರೂ ಜವಾಬ್ದಾರಿಯ ಸಮಯ’.

‘ನನ್ನ ಪ್ರತಿಯೊಂದು ಕ್ಷಣವನ್ನೂ ಜನರಿಗಾಗಿ ಮೀಸಲಿಡುತ್ತೇನೆ. ಈ ಚುನಾವಣೆ ಫಲಿತಾಂಶವು ಜನರಲ್ಲಿ ಪ್ರಜಾತಂತ್ರದ ಮೇಲಿನ ನಂಬಿಕೆಯನ್ನು ಹೆಚ್ಚಿಸಿದೆ’.

‘ಯುಪಿಎ ಸರ್ಕಾರ ಏನನ್ನೂ ಮಾಡಿಲ್ಲ ಎನ್ನುವುದನ್ನು ನಾನು ನಂಬುವುದಿಲ್ಲ. ಅವರ ಕೈಯಲ್ಲಿ ಏನು ಸಾಧ್ಯವೋ ಅದನ್ನು ಮಾಡಿ­ದ್ದಾರೆ. ಒಳ್ಳೆಯ ಕೆಲಸಕ್ಕೆ ಅವರು ಪ್ರಶಂಸೆಗೆ ಅರ್ಹರು’.

ಪ್ರಜಾತಂತ್ರ ದೇಗುಲಕ್ಕೆ ಶಿರಬಾಗಿ ವಂದನೆ: ಮೋದಿ ಅವರು ಕಾರಿನಿಂದ ಇಳಿದವರೇ ಸಂಸತ್‌್ ಭವನದ ಮೆಟ್ಟಿಲುಗಳಿಗೆ ಶಿರಬಾಗಿ ವಂದಿಸಿ  ಸೆಂಟ್ರಲ್‌ ಹಾಲ್‌ ಪ್ರವೇಶಿಸಿದರು.

ಪ್ರವೇಶ ದ್ವಾರದಲ್ಲಿ ನಿಂತಿದ್ದ ಬಿಜೆಪಿ ಮುಖಂಡರಾದ ಗೋಪಿನಾಥ್‌ ಮುಂಡೆ ಹಾಗೂ ನಿತಿನ್‌್ ಗಡ್ಕರಿ ಅವರು ಮೋದಿ ಅವರನ್ನು ಅಭಿನಂದಿಸಿದರು.

ಪ್ರಧಾನಿ ಟ್ವಿಟರ್‌ ಖಾತೆ ಬದಲಾವಣೆ: ಬಿಜೆಪಿ ಆಕ್ಷೇಪ
ನವದೆಹಲಿ (ಐಎಎನ್‌ಎಸ್‌):  ನಿರ್ಗಮಿತ ಪ್ರಧಾನಿ ಮನಮೋಹನ್ ಸಿಂಗ್  ಅವಧಿ­ಯಲ್ಲಿ ತೆರೆಯಲಾಗಿದ್ದ ಸಾಮಾಜಿಕ ಜಾಲತಾಣ ಟ್ವಿಟರ್‌ ಖಾತೆಯನ್ನು ಪ್ರಧಾನಿ ಕಚೇರಿ  ಮಂಗಳವಾರ ಯಾವುದೇ ಮುನ್ಸೂಚನೆ ನೀಡದೆ ಏಕಾಏಕಿ ಬದಲಾಯಿ­ಸಿರುವುದು ಬಿಜೆಪಿ ಕೆಂಗಣ್ಣಿಗೆ ಗುರಿಯಾಗಿದೆ. @ಪಿಎಂಒಇಂಡಿಯಾ ಎಂಬ ಹೆಸರಿನಲ್ಲಿ ಟ್ವಿಟರ್‌ ಖಾತೆಯನ್ನು ಹೊಂದಿದ್ದ ಪ್ರಧಾನಿ ಕಚೇರಿ ಖಾತೆಯನ್ನು @ಪಿಎಂಒಇಂಡಿಯಾ ಆರ್ಕೈವ್‌ ಎಂದು ಮಂಗಳವಾರ ಬದ­ಲಾಯಿಸಿದೆ.