ನವದೆಹಲಿ (ಪಿಟಿಐ): ಅಪ್ರಸ್ತುತವಾಗಿರುವ ೭೩ಕ್ಕೂ ಹೆಚ್ಚು ಕಾನೂನುಗಳನ್ನು ರದ್ದು ಮಾಡುವುದಕ್ಕೆ ಕಾನೂನು ಆಯೋಗ ಸರ್ಕಾರಕ್ಕೆ ಸೋಮವಾರ ಸಲ್ಲಿಸಿದ ಮೂರನೇ ಮಧ್ಯಾಂತರ ವರದಿಯಲ್ಲಿ ಶಿಫಾರಸು ಮಾಡಿದೆ.
ಎರಡನೇ ಮಹಾಯುದ್ಧಕ್ಕೆ ಮುನ್ನ, ಅಂದರೆ ೧೯೩೮ರಲ್ಲಿ ಜಾರಿಗೆ ಬಂದ ಅಪರಾಧ ತಿದ್ದುಪಡಿ ಕಾನೂನು ರದ್ದತಿಗೆ ಕೂಡ ಆಯೋಗ ಶಿಫಾರಸು ಮಾಡಿದೆ. ಯುದ್ಧದಲ್ಲಿ ಪಾಲ್ಗೊಳ್ಳದಂತೆ ಸಾರ್ವಜನಿಕ ಭಾಷಣ ಮಾಡುವ ವ್ಯಕ್ತಿಗಳಿಗೆ ಶಿಕ್ಷೆ ವಿಧಿಸುವುದಕ್ಕಾಗಿ ಈ ಕಾನೂನು ಅಸ್ತಿತ್ವಕ್ಕೆ ಬಂತು. ಇದು ಬ್ರಿಟಿಷ್ ಕಾಲದ ಕಾನೂನಾಗಿದ್ದು, ಪ್ರಸ್ತುತತೆ ಕಳೆದುಕೊಂಡಿದೆ ಎಂದು ವರದಿ ಹೇಳಿದೆ.