ಮೌಢ್ಯ ಹುಟ್ಟುಹಾಕುವ ದೃಶ್ಯ ಮಾಧ್ಯಮಗಳು

ಮೈಸೂರು: ದೃಶ್ಯ ಮಾಧ್ಯಮಗಳು ಮೌಢ್ಯವನ್ನು ಹುಟ್ಟುಹಾಕುವಲ್ಲಿ ಪ್ರಧಾನ ಪಾತ್ರ ವಹಿಸುತ್ತಿದ್ದು, ಸಮಾಜವನ್ನು ವಿಕಾರಗೊಳಿಸು­ತ್ತಿವೆ ಎಂದು ನಿಡುಮಾಮಿಡಿ ಮಠದ ವೀರಭದ್ರ ಚನ್ನಮಲ್ಲ ಸ್ವಾಮೀಜಿ ಬೇಸರ ವ್ಯಕ್ತಪಡಿಸಿದರು.

ಕರ್ನಾಟಕ ರಾಜ್ಯ ಹಿಂದುಳಿದ ವರ್ಗಗಳ ಜಾಗೃತ ವೇದಿಕೆ, ಪಿಯುಸಿಎಲ್‌, ಫ್ರೈಡೇ ಫೋರಂ, ಸಮತಾ ವೇದಿಕೆ, ಮಹಿಳಾ ಒಕ್ಕೂಟದ ಸಹಯೋಗದಲ್ಲಿ ನಗರದ ಕಲಾಮಂದಿರದ ಮನೆಯಂಗಳದಲ್ಲಿ ಶುಕ್ರವಾರ ಏರ್ಪಡಿಸಿದ್ದ ‘ಮೌಢ್ಯ ಪ್ರತಿಬಂಧಕ ಕಾಯ್ದೆ ಅನುಷ್ಠಾನ’ ಕುರಿತ ಸಂವಾದದಲ್ಲಿ ಅವರು ಮಾತನಾಡಿದರು.

ವಾಹಿನಿಗಳಲ್ಲಿ ಜಾಹೀರಾತಿನ ಕಾರಣದಿಂದ ವಾಸ್ತು, ಜ್ಯೋತಿಷ ವಿಷಯಗಳಲ್ಲಿ ಯಥಾಸ್ಥಿತಿ ವಾದವನ್ನು ಮುಂದುವರಿಸಿವೆ. ಮಾಧ್ಯಮಗಳ ಮೂಲಕ ಮೌಢ್ಯಗಳು ಬಲಗೊಳ್ಳುತ್ತಿವೆ. ಹೀಗಾಗಿ, ವಾಹಿನಿಗಳಲ್ಲಿ ವಾಸ್ತು, ಜ್ಯೋತಿಷ ಕುರಿತು ಕಾರ್ಯಕ್ರಮಗಳನ್ನು ನಿಷೇಧಿಸಬೇಕು. ಮೂಢನಂಬಿಕೆ ಪ್ರತಿಬಂಧಕ ಕಾಯ್ದೆಯಲ್ಲಿ ಈ ಅಂಶವನ್ನು ಸೇರ್ಪಡೆಗೊಳಿಸಬೇಕು ಎಂದು ಸಲಹೆ ನೀಡಿದರು.

ಜಾತಿ ವ್ಯವಸ್ಥೆ, ಜಮೀನ್ದಾರಿ ಪದ್ಧತಿ ಮೊದಲಾದವು ಗ್ರಾಮೀಣ ಜನರಲ್ಲಿ ಒಗ್ಗಿಕೊಂಡಿವೆ. ಹಳ್ಳಿಯಿಂದ ಹೊರಗೆ ಬಂದಾಗ ಪರಸ್ಪರ ಬೆರೆಯುವ ಗ್ರಾಮದ ವಿವಿಧ ಸಮುದಾಯದವರು ಗ್ರಾಮದಲ್ಲಿ, ಕೇರಿಯಲ್ಲಿ ಬೆರೆಯುವುದಿಲ್ಲ. ಇದು ಗ್ರಾಮೀಣ ಪ್ರದೇಶಗಳ ವಾಸ್ತವ.
ಸಾಮಾಜಿಕ ಭಯ, ಕಟ್ಟಳೆಗಳು ಗ್ರಾಮೀಣ ಯುವಪೀಳಿಗೆಯನ್ನು ಕಾಡುತ್ತಿವೆ. ಹಳ್ಳಿಗಳಲ್ಲೂ ನಿಧಾನವಾಗಿ ಜಾಗೃತಿ ಮೂಡುತ್ತಿ­ರುವುದು ಸಮಾಧಾನದ ಸಂಗತಿ. ಅಸ್ಪೃಶ್ಯತೆ­ಯನ್ನು ಹೋಗಲಾಡಿಸಲು ಮಾನವೀಯ ಮನಸ್ಸು ಬೇಕು ಎಂದು ಕಿವಿಮಾತು ಹೇಳಿದರು.

ಹಿಂದಿನ ಕಾಲದಲ್ಲಿ ದೇಗುಲಗಳಲ್ಲಿ ಶಿಕ್ಷಣ, ನ್ಯಾಯದಾನ, ಸಂಗೀತ ಸೇರಿದಂತೆ ಗ್ರಾಮದ ಆಗುಹೋಗುಗಳ ಸಮಗ್ರ ಚರ್ಚೆ ನಡೆಯುತ್ತಿದ್ದವು. ಆದರೆ, ಆಧುನಿಕ ಯುಗದಲ್ಲಿ ದೇವಾಲಯದ ಪಾತ್ರ ಜನರ ಭಕ್ತಿಗೆ ಮಾತ್ರ ಸೀಮಿತವಾಗಿಬಿಟ್ಟಿವೆ. ದೇವರನ್ನು ನಂಬುವ ಮನಸ್ಸುಗಳ ಪ್ರಮಾಣ ಶೇ 95ರಷ್ಟು ಇದೆ. ದೇವರ ನಿರಾಕರಣೆ ಅಸಾಧ್ಯವಾದ ಮಾತು. ತಿರಸ್ಕಾರದ ನೆಲೆಯಲ್ಲಿ ಹೇಳಿದರೆ ಜನರಿಗೆ ಯಾವುದೂ ನಾಟುವುದಿಲ್ಲ. ಬದಲಿಗೆ ಸಕಾರಾತ್ಮಕವಾಗಿ ಹೇಳುವ ಮೂಲಕ ಜ್ಞಾನ ಮತ್ತು ಅಜ್ಞಾನದ ನಡುವಿನ ಅಂತರವನ್ನು ಕಡಿಮೆ ಮಾಡಬೇಕಿದೆ ಎಂದು ತಿಳಿಸಿದರು.