ಅಂಬುಜಾ ಸಿಮೆಂಟ್ಸ್‌ಗೆ ₹1,525 ಕೋಟಿ ಲಾಭ

2022–23ರ ಇದೇ ಅವಧಿಯಲ್ಲಿ ₹763 ಕೋಟಿ ಲಾಭಗಳಿಸಿತ್ತು. ವರಮಾನವು ₹7,965 ಕೋಟಿಯಿಂದ ₹8,894 ಕೋಟಿಗೆ ಏರಿಕೆಯಾಗಿದೆ ಎಂದು ಕಂಪನಿಯು ಷೇರುಪೇಟೆಗೆ ತಿಳಿಸಿದೆ.

ಕಂಪನಿಯ ವೆಚ್ಚವು ಮಾರ್ಚ್‌ ತ್ರೈಮಾಸಿಕದಲ್ಲಿ ₹7,741 ಕೋಟಿಯಾಗಿದೆ. ತೆರಿಗೆ ನಂತರದ ಲಾಭವು ₹502 ಕೋಟಿಯಿಂದ ₹532 ಕೋಟಿಗೆ ಹೆಚ್ಚಳವಾಗಿದೆ ಎಂದು ತಿಳಿಸಿದೆ.

ಎಸಿಸಿ ಸೇರಿ ಅಂಬುಜಾ ಕಂಪನಿಯ ಸಿಮೆಂಟ್‌ ಮಾರಾಟವು 1.66 ಕೋಟಿ ಟನ್‌ನಷ್ಟು ಆಗಿದೆ ಎಂದು ಹೇಳಿದೆ.

ಅದಾನಿ ವಿಲ್ಮರ್‌ ಲಾಭ ಹೆಚ್ಚಳ: ಮಾರ್ಚ್‌ ತ್ರೈಮಾಸಿಕದಲ್ಲಿ ಅದಾನಿ ವಿಲ್ಮರ್‌ ಕಂಪನಿಯ ನಿವ್ವಳ ಲಾಭದಲ್ಲಿ ಶೇ 67ರಷ್ಟು ಏರಿಕೆಯಾಗಿದೆ. ಲಾಭವು ₹93 ಕೋಟಿಯಿಂದ ₹156 ಕೋಟಿಗೆ ಹೆಚ್ಚಳವಾಗಿದೆ. ವರಮಾನವು ₹14,185 ಕೋಟಿಯಿಂದ ₹13,342 ಕೋಟಿಗೆ ಏರಿಕೆಯಾಗಿದೆ.

ಆದರೆ, ಕಡಿಮೆ ಆದಾಯದಿಂದ 2023–24ರ ಪೂರ್ಣ ಹಣಕಾಸು ವರ್ಷದಲ್ಲಿ ಲಾಭವು ₹582 ಕೋಟಿಯಿಂದ ₹147 ಕೋಟಿಗೆ ಇಳಿಕೆಯಾಗಿದೆ. ಆದಾಯವು ₹59,148 ಕೋಟಿಯಿಂದ ₹51,555 ಕೋಟಿಗೆ ಕುಸಿದಿದೆ ಎಂದು ಕಂಪನಿ ತಿಳಿಸಿದೆ.

ಎನರ್ಜಿ ಸಲ್ಯೂಷನ್ಸ್‌ ಲಾಭ ಇಳಿಕೆ: ವೆಚ್ಚದ ಪ್ರಮಾಣ ಹೆಚ್ಚಳದಿಂದಾಗಿ ಅದಾನಿ ಎನರ್ಜಿ ಸಲ್ಯೂಷನ್ಸ್‌ ಲಾಭದಲ್ಲಿ ಶೇ 13ರಷ್ಟು ಇಳಿಕೆಯಾಗಿದೆ. ₹381 ಕೋಟಿ ನಿವ್ವಳ ಲಾಭ ದಾಖಲಿಸಿದೆ. ವರಮಾನವು ₹3,494 ಕೋಟಿಯಿಂದ ₹4,855 ಕೋಟಿಗೆ ಏರಿಕೆಯಾಗಿದೆ ಎಂದು ಕಂಪನಿ ತಿಳಿಸಿದೆ.

ಅದಾನಿ ಪೋರ್ಟ್ಸ್‌ಗೆ ಎಎಎ ರೇಟಿಂಗ್‌: ಅದಾನಿ ಬಂದರು ಮತ್ತು ವಿಶೇಷ ಆರ್ಥಿಕ ವಲಯವು (ಎಪಿಎಸ್‌ಇಝಡ್) ಕೇರ್‌ ರೇಟಿಂಗ್ಸ್‌ನಿಂದ ಎಎಎ ರೇಟಿಂಗ್‌ ಪಡೆದುಕೊಂಡಿದೆ. ಈ ಮಾನ್ಯತೆ ಪಡೆದ ಮೊದಲ ಅತಿದೊಡ್ಡ ಖಾಸಗಿ ಮೂಲ ಸೌಕರ್ಯ ಕಂಪನಿಯಾಗಿದೆ ಎಂದು ಎಪಿಎಸ್‌ಇಝಡ್ ತಿಳಿಸಿದೆ.

ಕಂಪನಿಯು 2023–24ನೇ ಹಣಕಾಸು ವರ್ಷದಲ್ಲಿ 41.99 ಕೋಟಿ ಟನ್‌ ಸರಕು ಸಾ‌ಗಣೆ ಮಾಡಿದೆ. ಹಿಂದಿನ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಸಾಗಣೆಯಲ್ಲಿ ಶೇ 24ರಷ್ಟು ಏರಿಕೆಯಾಗಿದೆ.