ಮುಂಬೈ: ಹರಳು ಮತ್ತು ಆಭರಣ ರಫ್ತು 2021ರ ಜೂನ್‌ಗೆ ಹೋಲಿಸಿದರೆ ಈ ವರ್ಷದ ಜೂನ್‌ನಲ್ಲಿ ಶೇಕಡ 21.41ರಷ್ಟು ಹೆಚ್ಚಾಗಿದೆ.
ಮೌಲ್ಯದ ಲೆಕ್ಕದಲ್ಲಿ ₹ 20,835 ಕೋಟಿಯಿಂದ ₹ 25,295 ಕೋಟಿಗೆ ಏರಿಕೆ ಆಗಿದೆ ಎಂದು ಹರಳು ಮತ್ತು ಆಭರಣ ರಫ್ತು ಉತ್ತೇಜನ ಮಂಡಳಿ (ಜಿಜೆಇಪಿಸಿ) ಪ್ರಕಟಣೆ ತಿಳಿಸಿದೆ. ಚಿನ್ನಾಭರಣ ರಫ್ತು ₹ 4,171 ಕೋಟಿಯಿಂದ ₹ 5,641 ಕೋಟಿಗೆ (ಶೇ 35ರಷ್ಟು) ಏರಿಕೆ ಕಂಡಿದೆ.
2022ರ ಏಪ್ರಿಲ್‌–ಜೂನ್ ಅವಧಿಯಲ್ಲಿ ರಫ್ತು ವಹಿವಾಟು ಶೇ 14.6ರಷ್ಟು ಹೆಚ್ಚಾಗಿ ₹ 77,049 ಕೋಟಿಗೆ ತಲುಪಿದೆ. 2021ರ ಏಪ್ರಿಲ್‌–ಜೂನ್ ಅವಧಿಯಲ್ಲಿ ₹ 67,231 ಕೋಟಿ ಮೌಲ್ಯದ ರಫ್ತು ಆಗಿತ್ತು.
ಯುಎಇ ಜೊತೆಗಿನ ಸಮಗ್ರ ಆರ್ಥಿಕ ಪಾಲುದಾರಿಕೆ ಒಪ್ಪಂದದ (ಸಿಇಪಿಎ) ಬಳಿಕ ಮಧ್ಯಪ್ರಾಚ್ಯ ದೇಶಗಳಿಗೆ ರಫ್ತು ವಹಿವಾಟು ಸಕಾರಾತ್ಮಕ ಬೆಳವಣಿಗೆ ಕಾಣುತ್ತಿದೆ ಎಂದು ಮಂಡಳಿಯು ಹೇಳಿದೆ.
ಯುಎಇಗೆ 2021ರ ಜೂನ್‌ನಲ್ಲಿ ರಫ್ತು ₹ 8,904 ಕೋಟಿ ಇತ್ತು. 2022ರ ಜೂನ್‌ನಲ್ಲಿ ₹ 9,802 ಕೋಟಿಗೆ ಏರಿಕೆಯಾಗಿದೆ.
