ಏಸಸ್ ಆಲ್-ಇನ್-ಒನ್ ಒಂದರಲ್ಲೇ ಎಲ್ಲವೂ ಅಡಕ

ಏಸಸ್ ಕಂಪೆನಿಯ ಸ್ಮಾರ್ಟ್‌ಫೋನ್‌ಗಳ ವಿಮರ್ಶೆ ಇದೇ ಅಂಕಣದಲ್ಲಿ ಬಂದಿದೆ. ಪ್ರಾರಂಭದಲ್ಲಿ ಗಣಕಗಳಲ್ಲಿ ಬಳಸುವ ಮದರ್‌ಬೋರ್ಡ್‌ ತಯಾರಿಕೆಯನ್ನು ಏಸಸ್ ಮಾಡುತ್ತಿತ್ತು. ಅಲ್ಲಿಂದ ಮುಂದುವರೆದು ಹಲವು ನಮೂನೆಯ ಲ್ಯಾಪ್‌ಟಾಪ್, 2-ಇನ್-1, ಟ್ಯಾಬ್ಲೆಟ್ ಜೊತೆ ಸ್ಮಾರ್ಟ್‌ಫೋನ್‌ಗಳನ್ನೂ ಈ ಕಂಪೆನಿ ತಯಾರಿಸುತ್ತಿದೆ. ಏಸಸ್ ಕಂಪೆನಿಯ ಉತ್ಪನ್ನಗಳು ಸಾಮಾನ್ಯವಾಗಿ ನೀಡುವ ಹಣಕ್ಕೆ ಮೋಸವಿಲ್ಲ ಎನ್ನುವಂತಿವೆ. ಒಂದರಲ್ಲೇ ಎಲ್ಲವೂ ಅಡಕವಾಗಿರುವ ಏಸಸ್ ಆಲ್-ಇನ್-ಒನ್ ಇಟಿ2040 (Asus ET2040 All-in-One PC) ನಮ್ಮ ಈ ವಾರದ ಗ್ಯಾಜೆಟ್.

ಗುಣವೈಶಿಷ್ಟ್ಯಗಳು
2.4 ಗಿಗಾಹರ್ಟ್ಸ್ ವೇಗದ ನಾಲ್ಕು ಹೃದಯಗಳ ಪ್ರೊಸೆಸರ್(J2900), 4 ಗಿಗಾಬೈಟ್ ಮೆಮೊರಿ, 500 ಗಿಗಾಬೈಟ್ ಸಂಗ್ರಹ ಶಕ್ತಿಯ ಹಾರ್ಡ್‌ಡಿಸ್ಕ್, ಇಂಟೆಲ್ ಗ್ರಾಫಿಕ್ಸ್, 19.5 ಇಂಚು ಗಾತ್ರದ 16:9 ಅನುಪಾತದ 1366 x 768 ಪಿಕ್ಸೆಲ್ ರೆಸೊಲೂಶನ್ನ ಎಲ್ಇಡಿ ಪರದೆ, ಸ್ಪರ್ಶಪರದೆ ಇಲ್ಲ, 1 ಮೆಗಾಪಿಕ್ಸೆಲ್ ಕ್ಯಾಮೆರಾ, 2 x 2 ವಾಟ್ ಸ್ಪೀಕರ್‌ಗಳು, ಮೈಕ್ರೋಫೋನ್ ಇದೆ, ವೈಫೈ, ಇಥರ್ನೆಟ್, ಹೆಡ್‌ಫೋನ್, ಮೈಕ್ರೋಫೋನ್, ಎಚ್‌ಡಿಎಂಐ ಮತ್ತು 5 ಯುಎಸ್‌ಬಿ ಕಿಂಡಿಗಳು, ಕಾರ್ಡ್‌ರೀಡರ್‌, ವಿಂಡೋಸ್ 8.1, ಇತ್ಯಾದಿ. ಅಂದಾಜು ಮಾರುಕಟ್ಟೆ ಬೆಲೆ ₹26,000.  

ಆಲ್-ಇನ್-ಒನ್‌ ಗಣಕಗಳಲ್ಲಿ ಡೆಸ್ಕ್‌ಟಾಪ್ ಗಣಕಗಳಂತೆ ಮದರ್‌ಬೋರ್ಡ್, ಹಾರ್ಡ್‌ಡಿಸ್ಕ್ ಇತ್ಯಾದಿ ಇರುವ ಒಂದು ಪೆಟ್ಟಿಗೆ, ಮಾನಿಟರ್ ಬೇರೆ ಬೇರೆ  ಇರುವುದಿಲ್ಲ. ಗಣಕದ ಪ್ರಮುಖ ಅಂಗಗಳಾದ ಮದರ್‌ಬೋರ್ಡ್, ಮೆಮೊರಿ, ಹಾರ್ಡ್ ಡಿಸ್ಕ್, ಮಾನಿಟರ್‌ ಎಲ್ಲ ಒಂದರಲ್ಲೇ ಅಡಕವಾಗಿರುತ್ತವೆ. ಹೊರಗಿನಿಂದ ಕೀಬೋರ್ಡ್ ಮತ್ತು ಮೌಸ್ ಜೋಡಿಸಬೇಕು. ಲ್ಯಾಪ್‌ಟಾಪ್‌ಗಳಂತೆ ಇದರಲ್ಲೇ ಬ್ಯಾಟರಿಯೂ ಇರುತ್ತದೆ. ಜೊತೆಗೆ ಚಾರ್ಜರ್ ಕೂಡ ನೀಡಿರುತ್ತಾರೆ. ಇದನ್ನು ನೆಟ್ಟಗೆ ನಿಲ್ಲಿಸಲು ಹಿಂದುಗಡೆ ತೆರೆಯಬಲ್ಲ ಆಧಾರ ನೀಡಿದ್ದಾರೆ. ಕೀಬೋರ್ಡ್ ಮತ್ತು ಮೌಸ್‌ಗಳನ್ನು ಅವರೇ ನೀಡಿದ್ದಾರೆ.

ನೋಡಲು ಆಕರ್ಷಕವಾಗಿದೆ. ರಚನೆ ಚೆನ್ನಾಗಿದೆ. ದೇಹ ಗಟ್ಟಿಮುಟ್ಟಾಗಿದೆ. ಸುಮಾರು 15 ಮಿ.ಮೀ ದಪ್ಪವಾಗಿದೆ. ಅಂದರೆ ಕಡಿಮೆ ಜಾಗದಲ್ಲಿ ನಿಮಗೆ ಡೆಸ್ಕ್‌ಟಾಪ್ ಗಣಕ ದೊರೆತಂತಾಗುವುದು. ಆದರೆ ಇದರ ಮೆಮೊರಿ ಜಾಸ್ತಿ ಮಾಡುವುದಾಗಲಿ ಹಾರ್ಡ್‌ಡಿಸ್ಕ್‌ ಬದಲಿಸುವುದಾಗಲಿ ಸುಲಭ ಸಾಧ್ಯವಲ್ಲ. ಈ ವಿಷಯದಲ್ಲಿ ಇದು ಲ್ಯಾಪ್‌ಟಾಪ್‌ಗಳಂತೆ.

ಪರದೆ ತುಂಬ ದೊಡ್ಡದಿರುವುದರಿಂದ ಗ್ರಾಫಿಕ್ಸ್ ಕೆಲಸ ಮಾಡುವವರಿಗೆ ಇದು ಸೂಕ್ತ. ಇತ್ತೀಚೆಗೆ ಬಹುತೇಕ ಡಿಟಿಪಿ ಕೇಂದ್ರಗಳಲ್ಲಿ ಇಂತಹ ಗಣಕಗಳನ್ನೇ ಬಳಸುತ್ತಾರೆ. ಇದರಲ್ಲಿ ಸಿ.ಡಿ. ಅಥವಾ ಡಿ.ವಿ.ಡಿ. ಡ್ರೈವ್ ಇಲ್ಲ. ಅವುಗಳ ಬಳಕೆ ಈಗ ತುಂಬ ಕಡಿಮೆಯಾಗಿದೆ. ಹೈಡೆಫಿನಿಶನ್ ಪರದೆ ಇದೆ. ಹೈಡೆಫಿನಿಶನ್ ವಿಡಿಯೊ ಮಾತ್ರವಲ್ಲ 4k ವಿಡಿಯೊಗಳನ್ನೂ ಯಾವುದೇ ಅಡೆತಡೆಯಿಲ್ಲದೆ ವೀಕ್ಷಣೆ ಮಾಡಬಹುದು. ಆದರೆ ಪರದೆಯ ಗುಣಮಟ್ಟ ಮಾತ್ರ ಅಷ್ಟಕ್ಕಷ್ಟೆ. ವೀಕ್ಷಣೆಯ ವ್ಯಾಪ್ತಿಯೂ (viewing angle) ಚೆನ್ನಾಗಿಲ್ಲ.

ಇದರಲ್ಲಿರುವ ಕ್ಯಾಮೆರಾ ಕೇವಲ 1 ಮೆಗಾಪಿಕ್ಸೆಲ್‌ನದು. ವೆಬ್‌ಕ್ಯಾಮ್ ಆಗಿ ಮಾತ್ರ ಬಳಸಬಹುದು. ಆಡಿಯೊ ಇಂಜಿನ್ ಪರವಾಗಿಲ್ಲ. ಉತ್ತಮ ಹೆಡ್‌ಫೋನ್‌ ಹಾಕಿಕೊಂಡರೆ ಸಂಗೀತ ಆಲಿಸುವ ಅಥವಾ ಆಟ ಆಡುವ ಅನುಭವ ಒಂದು ಮಟ್ಟಿಗೆ ತೃಪ್ತಿದಾಯಕವಾಗಿದೆ. ಇದರ ಗ್ರಾಫಿಕ್ಸ್ ಕೂಡ ತೃಪ್ತಿದಾಯಕವಾಗಿದೆ ಎನ್ನಬಹುದು. ಆಟ ಆಡುವ ಅನುಭವ ಪರವಾಗಿಲ್ಲ. ಒಟ್ಟಿನಲ್ಲಿ ಹೇಳುವುದಾದರೆ ಅತ್ಯುತ್ತಮ ಮಟ್ಟದ ಆಟ ಆಡುವ ಅನುಭವ ಬೇಕು ಅಥವಾ ಅತ್ಯುತ್ತಮ ಮಟ್ಟದ ಗ್ರಾಫಿಕ್ಸ್ ಅನುಭವ ಬೇಕು ಎನ್ನುವರಿಗೆ ಇದು ಒಪ್ಪುವಂಥದ್ದಲ್ಲ. ಎಲ್ಲದರಲ್ಲೂ ಒಂದು ಮಟ್ಟದ ರಾಜಿ ಮಾಡಿಕೊಳ್ಳಲು ಸಿದ್ಧರಾಗಿದ್ದವರಿಗೆ ಮಾತ್ರ ಇದು ಸೂಕ್ತ.

ಇದರಲ್ಲಿ ಸ್ಪರ್ಶಪರದೆ ಇಲ್ಲ ಎನ್ನುವುದು ಒಂದು ದೊಡ್ಡ ಕೊರತೆಯೇ. ಈ ಕೊರತೆಯನ್ನು ಏಸಸ್‌ನವರು ಒಂದು ಸವಲತ್ತನ್ನು ನೀಡುವ ಮೂಲಕ ನೀಗಿದ್ದಾರೆ ಎನ್ನಬಹುದು. ಇದರಲ್ಲಿರುವ ಕ್ಯಾಮೆರಾ ನಿಮ್ಮ ಕೈಯ ಚಲನೆಯನ್ನು ಗ್ರಹಿಸಿ ಅರ್ಥಮಾಡಿಕೊಳ್ಳುತ್ತದೆ. ಅಂಗೈಯ ಬೇರೆ ಬೇರೆ ಅಭಿನಯಗಳು ಬೇರೆ ಬೇರೆ ಕೆಲಸಕ್ಕೆ ನಿಗದಿಯಾಗಿವೆ.

ಕ್ಯಾಮೆರಾದ ಮುಂದೆ ಕೈ ಅಲ್ಲಾಡಿಸಿ, ಆಡಿಸಿ, ಮುಷ್ಟಿ ಬಿಗಿದು-ಬಿಟ್ಟು ಹೀಗೆ ಬೇರೆ ಬೇರೆ ರೀತಿಯ ಅಭಿನಯಗಳ ಮೂಲಕ ಬೇರೆ ಬೇರೆ ಕೆಲಸಗಳನ್ನು ಈ ಗಣಕದಿಂದ ಮಾಡಿಸಿಕೊಳ್ಳಬಹುದು. ಒಮ್ಮೆ ಸರಿಯಾಗಿ ಅಭ್ಯಾಸವಾದರೆ ಈ ಸವಲತ್ತನ್ನು ಸಮರ್ಥವಾಗಿ ಬಳಸಿಕೊಳ್ಳಬಹುದು. ಲ್ಯಾಪ್‌ಟಾಪ್‌ಗಳಂತೆ ಇದರಲ್ಲೂ ಬ್ಯಾಟರಿ ಇದೆ. ಆದರೆ ಇದು ಲ್ಯಾಪ್‌ಟಾಪ್‌ಗಳಂತೆ ಹಲವು ಗಂಟೆಗಳ ಕಾಲ ಬ್ಯಾಟರಿಯಲ್ಲಿ ಕೆಲಸ ಮಾಡಲಾರದು. ಏನು ಕೆಲಸ ಮಾಡುತ್ತಿದ್ದೀರಿ ಎಂಬುದನ್ನು ಅನುಸರಿಸಿ ಸುಮಾರು ಎರಡು ಗಂಟೆಗಳ ಕಾಲ ಇದು ಬ್ಯಾಟರಿಯಲ್ಲಿ ಕೆಲಸ ಮಾಡಬಲ್ಲುದು.

ಬಹುಮಟ್ಟಿಗೆ ಲ್ಯಾಪ್‌ಟಾಪ್‌ನಂತೆ ಇದನ್ನು ಸುಲಭವಾಗಿ ಒಂದು ಕಡೆಯಿಂದ ಇನ್ನೊಂದು ಕಡೆಗೆ ತೆಗೆದುಕೊಂಡು ಹೋಗಬಹುದು. ಒಂದು ಕೋಣೆಯಿಂದ ಇನ್ನೊಂದು ಕೋಣೆಗೆ ಇದನ್ನು ವರ್ಗಾಯಿಸುವುದು ಬಲು ಸುಲಭ. ಪ್ರಮುಖ ಅಂಗದಲ್ಲೇ ಎಲ್ಲವೂ ಅಡಕವಾಗಿದೆ. ಕೇವಲ ಕೀಬೋರ್ಡ್ ಮತ್ತು ಮೌಸ್ ಜೋಡಿಸಿದರೆ ಆಯಿತು. ಕಡಿಮೆ ಜಾಗವನ್ನು ಇದು ಆಕ್ರಮಿಸುತ್ತದೆ. ಒಟ್ಟಿನಲ್ಲಿ ಹೇಳುವುದಾದರೆ ನೀಡುವ ಹಣಕ್ಕೆ ಮೋಸವಿಲ್ಲ ಎನ್ನಬಹುದು. 

ವಾರದ ಆಪ್
ಸ್ಪೀಡ್‌ಟೆಸ್ಟ್