ಅಜೀರ್ಣ ಪಾಲಿಸಿ ತ್ರಿಸೂತ್ರ

-ತೆರೆದಿಟ್ಟ, ಸ್ವಚ್ಛವಿಲ್ಲದ ಪಾತ್ರೆಯಲ್ಲಿಟ್ಟ ಆಹಾರ ಸೇವಿಸಬಾರದು. -ಗಡಿಬಿಡಿಯಲ್ಲಿ/ ಅತಿ ನಿಧಾನವಾಗಿ ಊಟ ಮಾಡಬಾರದು.
-ಊಟದ ಮಧ್ಯೆ ಮಾತನಾಡುವುದು, ನಗುವುದು ಸರಿಯಲ್ಲ.

-ಆಹಾರದಲ್ಲಿ ಮನಸ್ಸಿಟ್ಟು ಏಕಾಗ್ರತೆಯಿಂದ ತಮ್ಮ ಜೀರ್ಣಶಕ್ತಿಗೆ ಅನುಸಾರವಾಗಿ ಆಹಾರ ಸೇವಿಸಬೇಕು. -ಆಹಾರವನ್ನು ಚೆನ್ನಾಗಿ ಅಗಿದು ತಿನ್ನುವುದರಿಂದ ಲಾಲಾಸ್ರಾವ ಹೆಚ್ಚಿ ಜೀರ್ಣಕ್ರಿಯೆಗೆ ಸಹಾಯವಾಗುತ್ತದೆ. -ನೈಸರ್ಗಿಕ ಅಥವಾ ಸಾವಯವ ಕೃಷಿ ಮೂಲಕ ಬೆಳೆದ ಆಹಾರವನ್ನು ಬಳಸುವುದು ಒಳ್ಳೆಯದು.

-ಹೊಟ್ಟೆಯನ್ನು ಮೂರು ಭಾಗ ಎಂದು ಪರಿಗಣಿಸಿ, ಅದರಲ್ಲಿ ಎರಡು ಭಾಗವನ್ನು ಘನಾಹಾರ ಅಥವಾ ಅನ್ನದಿಂದಲೂ, ಒಂದು ಭಾಗವನ್ನು ದ್ರವಾಹಾರ ಅಥವಾ ನೀರಿನಿಂದಲೂ ತುಂಬಿಸಬೇಕು. ಇನ್ನೊಂದು ಭಾಗವನ್ನು ವಾಯು ಚಲಿಸಲು ಖಾಲಿ ಬಿಡಬೇಕು. 

ಸರ್ವಜ್ಞನ ವಚನದಿಂದಲೇ ಆರಂಭಿಸಿದ ಲೇಖನವನ್ನು ಸಮಯೋಚಿತವಾದ ಸರ್ವಜ್ಞನ ವಚನದೊಂದಿಗೇ ಮುಕ್ತಾಯ­ಗೊಳಿಸುವುದು ಹೆಚ್ಚು ಸಮಂಜಸ ಎನ್ನುವುದು ನನ್ನ ಭಾವನೆ.

ನಾಲಿಗೆಯ ಕಟ್ಟಿಹನು ಕಾಲನಿಗೆ ದೂರಹನು
ನಾಲಿಗೆಯ ರುಚಿಯ ಮೇಲಾಡುತಿರುವವನ
ಕಾಲಹತ್ತಿರವಕ್ಕು ಸರ್ವಜ್ಞ

ನಾಲಿಗೆಯನ್ನು ನಿಯಂತ್ರಣದಲ್ಲಿ ಇಟ್ಟುಕೊಂಡವನು ಯಮನಿಂದ ದೂರ ಇರುತ್ತಾನೆ. ನಾಲಿಗೆಯ ಅನುಸಾರ ಉಂಡು ತಿಂದವನು ಕಾಲನಿಗೆ, ಅಂದರೆ ಸಾವಿಗೆ ಹತ್ತಿರದವನಾಗುತ್ತಾನೆ.

ಒಟ್ಟಿನಲ್ಲಿ ಎಲ್ಲವೂ ಹಿತಮಿತವಾಗಿದ್ದರೆ ಮತ್ತು ಸೂಕ್ತ ರೀತಿಯಲ್ಲಿ ಆಹಾರ ಕ್ರಮಗಳನ್ನು ಅನುಸರಿಸಿದರೆ, ಆಹಾರ ಸಂಪೂರ್ಣ ಜೀರ್ಣವಾಗಿ ನಾವು ಹಲವು ರೋಗಗಳಿಂದ ದೂರವಿರಲು ಸಾಧ್ಯ.

ಚಿಕಿತ್ಸೆ ಏನು?
* ಆಮಾ ಜೀರ್ಣ ಆದಲ್ಲಿ ಬಜೆ, ಸೈಂಧವ ಲವಣವನ್ನು ನೀರಿಗೆ ಸೇರಿಸಿ ರೋಗಿಗೆ ಕುಡಿಸಿ ಅಥವಾ ಕೊತ್ತಂಬರಿ, ಶುಂಠಿ­ಯನ್ನು ನೀರಿನಲ್ಲಿ ಕುದಿಸಿ ಆ ನೀರನ್ನು ಕುಡಿಸಿ ವಾಂತಿ ಮಾಡಿಸಬೇಕು.

* ವಿದಗ್ಧಾ ಜೀರ್ಣವಾಗಿದ್ದರೆ ಉಪವಾಸ ಮಾಡಿಸಬೇಕು. ತಂಪಾದ ನೀರನ್ನು ಕುಡಿಸಿ ವಿದಗ್ಧ ಪಿತ್ತವನ್ನು ಶಮನ ಮಾಡುವುದರಿಂದ, ವಿದಗ್ಧ ಅನ್ನವು ಜೀರ್ಣವಾಗಿ ಜಠರದಿಂದ ಮುಂದೆ ಸಾಗಿ ಕರುಳನ್ನು ಸೇರುತ್ತದೆ.

* ವಿಷ್ಟಬ್ಧಾ ಜೀರ್ಣ ಆಗಿದ್ದಲ್ಲಿ ಸೈಂಧವ ಲವಣ ಸೇರಿಸಿದ ನೀರನ್ನು ಕುಡಿಸಬೇಕು.
* ರಸಶೇಷಾ ಜೀರ್ಣದಲ್ಲಿ ಹಿಂಗು, ಶುಂಠಿ, ಹಿಪ್ಪಲಿ, ಕಾಳುಮೆಣಸು ಹಾಗೂ ಸೈಂಧವ ಲವಣಗಳನ್ನು ನೀರಿನಲ್ಲಿ ಕಲಸಿ ಹೊಟ್ಟೆಯ ಭಾಗಕ್ಕೆ ಲೇಪಿಸಿ, ನಿರ್ವಾತ ಸ್ಥಾನದಲ್ಲಿ ಮಲಗಿಸಿ ಉಪವಾಸ ಮಾಡಿಸಬೇಕು. 
 
ಯಾವ ದೋಷದಿಂದ ಅಜೀರ್ಣ ಉಂಟಾಗಿದೆ ಎಂಬುದನ್ನು ನಿಖರವಾಗಿ ಪತ್ತೆ ಹಚ್ಚಿದ ನಂತರವೇ, ಈ ಎಲ್ಲ ಚಿಕಿತ್ಸೆ ಮತ್ತು ಔಷಧಿಗಳನ್ನು ಆಯುರ್ವೇದ ತಜ್ಞರ ಸಲಹೆಯಂತೆ ಪಡೆಯಬೇಕು.          (ಮುಗಿಯಿತು)