ಒಬಾಮಾಗೆ ಇಲ್ಲಿಂದ ಅಂದದ ಉಡುಗೊರೆ

ಇಡೀ ದೇಶವೇ ಗಣರಾಜ್ಯೋತ್ಸವದ ಆಚರಣೆಗೆ ಸಜ್ಜಾಗಿದೆ. ಈ ಸಲದ ಗಣರಾಜ್ಯೋತ್ಸವಕ್ಕೆ ಅಮೆರಿಕ ಅಧ್ಯಕ್ಷ ಬರಾಕ್‌ ಒಬಾಮಾ ಮುಖ್ಯ ಅತಿಥಿಯಾಗಿ ಆಗಮಿಸಲಿರುವುದು ಆಕರ್ಷಣೆಯನ್ನು ಹೆಚ್ಚಿಸಿದೆ.

ಜ. 26ರಂದು ನಡೆಯುವ ಗಣರಾಜ್ಯೋತ್ಸವದ ಆಕರ್ಷಕ ಪಥಸಂಚಲನಕ್ಕೆ ಒಬಾಮಾ ಸಾಕ್ಷಿಯಾಗಲಿದ್ದಾರೆ. ಇದೇ ವೇಳೆ 14 ರಾಜ್ಯಗಳ ಸ್ತಬ್ಧಚಿತ್ರಗಳು ಅವರ ಮುಂದೆ ಹಾದುಹೋಗಲಿವೆ. ಇವುಗಳ ಪೈಕಿ ಕರ್ನಾಟಕದ ಚನ್ನಪಟ್ಟಣದ ಗೊಂಬೆಗಳೂ ಪಥಸಂಚಲನದ ಮೆರುಗು ಹೆಚ್ಚಿಸಲು ಸಜ್ಜಾಗಿವೆ.

ಚನ್ನಪಟ್ಟಣದ ಗೊಂಬೆಗಳು ಈ ಸಲ ಮಹಾನಗರಕ್ಕೆ ಬರಲಿರುವ ಒಬಾಮಾ ಅವರ ಜತೆ ಅಮೆರಿಕಕ್ಕೆ ತೆರಳಲೂ ಸಿದ್ಧವಾಗಿ ನಿಂತಿರುವುದು ವಿಶೇಷ. ಹೌದು! ಗಣರಾಜ್ಯೋತ್ಸವದಂದು ಬೆಂಗಳೂರಿಗೆ ಬರಲಿರುವ ‘ಹಿರಿಯಣ್ಣ’ನಿಗೆ ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಯು ಚನ್ನಪಟ್ಟದ ಗೊಂಬೆಗಳನ್ನು ಉಡುಗೊರೆಯಾಗಿ ನೀಡಲಿದೆ. ಉಡುಗೊರೆಗೆ ಚನ್ನಪಟ್ಟಣದ ಗೊಂಬೆಗಳನ್ನೇ ಆರಿಸಿರುವುದಕ್ಕೂ ಕಾರಣವಿದೆ.

ಹಿಂದೊಮ್ಮೆ ಅಮೆರಿಕದ ಅಧ್ಯಕ್ಷ ಬರಾಕ್ ಒಬಾಮ ಅವರು ಕುಟುಂಬ ಸಮೇತರಾಗಿ ಭಾರತಕ್ಕೆ ಬಂದಿದ್ದ ಸಮಯದಲ್ಲಿ ಅವರ ಪತ್ನಿ ಮಿಶೆಲ್ ಒಬಾಮ ನವದೆಹಲಿಯ ವಸ್ತು ಪ್ರದರ್ಶನದಲ್ಲಿ ಚನ್ನಪಟ್ಟಣದ ಬೊಂಬೆಗಳನ್ನು ಇಷ್ಟಪಟ್ಟು ಖರೀದಿಸಿದ್ದರು. ಅವರ ಮೂಲಕ ಚನ್ನಪಟ್ಟಣದ ಗೊಂಬೆಗಳು ಶ್ವೇತಭವನದಲ್ಲಿ ಸ್ಥಾನಪಡೆದಿದ್ದವು. ಆದ್ದರಿಂದಲೇ ಈ ಬಾರಿ ಒಬಾಮ ಅವರಿಗೆ ಉಡುಗೊರೆಯಾಗಿ ಚನ್ನಪಟ್ಟಣದ ಗೊಂಬೆಗಳನ್ನೇ ನೀಡಲು ವಾರ್ತಾ ಇಲಾಖೆ ನಿರ್ಧರಿಸಿದೆ.

ಬರಾಕ್‌ ಒಬಾಮಾ ಅವರು ದೆಹಲಿಯ ಕೆಂಪುಕೋಟೆಯಲ್ಲಿ ನಡೆಯುವ ಪರೇಡ್‌ ವೀಕ್ಷಣೆ ನಂತರ ವಿದೇಶಾಂಗ ಸಚಿವಾಲಯದ ಮೂಲಕ ಈ ಗೊಂಬೆಗಳನ್ನು ತಲುಪಿಸಲಾಗುವುದು ಎಂದು ರಾಜ್ಯ ವಾರ್ತಾ ಇಲಾಖೆ ನಿರ್ದೆಶಕ ಎನ್.ಆರ್.ವಿಶುಕುಮಾರ್ ತಿಳಿಸಿದ್ದಾರೆ.

ಎಲ್ಲೆಲ್ಲಿಂದ ಖರೀದಿ
ಅಮೆರಿಕ ಅಧ್ಯಕ್ಷರಿಗೆ ಉಡುಗೊರೆ ನೀಡುವುದೆಂದರೆ ಸಾಮಾನ್ಯವೇ? ಇದಕ್ಕಾಗಿ ವಾರ್ತಾ ಇಲಾಖೆ ಸಾಕಷ್ಟು ಎಚ್ಚರಿಕೆಯಿಂದ ಗೊಂಬೆಗಳನ್ನು ಆಯ್ಕೆ ಮಾಡಿದೆ. ಜೆ.ಪಿನಗರದಲ್ಲಿರುವ ಮಾಯಾ ಆರ್ಗಾನಿಕ್, ಎಂ.ಜಿ.ರಸ್ತೆಯ ಕಾವೇರಿ ಎಪೋರಿಯಂನಿಂದ ತರಹೇವಾರಿ ಗೊಂಬೆಗಳನ್ನು ಆಯ್ಕೆ ಮಾಡಿ ಖರೀದಿಸಲಾಗಿದೆ.

ಮಾಯಾ ಆರ್ಗಾನಿಕ್‌ನಿಂದ ಆರು ಗೊಂಬೆಗಳನ್ನು ಆಯ್ಕೆ ಮಾಡಲಾಗಿದೆ. ಇದರಲ್ಲಿ ಒಂದು ಕುದುರೆ, ಒಂದು ನಾಯಿ, ಎರಡು ಸ್ಟ್ಯಾಕರ್‍್ಸ್ (ಒಂದು ಚಿಕ್ಕದ್ದು, ಇನ್ನೊಂದು ದೊಡ್ಡದ್ದು), ಒಂದು ಕಾರು, ಒಂದು ಬಾತುಕೋಳಿ. ಕಾವೇರಿ ಎಂಪೋರಿಯಂನಿಂದ 15 ಬಗೆಯ ಗೊಂಬೆಗಳನ್ನು ಆಯ್ಕೆ ಮಾಡಲಾಗಿದೆ. ಇದರಲ್ಲಿ ವೀಣಾವಾದನ, ಹೂವಿನ ಕುಂಡ, ಫಿರಂಗಿ, ಕುಳಿತುಕೊಂಡಿರುವ–ನಿಂತುಕೊಂಡಿರುವ ಬ್ಲ್ಯಾಕ್ ಡಾಲ್‌ಗಳು, ವಿಮಾನ ಮುಂತಾದ ಬಗೆಯ ಗೊಂಬೆಗಳಿವೆ.