ಸಾಹಿತ್ಯ ಸಮ್ಮೇಳನ ಪ್ರಕ್ರಿಯೆಗಳು

***
ಗಡಿಭಾಗದ ಸಮ್ಮೇಳನವಿದು
ಆಂಧ್ರಕ್ಕೆ ಹತ್ತಿರದ ಪ್ರದೇಶದಲ್ಲಿ ಸಮ್ಮೇಳನ ಆಗಿರುವುದರಿಂದ ಈ ಭಾಗದ ಕನ್ನಡಾಭಿಮಾನಿಗಳಿಗೆ ಹೆಚ್ಚು ಸಂತೋಷ ಆಗಿದೆ. ಕಾರ್ಯಕ್ರಮದಲ್ಲಿ ಸಮ್ಮೇಳನಾಧ್ಯಕ್ಷರೊಂದಿಗೆ ಸಂವಾದ ಇಷ್ಟವಾಯಿತು. ಬಿಸಿಲು ನಾಡು, ಬರದ ನಾಡು ಎಂದೆಲ್ಲಾ ಹಣೆಪಟ್ಟಿ ಹೊತ್ತಿರುವ ಜಿಲ್ಲೆಗೆ ರಾಜ್ಯದ ಮೂಲೆ ಮೂಲೆಯಿಂದಲೂ ಸಾಹಿತ್ಯಾಸಕ್ತರು ಬಂದು ಈ ಭಾಗವನ್ನು ನೋಡುವಂತಾಯಿತು.

ಈ ಭಾಗದಲ್ಲಿ ಸಾಹಿತ್ಯ ಇನ್ನಷ್ಟು ಬೆಳೆಯುತ್ತಿದೆ. ಕನ್ನಡ ಶಾಲೆಗಳು ಅಭಿವೃದ್ಧಿ ಆಗಬೇಕು. ಆಗ ನಮ್ಮ ಮಕ್ಕಳನ್ನು ಆ ಶಾಲೆಗಳಿಗೆ ಕಳುಹಿಸಬಹುದು. ನನಗೆ ಸೇರಿದಂತೆ ಕನ್ನಡಾಭಿಮಾನಿಗಳಿಗೆ ಈ ಸಮ್ಮೇಳನ ತುಂಬಾ ಸಂತೋಷ ತಂದಿದೆ. 
–ಶಿಲ್ಪಾ ಸುಂಕದ್, ಸಿಂಧನೂರು,

***
ಭಿನ್ನ  ಗೋಷ್ಠಿಗಳು
ಗೋಷ್ಠಿಗಳು ತುಂಬಾ ಭಿನ್ನವಾಗಿದ್ದವು. ವೈಚಾರಿಕ ವಿಷಯಗಳನ್ನು ಒಳಗೊಂಡಿದ್ದವು. ಬರಗೂರರ ಭಾಷಣ, ವಿಚಾರಗಳು ಸೂಕ್ತವಾಗಿದ್ದವು. ಹಲವು ಸಮ್ಮೇಳನಗಳನ್ನು ನೋಡಿದ್ದೇನೆ. ಇದು ತುಂಬಾ ಅದ್ದೂರಿ ಅನಿಸಿತು. ಸಹಜವಾಗಿ ಇದು ಜಾತ್ರೆಯ ರೀತಿ ಅನಿಸಿದೆ. ಅದು ಬದಲಾಗಬೇಕು.
ವಿಜಯ ಬಡಿಗೇರ, ನಿವೃತ್ತ ಪ್ರಾಂಶುಪಾಲ, ಖಾನಾಪುರ

***
ಗಂಭೀರ ಚರ್ಚೆಗಳು ಬೇಕಿತ್ತು
ಒಟ್ಟಾರೆ ಸಮ್ಮೇಳನ ಆಯೋಜನೆ ಚೆನ್ನಾಗಿತ್ತು. ಅರ್ಥಪೂರ್ಣ ಸಮ್ಮೇಳನ. ಆದರೆ, ಉತ್ತರ ಕರ್ನಾಟಕ ಮತ್ತು ಹೈದರಾಬಾದ್ ಕರ್ನಾಟಕದ ಬಗ್ಗೆ ಇನ್ನಷ್ಟು ಗಂಭೀರ ಚರ್ಚೆಗಳು ಆಗಬೇಕಿತ್ತು. ಇನ್ನು ಸಂವಿಧಾನದ ತಿದ್ದುಪಡಿ ಕಲಂ 371 (ಜೆ) ಕುರಿತು ಮಾತನಾಡಲು ಈ ಭಾಗದ ಹೊರತಾದವರನ್ನು ಕರೆಸಿದರು. ಅವರೂ ಬರಲಿಲ್ಲ.

ಕೊನೆಗೂ ಇಲ್ಲಿನವರನ್ನೇ ಮಾತನಾಡಲು ಕೊನೆಯ ಕ್ಷಣದಲ್ಲಿ ನಿರ್ಧರಿಸಿದರು. ಇದು ಸರಿಯೆನಿಸಲಿಲ್ಲ. ಸಣ್ಣ ಪುಟ್ಟ ಅವ್ಯವಸ್ಥೆ ಹೊರತುಪಡಿಸಿದರೆ ಸಮ್ಮೇಳನ ಖುಷಿ ತಂದಿದೆ.ಸಮ್ಮೇಳನದಿಂದಾಗಿ ಈ ಭಾಗವನ್ನು ಬೇರೆಯವರು ತಿರುಗಿ ನೋಡುವಂತಾಗಿದೆ. ಸಮ್ಮೇಳನದ ಮೂಲಕ ಈ ಭಾಗದ ಸಮಗ್ರ ಅಭಿವೃದ್ಧಿಗೆ ಚಾಲನೆ ನೀಡುವ ಕೆಲಸ ಇನ್ನಾದರೂ ಗಂಭೀರವಾಗಿ ಆಗಲಿ. 
–ಮಂಜುನಾಥ ಅಂಗಡಿ, ಕೊಪ್ಪಳ