ನನ್ನಲೀ ನಿನ್ನಲೀ ಇದು ಎಲ್ಲರ ‘ಲೀ’

ದರ್ಶನ್, ಜಗ್ಗೇಶ್ ಅವರಂಥ ತಾರಾ ವರ್ಚಸ್ಸಿನ ಕಲಾವಿದರನ್ನಿಟ್ಟುಕೊಂಡು ‘ಅಗ್ರಜ’ ಸಿನಿಮಾ ನಿರ್ದೇಶಿಸಿದ ನಂತರವೂ ಎರಡು–ಎರಡೂವರೆ ವರ್ಷಗಳ ಬಿಡುವು ಪಡೆದವರು ಎಚ್.ಎಂ. ಶ್ರೀನಂದನ್. ಈಗ ಅವರು ತಾರಾಮೋಹ ತೊರೆದು ಕಥೆಯನ್ನು ಪ್ರೀತಿಸಿದ್ದಾರೆ. ನಾಯಕನಿಗಿಂತ ಹೆಚ್ಚಾಗಿ ಕಥೆಯನ್ನು ನಂಬಿ ಆ್ಯಕ್ಷನ್–ಕಟ್ ಹೇಳಿದ್ದಾರೆ. ಅವರ ಹೊಸ ಸಿನಿಮಾ ‘ಲೀ’ ಇಂದು (ಜ.13) ತೆರೆಕಾಣುತ್ತಿದೆ.

ಚಿತ್ರೀಕರಣ ಶುರುವಾದ ಲೆಕ್ಕದಲ್ಲಿ ‘ಲೀ’ ಬೇಗನೇ ಬಿಡುಗಡೆ ಹಂತಕ್ಕೆ ಬಂದಿದೆ. ‘ಲೀ’ ಅಕ್ಷರವನ್ನೇ ಶೀರ್ಷಿಕೆಯನ್ನಾಗಿ ಮಾಡಿಕೊಂಡಿರುವುದರ ಬಗ್ಗೆ ಪ್ರೇಕ್ಷಕರಲ್ಲಿ ಕುತೂಹಲ ಇದೆ. ಅದಕ್ಕೆ ಪೂರಕವಾಗಿ ‘ನನ್ನಲೀ ಮೊದಲು... ನಿನ್ನಲೀ ಕೊನೆ...’ ಎಂಬ ಉಪ ಶೀರ್ಷಿಕೆಯನ್ನು ನೀಡಲಾಗಿದೆ. ಆರಂಭದಲ್ಲಿ, ಲೀ ಎಂಬುದು ಒಂದು ವರ್ಣಮಾಲೆಯಷ್ಟೇ ಎಂದು ಹೇಳಿದ ನಿರ್ದೇಶಕ ಶ್ರೀನಂದನ್, ನಂತರ ಶೀರ್ಷಿಕೆಗೂ ಕಥೆಯೊಂದಿಗೂ ಇರುವ ಸಂಬಂಧವನ್ನು ಬಿಟ್ಟುಕೊಡುತ್ತ ಹೋದರು.

‘‘ಲೀ’ ಪದವು ನಾಯಕ ಹಾಗೂ ನಾಯಕಿಯ ಪಾತ್ರಕ್ಕೆ, ಚಿತ್ರಕಥೆಗೆ ಸೂಕ್ತವಾಗಿದೆ. ಈ ಅಕ್ಷರದ ಸುತ್ತವೇ ಕಥೆ ಹೆಣೆದುಕೊಂಡಿದೆ. ಹೆಸರಿನಲ್ಲಿ, ಸಂಬಂಧಗಳಲ್ಲಿ ಈ ಅಕ್ಷರ ಪ್ರಸ್ತಾಪವಾಗುತ್ತದೆ. ಪ್ರೀತಿಗೆ ಕಾರಣವಾಗಿರುತ್ತದೆ. ಚಿತ್ರಕಥೆಯ ಬೇರೆ ಬೇರೆ ಸ್ತರಗಳಲ್ಲಿ ‘ಲೀ’ ಕಾಣಿಸಿಕೊಳ್ಳುತ್ತದೆ’ ಎನ್ನುತ್ತಾರೆ ಶ್ರೀನಂದನ್. ಹಾಗೆಂದು ಅವರೇನೂ ಮೊದಲು ಶೀರ್ಷಿಕೆ ಆಯ್ದುಕೊಂಡು ನಂತರ ಕಥೆ ರಚಿಸಿಲ್ಲ. ಕಥೆ ರಚನೆಯಾದ ನಂತರವೇ ಅದಕ್ಕೆ ಶೀರ್ಷಿಕೆಯನ್ನು ಹೊಂದಿಸಿದ್ದಾರೆ. ಯಾವುದೋ ಒಂದು ನೈಜ ಪ್ರೇಮಕಥೆಯನ್ನು ಸ್ಫೂರ್ತಿಯಾಗಿ ತೆಗೆದುಕೊಂಡು ಅದಕ್ಕೆ ಸಿನಿಮೀಯ ಅಂಶಗಳನ್ನು ಹೊಸೆದಿದ್ದಾರೆ.

‘ಲೀ’ ಎಂದರೆ ಇದು ಬ್ರೂಸ್‌ಲೀ ಅವರಿಂದ ಪ್ರೇರಿತವಾದ ಕಥೆಯೇ ಎಂಬ ಪ್ರಶ್ನೆಗೆ – ‘ಬ್ರೂಸ್ ಲೀ ಅವರಿಂದ ಪ್ರೇರಣೆ ಪಡೆದು ಮಾಡಿದ ಸಿನಿಮಾ ಇದಲ್ಲ. ಆದರೆ ಬ್ರೂಸ್ ಲೀ ನೆನಪುಗಳಂತೂ ಚಿತ್ರದಲ್ಲಿ ಇವೆ. ನಾಯಕ ಬ್ರೂಸ್ ಲೀ ಅಭಿಮಾನಿ. ಅಲ್ಲದೇ ಲೀ ಎಂಬ ಮಾರ್ಷಲ್ ಆರ್ಟ್ಸ್ ಶಾಲೆಯಲ್ಲಿ ಆತ ತರಬೇತುದಾರ ಆಗಿರುತ್ತಾನೆ’ ಎನ್ನುತ್ತಾರೆ.