ದಕ್ಷಿಣ ಒಳನಾಡಿನಲ್ಲಿ ತುಂತುರು ಮಳೆ ಸಾಧ್ಯತೆ

‘ಹಿಂದೂ ಮಹಾಸಾಗರದ ಸಮಭಾಜಕ ವೃತ್ತದಿಂದ ಬಂಗಾಳಕೊಲ್ಲಿ ನೈರುತ್ಯದವರೆಗೆ ಗಾಳಿ ಒತ್ತಡ ಹೆಚ್ಚಿದೆ. ಅದರಿಂದಾಗಿ ಬೆಂಗಳೂರು, ಮಂಡ್ಯ, ಹಾಸನ, ತುಮಕೂರು, ಚಾಮರಾಜನಗರ, ಕೋಲಾರ ಸೇರಿದಂತೆ ಹಲವು ನಗರಗಳಲ್ಲಿ ಎರಡು ದಿನಗಳವರೆಗೆ ಮೋಡ ಕವಿದ ವಾತಾವರಣವಿರಲಿದೆ’ ಎಂದು ಹವಾಮಾನ ಇಲಾಖೆಯ ನಿರ್ದೇಶಕ (ಪ್ರಭಾರ) ಸುಂದರ್‌ ಎಂ. ಮೇತ್ರಿ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ವಾಯುಭಾರ ಕುಸಿತದಿಂದ ಶನಿವಾರ ಕೆಲ ಭಾಗಗಳಲ್ಲಿ ತುಂತುರು ಮಳೆಯಾಗಿದೆ. ಜ.22 ಹಾಗೂ ಜ.23ರಂದೂ ಕೆಲವೆಡೆ ತುಂತುರು ಮಳೆಯಾಗಲಿದೆ. ಇನ್ನು ಹಲವೆಡೆ ಮಳೆಯಾಗದೆ ಕೇವಲ ಮೋಡ ಕವಿದ ವಾತಾವರಣವಷ್ಟೇ ಇರಲಿದೆ’ ಎಂದರು.

ಚಳಿ ಮುಂದುವರಿಕೆ: ‘ಬೆಂಗಳೂರಿನಲ್ಲಿ ಮೋಡ ಕವಿದ ವಾತಾವರಣದಿಂದ ತಾಪಮಾನದಲ್ಲಿ ಇಳಿಕೆ ಕಂಡುಬರಲಿದೆ. ಅದರಿಂದ ಚಳಿ ಮತ್ತಷ್ಟು ಹೆಚ್ಚಾಗಲಿದೆ’ ಎಂದು ಸುಂದರ್‌ ತಿಳಿಸಿದರು. ‘ಕಳೆದ ವಾರವಷ್ಟೇ ಕನಿಷ್ಠ ತಾಪಮಾನ 17 ಡಿಗ್ರಿ ಸೆಲ್ಸಿಯಸ್‌ ಆಗಿತ್ತು. ಮುಂದಿನ ಎರಡು ದಿನಗಳಲ್ಲಿ ಅದರ ಪ್ರಮಾಣವು ಶೇ 2ರಷ್ಟು ಇಳಿಕೆಯಾಗಬಹುದು’ ಎಂದು ವಿವರಿಸಿದರು.