ಪ್ರಶ್ನೋತ್ತರ

**

–ಫಯಾಜ್‌, ಗಂಗಾವತಿ

* ಆರ್ಥಿಕ ವಿಚಾರಗಳಲ್ಲಿ  ನೀವು ಸಮಾಜಕ್ಕೆ ನೀಡುವ ಸಲಹೆ ತುಂಬಾ ಉಪಯುಕ್ತವಾಗಿದೆ. ನನಗೆ ಕೂಡಾ ನಿಮ್ಮ ಅಮೂಲ್ಯ ಸಲಹೆ ಬೇಕಾಗಿದೆ. ನಾನು ಆರ್‌ಎಫ್‌ಒ ಆಗಿ ಮಾರ್ಚ್‌ 2015 ರಲ್ಲಿ ಕೆಲಸಕ್ಕೆ ಸೇರಿದೆ. ನನ್ನ ವಯಸ್ಸು 25. ನನ್ನ ಸಂಬಳ ₹ 30,000. ನನಗೆ ಮನೆ ಇಲ್ಲ. ಉಳಿತಾಯದ ವಿಚಾರದಲ್ಲಿ ನಾನು ಹೇಗೆ ಜೀವನ ಪ್ರಾರಂಭಿಸಲಿ. ನಿಮ್ಮ ಉತ್ತರಕ್ಕಾಗಿ ಕಾಯುತ್ತಿದ್ದೇನೆ.

ಉತ್ತರ: ನಿಮಗೆ ಸರ್ಕಾರದಿಂದ ಉಳಿಯಲು ಮನೆ ಕೊಟ್ಟಿರಬೇಕು. ನೀವೂ ಅವಿವಾಹಿತ ರಿರಬೇಕು. ನೀವು ವೃತ್ತಿ ಜೀವನಕ್ಕೆ ಕಾಲಿಡುತ್ತಿರುವಾಗಲೇ ಸ್ವಂತ ಮನೆ, ಉತ್ತಮ ಉಳಿತಾಯ ಮಾಡಬೇಕು ಎನ್ನುವ ಮನೋಭಾವನೆ ಹೊಂದಿರುವುದು ನಿಜವಾಗಿ ಸಂತಸ ತಂದಿದೆ. ನಿಮ್ಮ ಖರ್ಚು ಕಳೆದು ₹ 20,000 ನೀವು ಪ್ರತೀ ತಿಂಗಳು ಈ ಕೆಳಗೆ ವಿವರಿಸಿದಂತೆ ಉಳಿತಾಯ ಮಾಡಲು ಪ್ರಾರಂಭಿಸಿ:

1. ಪಿ.ಪಿ.ಎಫ್‌. ಖಾತೆ ಪ್ರಾರಂಭಿಸಿ ಹಾಗೂ ತಿಂಗಳು ₹ 8000 ಕಟ್ಟುತ್ತಾ ಬನ್ನಿ.

2. ಎಲ್‌.ಐ.ಸಿ. ಜೀವನ ಆನಂದ ಪಾಲಿಸಿ ಮಾಡಿಸಿ ಪ್ರತೀ ತಿಂಗಳು ₹ 2000 ಕಟ್ಟಿರಿ.

3. ₹ 10000 ಆರ್‌.ಡಿ. ಎರಡು ವರ್ಷಗಳ ಅವಧಿಗೆ ಸಂಬಳ ಪಡೆಯುವ ಬ್ಯಾಂಕಿನಲ್ಲಿ ಮಾಡಿ.

ಇಷ್ಟರಲ್ಲಿ ನಿಮಗೆ ಮದುವೆಯಾಗಬಹುದು. ಪಿ.ಪಿ.ಎಫ್‌. ಹಾಗೂ ಎಲ್‌.ಐ.ಸಿ. ಉಳಿತಾಯ ದಿಂದ, ಸೆಕ್ಷನ್‌ 80ಸಿ ಆಧಾರದ ಮೇಲೆ ಇಲ್ಲಿ ತೊಡಗಿಸಿದ ಹಣದಿಂದ ಆದಾಯ ತೆರಿಗೆ ವಿನಾಯ್ತಿ ಪಡೆಯಿರಿ. ಆರ್‌.ಡಿ. ಹಣದಿಂದ ಮದುವೆ ಹಾಗೂ ಸಂಸಾರ ಮಾಡಲು ಬೇಕಾದ ಹಣ ಭರಿಸಿದಂತಾಗುತ್ತದೆ. ವಾರ್ಷಿಕವಾಗಿ ದೊರೆಯುವ ಇನ್‌ಕ್ರಿಮೆಂಟ್‌ ಹಾಗೂ ಅರ್ಧ ವಾರ್ಷಿಕವಾಗಿ ದೊರೆಯುವ ಹೆಚ್ಚಿನ ತುಟ್ಟಿಭತ್ಯೆ ಇವುಗಳ ಕನಿಷ್ಠ ಶೇ 50, ದೀರ್ಘಾವಧಿ ಆರ್‌.ಡಿ. ಮಾಡಿರಿ. ಈ ಪ್ರಕ್ರಿಯೆ ನಿರಂತರವಾಗಿರಲಿ, ಮದುವೆ ನಂತರ ಬ್ಯಾಂಕ್‌ನಿಂದ ಸ್ವಲ್ಪ ಸಾಲ ಪಡೆದು 30X40 ಅಳತೆಯ ನಿವೇಶನ ಕೊಳ್ಳಿರಿ. ಹೀಗೆ ಸಾಲ ಪಡೆದರೆ, ₹ 10,000 ಆರ್‌.ಡಿ. ನಿಲ್ಲಿಸಿ. ಈ ಹಣ ಸಾಲಕ್ಕೆ ತುಂಬಿರಿ. ವೈವಾಹಿಕ ಜೀವನದ ಪ್ರಾರಂಭದಿಂದಲೇ ಆರ್ಥಿಕ ಶಿಸ್ತು ಅಳವಡಿಸಿಕೊಂಡಲ್ಲಿ, ಉಳಿತಾಯದ ಗೀಳು, ಜೀವನದ ಅವಿಭಾಜ್ಯ ಅಂಗವಾಗುತ್ತದೆ. ಇದರಿಂದ ಬೇಡವಾದ ಖರ್ಚಿಗೆ ಕಡಿವಾಣ ಬೀಳುವುದಲ್ಲದೆ, ಆರೋಗ್ಯವಾಗಿ ನೆಮ್ಮದಿಯಾಗಿ ಬಾಳಬಹುದು. ಸಂತೃಪ್ತ ಜೀವನಕ್ಕೆ ಸರಿಯಾದ ಪ್ಲ್ಯಾನಿಂಗ್‌ ಅವಶ್ಯಕತೆ ಇದೆ. ಬರೀ ಪ್ಲ್ಯಾನಿಂಗ್‌ ಮಾಡಿದರೆ ಸಾಲದು, ಅದರಂತೆ  ನಡೆದುಕೊಳ್ಳಬೇಕು. ನಿಮ್ಮ ಮುಂದಿನ ಜೀವನ ಸುಖ ಸಂತೋಷ, ಸಮೃದ್ಧಿಯಿಂದ ಕೂಡಿರಲಿ.

 

**

–ಬಿ.ವಿ. ರಮಾನಾಥ್‌, ಬೆಂಗಳೂರು

* ನನ್ನ ಮಗಳು ಅಮೆರಿಕದಲ್ಲಿ ಕೆಲಸ ಮಾಡುತ್ತಾಳೆ. ಬೆಂಗಳೂರಿನಲ್ಲಿ ಅವಳು ಒಂದು ಸಾಮಾನ್ಯ ಉಳಿತಾಯ ಖಾತೆ  ಹೊಂದಿದ್ದಾಳೆ. ತಿಂಗಳಿಗೆ ₹ 30,000 ಕಳಿಸುತ್ತಾಳೆ. ನನಗೆ ಹಣ ಪಡೆಯಲು ಜಿಪಿಎ ಕೊಟ್ಟಿದ್ದಾಳೆ. ಈ ಹಣಕ್ಕೆ ತೆರಿಗೆ ವಿನಾಯತಿ ಇದೆಯೇ, ನಾನು ತೆರಿಗೆ ರಿಟರ್ನ್‌ ತುಂಬಬೇಕೇ?  

ಉತ್ತರ: ನಿಮ್ಮ ಮಗಳು NRE-SB A/C ಭಾರತದಲ್ಲಿ ಪ್ರಾರಂಭಿಸಿ, ಅಮೆರಿಕದಿಂದ ಎಷ್ಟು ಬೇಕಾದರೂ, ಆ ಖಾತೆಗೆ ಹಣ ಕಳಿಸಬಹುದು. ಈ ವ್ಯವಹಾರಕ್ಕೆ ಆದಾಯ ತೆರಿಗೆ ಸಂಪೂರ್ಣ ವಿನಾಯ್ತಿ ಇದೆ. ನಿಮಗೆ ಹಣ ತೆಗೆಯಲು ಬ್ಯಾಂಕಿಗೆ ನಿಮ್ಮ ಮಗಳು * etter of authority ಕೊಟ್ಟರೆ ನಿಮಗೆ ತೆರಿಗೆ ಬರುವುದಿಲ್ಲ ಹಾಗೂ ನೀವೂ ತೆರಿಗೆ ಕೊಡುವ ಅವಶ್ಯವಿಲ್ಲ ಮತ್ತು ರಿಟರ್ನ್ಸ್‌ ತುಂಬುವ ಅವಶ್ಯಕತೆಯೂ ಇಲ್ಲ.

 

**

–ಹೆಸರು: ಊರು, ಬೇಡ

* ಸೀನಿಯರ್ ಸಿಟಿಜನ್ ಸೇವಿಂಗ್ಸ್ ಸ್ಕೀಮಿನಲ್ಲಿ ನನ್ನ ಹೆಂಡತಿ ಹೆಸರಿನಲ್ಲಿ ಡಿಪಾಸಿಟ್ ಇಟ್ಟಿರುತ್ತೇನೆ. ಇದರ ಬಡ್ಡಿ ನನ್ನ ಖಾತೆಗೆ ಸಂದಾಯವಾಗುತ್ತದೆ. Gift deed Registration ಅಗತ್ಯವಿದೆಯೇ? ಇದ್ದರೆ ಅನುಸರಿಸಬೇಕಾದ ನಿಯಮಗಳೇನು ದಯಮಾಡಿ ತಿಳಿಸಿ.

ಉತ್ತರ: ನೀವಿರಿಸಿದ ಠೇವಣಿಯ ಮೇಲೆ ಬರುವ ಬಡ್ಡಿಯ ಮೊತ್ತ ತಿಳಿಸಿಲ್ಲ. ತಾ. 31–3–2017ರ ತನಕ ₹ 3 ಲಕ್ಷ ವಾರ್ಷಿಕ ಬಡ್ಡಿ ಬಂದು, ಬೇರಾವ ಆದಾಯವಿಲ್ಲದಿರುವಲ್ಲಿ ಆದಾಯ ತೆರಿಗೆಯ ಪ್ರಶ್ನೆಯೇ ಉದ್ಭವಿಸುವುದಿಲ್ಲ. ನಿಮ್ಮ ಹೆಂಡತಿಯ ಠೇವಣಿಯ ಮೇಲಿನ ಬಡ್ಡಿ ನಿಮ್ಮ ಖಾತೆಗೆ ಜಮಾ ಆಗುವಲ್ಲಿ, ಈ ಹಣ ನಿಮ್ಮ ವಾರ್ಷಿಕ ಆದಾಯಕ್ಕೆ ಸೇರಿಸಬೇಕಾಗುತ್ತದೆ. ಅವರ ಹೆಸರಿನಲ್ಲಿಯೇ ಉಳಿತಾಯ ಖಾತೆ ತೆರೆದು ಬಡ್ಡಿ ಜಮಾ ಮಾಡುವುದೇ ಲೇಸು. ಅಲ್ಲಿಂದ ಯಾವಾಗ ಬೇಕಾದರೂ ಹಣ ಪಡೆದು ಖರ್ಚಿಗೆ ವಿನಿಯೋಗಿಸಿ. ಗಿಫ್ಟ್‌ ಡೀಡ್ ನೊಂದಾಯಿಸುವ ಅಗತ್ಯವಿದೆ. ಗಿಫ್ಟ್‌ಡೀಡ್ ಸಬ್‌ರಿಜಸ್ಟ್ರಾರ್ ಆಫೀಸಿನಲ್ಲಿ  ನೋಂದಾಯಿಸಬಹುದು.

 

**

–ರವಿಬಾಸ್ ನಾಯಕ್, ಕಾರವಾರ

* ನಾನು ಅತಿಥಿ ಉಪನ್ಯಾಸಕ. ಸೇವಾ ಭದ್ರತೆ ಇಲ್ಲ. ವಾರ್ಷಿಕ ಸಂಬಳ ₹ 1 ಲಕ್ಷ. ಮದುವೆ ಆಗಿ ಇಬ್ಬರು ಮಕ್ಕಳು. ವಾರ್ಷಿಕ ಎಲ್.ಐ.ಸಿ. ₹ 10,000, ಆರ್.ಡಿ. ₹ 15600 (ತಿಂಗಳಿಗೆ ₹ 1300) ಕಟ್ಟುತ್ತೇನೆ. ವಾರ್ಷಿಕ ಖರ್ಚು ₹ 60,000. ಇನ್ನು ವಾರ್ಷಿಕ ₹ 20000 ಉಳಿಸ ಬೇಕೆಂದಿದ್ದೇನೆ. ಸಲಹೆ ನೀಡಿ.

ಉತ್ತರ: ನೀವು ವಾರ್ಷಿಕವಾಗಿ ಉಳಿಸಬಹುದಾದ ₹ 20,000 ವರ್ಷಾಂತ್ಯಕ್ಕೆ, 5 ವರ್ಷಗಳ ಒಮ್ಮೆಲೇ ಬಡ್ಡಿ ಬರುವ ಬ್ಯಾಂಕ್ ಠೇವಣಿಯಲ್ಲಿ ಇರಿಸಿರಿ. ಹೀಗೆ ಮಾಡುವಾಗ, ವರ್ಷದ ಪ್ರಾರಂಭದಲ್ಲಿ ₹ 1800. ಒಂದು ವರ್ಷದ ಆರ್.ಡಿ. ಪ್ರಾರಂಭಿಸಿ. ಇದರಿಂದ ಬರುವ ಹಣ ವರ್ಷಾಂತ್ಯಕ್ಕೆ ಅವಧಿ ಠೇವಣಿ ಮಾಡಿರಿ. 

 

ಈ ಪ್ರಕ್ರಿಯೆ ಪ್ರತೀವರ್ಷ ಮುಂದುವರಿಯಲಿ. ನಿಮ್ಮ ಆದಾಯ ಬಹಳ ಕಡಿಮೆ ಇದ್ದರೂ, ಬಿಡುವಿನ ವೇಳೆಯಲ್ಲಿ, ನೀವು ಎಲ್.ಐ.ಸಿ. ಏಜೆನ್ಸಿ ಪಡೆದು, ಹೆಚ್ಚಿನ ಆದಾಯ ಗಳಿಸಬಹುದು. ಪ್ರಾರಂಭದಲ್ಲಿ ಸ್ವಲ್ಪ ಅಡೆತಡೆಗಳು ಬಂದರೂ, ಧೈರ್ಯಗೆಡದೆ ಈ ವೃತ್ತಿ ಮುಂದುವರಿಸಿ. ಈ ಏಜೆನ್ಸಿ ಪಡೆಯಲು Insurance Institute Of India ದವರು ನಡೆಸುವ On * ine ಪರೀಕ್ಷೆ ಪಾಸು ಮಾಡಬೇಕು. ಇದು ಬಹು ಸುಲಭ.

 

ಹೆಚ್ಚಿನ ಮಾಹಿತಿಗೆ ಸಮೀಪದ ಎಲ್.ಐ.ಸಿ. ಆಫೀಸಿಗೆ ಭೇಟಿ ನೀಡಿ. ನಿಮಗೆ ಉಜ್ವಲ ಭವಿಷ್ಯಕ್ಕೆ ಹಾರೈಸುತ್ತೇನೆ.

 

**

–ಶಿವಾನಂದ, ಊರು ಬೇಡ

* ನಾನು ಎಚ್.ಡಿ.ಎಫ್.ಸಿ. ಬ್ಯಾಂಕಿನಿಂದ ₹ 15.50 ಲಕ್ಷ ಗೃಹಸಾಲ ಪಡೆದಿದ್ದೇನೆ. ಸಾಲದ ಬಡ್ಡಿ ದರ ಶೇ 9.45 ಬದಲಾಗುವ ಬಡ್ಡಿ ದರದಲ್ಲಿ ಸಾಲ ಪಡೆದದ್ದರಿಂದ ಈಗ ಬಡ್ಡಿ ದರ ಶೇ 8.7 ಕ್ಕೆ ಇಳಿದಿರುತ್ತದೆ. ಹೀಗೆ ಬದಲಾಯಿಸಿ ಕೊಳ್ಳುವಾಗ ಬ್ಯಾಂಕಿಗೆ ಏನಾದರೂ ಹಣ ತುಂಬಬೇಕೇ? ತುಂಬಬೇಕಾದಲ್ಲಿ ಎಷ್ಟು ಹಣ ತುಂಬ ಬೇಕು. ದಯಮಾಡಿ ತಿಳಿಸಿ.

ಉತ್ತರ: ಬದಲಾಗುವ ಬಡ್ಡಿದರ, ಗೃಹಸಾಲದಲ್ಲಿ ವಿಧಿಸುವಾಗ, ಕಾಲ ಕಾಲಕ್ಕೆ ಬಡ್ಡಿದರದಲ್ಲಿ ಹೆಚ್ಚಳ ಅಥವಾ ಕಡಿಮೆ ಆಗುವ ಸಂದರ್ಭದಲ್ಲಿ, ಗ್ರಾಹಕರು ಈ ಸೇವೆಗೆ ಹೆಚ್ಚಿನ ಹಣ ತೆರವ ಅವಶ್ಯವಿಲ್ಲ ಹಾಗೂ ಬ್ಯಾಂಕಿಗೆ ತಿಳಿಸುವ ಅವಶ್ಯವೂ ಇಲ್ಲ. ಕಾಲ ಕಾಲಕ್ಕೆ ಬದಲಾಗುವ ಬಡ್ಡಿದರ, ತಾನಾಗಿ ಆಗುತ್ತಿರುತ್ತದೆ.