ಕುಡಿಯುವ ನೀರಿನ ಸಮಸ್ಯೆ: ಸದನದಲ್ಲಿ ಸಂಕನೂರ ಪ್ರಶ್ನೆ

ಕೊಳವೆ ಬಾವಿಗಳಿಂದ ನೀರೆತ್ತಿ, ಸಂಗ್ರಹಿಸಿ ನಂತರ ವಾರ್ಡುಗಳಿಗೆ 10ರಿಂದ 12 ದಿನಕ್ಕೊಮ್ಮೆ ಪೂರೈಸಲಾಗುತ್ತದೆ. ಅಲ್ಲದೆ, 10 ಟ್ಯಾಂಕರ್‌  ಮೂಲಕವೂ ಅವಶ್ಯಕತೆ ಅನುಗುಣವಾಗಿ ಎಲ್ಲಾ 23 ವಾರ್ಡುಗಳಿಗೆ ಪ್ರತಿನಿತ್ಯ 45ರಿಂದ 50 ಟ್ಯಾಂಕರಗಳಷ್ಟು ನೀರು ಪೂರೈಸಲಾಗುತ್ತಿದೆ ಎಂದು ಅವರು ಉತ್ತರ ನೀಡಿದ್ದಾರೆ ಎಂದು ಸಂಕನೂರ ಅವರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ. 

ನಗರಾಭಿವೃದ್ಧಿ ಇಲಾಖೆಯಿಂದ ಕುಡಿಯುವ ನೀರಿನ ಸಮಸ್ಯೆ ಪರಿಹರಿಸಲು ಬಿಡುಗಡೆಯಾದ ಅನುದಾನದಲ್ಲಿ ಎಸ್.ಎಫ್.ಸಿ. ಹಾಗೂ 14ನೇ ಹಣಕಾಸು ಯೋಜನೆಯಡಿಯಲ್ಲಿ ಕುಡಿಯುವ ನೀರು ಸರಬರಾಜು ಕುರಿತು ಕ್ರಿಯಾ ಯೋಜನೆಯನ್ನು ತಯಾರಿಸಿ ಅನುಮೋದನೆ ನೀಡಲಾಗಿದೆ ಎಂದು ಅವರು ಉತ್ತರದಲ್ಲಿ ವಿವರಿಸಿದ್ದಾರೆ.

14ನೇ ಹಣಕಾಸು ಯೋಜನೆಯ ಸಾಮಾನ್ಯ ಮೂಲ ಅನುದಾನದಲ್ಲಿ  ಕೊರೆಯಿಸಲಾದ ಬೋರವೆಲ್ ಮೂಲಕ ಪಟ್ಟಣಕ್ಕೆ ನೀರು ಸರಬರಾಜು ಮಾಡಲು ₹ 23.80 ಲಕ್ಷಗಳಲ್ಲಿ ಪೈಪ್‌ಲೈನ ಕಾಮಗಾರಿಗೆ ಮಂಜೂರಾತಿ ನೀಡಿದ್ದು ಕಾಮಗಾರಿ ಸದ್ಯದಲ್ಲಿಯೇ ಪ್ರಾರಂಭಿಸಲಾಗುವುದು ಹಾಗೂ ಪ್ರಸಕ್ತ ಸಾಲಿನ 14ನೇ ಹಣಕಾಸು ಸಾಮಾನ್ಯ ಮೂಲ ನಿಧಿಯ ಮೂಲಕ ₹ 30.04 ಲಕ್ಷಗಳಲ್ಲಿ 3 ಶುದ್ದ ಕುಡಿಯುವ ನೀರಿನ ಘಟಕ ಸಹ ಅಳವಡಿಸಲಾಗುವುದು ಎಂದು ಖಂಡ್ರೆ  ಹೇಳಿದ್ದಾರೆ.

ರೋಣ ಪಟ್ಟಣದಲ್ಲಿ ಪುರಸಭೆಯಿಂದ ಕುಡಿಯುವ ನೀರಿನ ಪೂರೈಕೆಯಲ್ಲಿ ಸಮಸ್ಯೆ ಆಗುತ್ತಿರುವ ವಿಷಯದ ಕುರಿತು ಸಂಕನೂರ ಅವರು ಕೇಳಿದ ಪ್ರಶ್ನೆಗೆ ಸಚಿವರು,  ರೋಣ ಪಟ್ಟಣದಲ್ಲಿ ಸದ್ಯ 40 ಬೋರ್‌ವೆಲ್‌ಗಳಿಂದ ಹಾಗೂ ಈಗಾಗಲೇ ಮಲಪ್ರಭಾ ನದಿಗೆ ನೀರು ಬಿಡುಗಡೆ ಆಗಿರುವುದರಿಂದ  ಚೊಳಚ ಗುಡ್ಡದಲ್ಲಿರುವ ಜಾಕ್‍ವೆಲ್ ಮೂಲಕ ನೀರನ್ನು ಪಂಪ್ ಮಾಡಿ ಸದ್ಯ 15 ದಿನಗಳಿಂದ ನೀರು ಪೂರೈಕೆ ಆಗುತ್ತಿದ್ದು, 3 ದಿನಗಳಿಗೊಮ್ಮೆ ಪಟ್ಟಣದಲ್ಲಿ ಕುಡಿಯುವ ನೀರನ್ನು ಪೂರೈಸಲಾಗುತ್ತಿದೆ. ಮೇ ತಿಂಗಳ ಅಂತ್ಯದವರೆಗೆ ರೋಣ ಪಟ್ಟಣಕ್ಕೆ ಯಾವುದೇ ತೊಂದರೆ ಇರುವುದಿಲ್ಲ ಎಂದು ತಿಳಿಸಿರುವುದಾಗಿ ಸಂಕನೂರ ಹೇಳಿದ್ದಾರೆ.