ನೀರು ಕೊಡಿ; ತ್ಯಾಜ್ಯ ವಿಲೇವಾರಿ ಕೈಗೊಳ್ಳಿ

ರಾಯಚೂರು: ಸಮರ್ಪಕ ಕುಡಿಯುವ ನೀರು, ವಿದ್ಯುತ್‌ ಕೊಡಿ, ಒಳಚರಂಡಿ ವ್ಯವಸ್ಥೆ ಸರಿಪಡಿಸಿ ಹಾಗೂ ಸರಿಯಾಗಿ ತ್ಯಾಜ್ಯ ವಿಲೇವಾರಿ ಮಾಡಿಸುವಂತೆ ನಗರದ ಜನರು ಒತ್ತಾಯಿಸುತ್ತಿದ್ದಾರೆ. ಇಷ್ಟನ್ನೂ ಮಾಡಿಕೊಡದಿದ್ದರೆ ವಾರ್ಡ್‌ನಲ್ಲಿ ಜನರು ಬೆನ್ನುಬಿದ್ದು ಹೊಡೆಯುತ್ತಾರೆ ಎಂದು ನಗರಸಭೆ ಸದಸ್ಯರು ಏರುದನಿಯಲ್ಲಿ ಸಮಸ್ಯೆಗಳನ್ನು ಪ್ರಸ್ತಾಪಿಸಿದರು.

ಇಲ್ಲಿನ ನಗರ ಸಭೆಯ ನೂತನ ಸಭಾಂಗಣದಲ್ಲಿ ಪಿ.ಹೇಮಲತಾ ಅವರ ಅಧ್ಯಕ್ಷತೆಯಲ್ಲಿ ಗುರುವಾರ ಸಾಮಾನ್ಯ ಸಭೆ ನಡೆಯಿತು. ನೀರು ಬಿಡುವುದಕ್ಕೆ ಸಮಯವೇ ಇಲ್ಲ. ಮೂರು ದಿನಕ್ಕೊಮ್ಮೆ ರಾತ್ರಿ ಕೂಡಾ ನೀರು ಬಿಡುತ್ತಾರೆ. ಇದರಿಂದ ಕೂಲಿಕಾರರು ತೊಂದರೆ ಅನುಭವಿಸುತ್ತಿದ್ದಾರೆ.

ನಗರದಲ್ಲಿ ಅಕಾಲಿಕ ಮಳೆಯಿಂದ ಅಲ್ಲಲ್ಲಿ ನೀರು ನಿಂತುಕೊಂಡು ಸಮಸ್ಯೆಯಾಗಿತ್ತು. ರಾಜಕಾಲುವೆಯನ್ನು ಆದಷ್ಟು ಬೇಗನೆ ಸರಿಪಡಿಸುವ ಕೆಲಸ ಮಾಡಬೇಕು ಎಂದು ಸದಸ್ಯ ದೊಡ್ಡ ಮಲ್ಲೇಶಪ್ಪ ಅಧಿಕಾರಿಗಳನ್ನು ಸಭೆ ಆರಂಭದಲ್ಲೆ ತರಾಟೆಗೆ ತೆಗೆದುಕೊಂಡರು.

ಇದಕ್ಕೆ ದನಿಗೂಡಿಸಿ ಅನೇಕ ಸದಸ್ಯರು ಸಮಸ್ಯೆಗಳನ್ನು ಪ್ರಸ್ತಾಪಿಸಿದರು. ತ್ಯಾಜ್ಯ ವಿಲೇವಾರಿ ಮಾಡುವ ವಾಹನಗಳಿಗೆ ಇಂಧನ ಹಾಕಿಸುವುದಿಲ್ಲ. ಅಸಮರ್ಪಕ ತ್ಯಾಜ್ಯ ವಿಲೇವಾರಿಯಿಂದ ಸೊಳ್ಳೆಗಳು ಹೆಚ್ಚಾಗಿ, ಡೆಂಗೆ ಜ್ವರಕ್ಕೆ ಜನರು ತುತ್ತಾಗುತ್ತಿದ್ದಾರೆ. ಒಳಚರಂಡಿ ವ್ಯವಸ್ಥೆ ಸಂಪೂರ್ಣ ಹಾಳಾಗಿದೆ.

ಬಾರ್‌ಗಳಿಂದ ತ್ಯಾಜ್ಯ ಸಂಗ್ರಹಿಸುತ್ತಿಲ್ಲ. ಟೆಂಡರ್‌ಗಳನ್ನು ಶೇ 30 ರಷ್ಟು ಕಡಿಮೆಗೆ ಪಡೆದುಕೊಳ್ಳುವ ಗುತ್ತಿಗೆದಾರರು ಕಳಪೆ ಕಾಮಗಾರಿ ಮಾಡುತ್ತಿದ್ದಾರೆ ಎಂದು ಹೇಳಿದರು.

ರಾಯಚೂರು ನಗರ ಅಭಿವೃದ್ಧಿಗಾಗಿ ಕೋಟ್ಯಾಂತರ ಅನುದಾನ ಬಂದಿದ್ದರೂ ಕಾಮಗಾರಿಗಳು ಗುಣಮಟ್ಟದ್ದಾಗುತ್ತಿಲ್ಲ. ಕಳಪೆ ಕಾಮಗಾರಿ ಮಾಡುವ ಗುತ್ತಿಗೆದಾರರನ್ನು ಕಪ್ಪು ಪಟ್ಟಿಗೆ ಸೇರಿಸುವ ಕೆಲಸವಾಗಬೇಕು. ಈ ರೀತಿಯ ಟೆಂಡರ್‌ಗೆ ಕಡಿವಾಣ ಹಾಕುವ ಕೆಲಸವಾಗಬೇಕಿದೆ.

ಕಲ್ಲೂರು ಕಾಲೋನಿಯಲ್ಲಿ ರಸ್ತೆ ಕಾಮಗಾರಿ ಸರಿಯಾಗಿ ಮಾಡಿಲ್ಲ. ಹಂದಿ, ನಾಯಿಗಳ ಹಾವಳಿ ವಿಪರೀತವಾಗಿದೆ ಎಂದು ನಿಖಾತ್‌ ಸಲ್ಮಾ, ಈರಣ್ಣಗೌಡ, ಶ್ರೀನಿವಾಸರೆಡ್ಡಿ ಸೇರಿದಂತೆ ಅನೇಕರು ಸಮಸ್ಯೆಗಳನ್ನು ಹೇಳಿಕೊಂಡರು.

24/7 ನೀರು ಪೂರೈಸಲು ಪೈಪ್‌ಲೈನ್‌ ಹಾಕುವುದಕ್ಕೆ ರಸ್ತೆಗಳನ್ನು ತುಂಬಾ ಹಾಳು ಮಾಡಲಾಗುತ್ತಿದೆ. ಅಗೆದ ರಸ್ತೆಗಳನ್ನು ಸಮರ್ಪಕವಾಗಿ ಮುಚ್ಚುತ್ತಿಲ್ಲ. ಹೀಗಾಗಿ ದೂಳಿನ ವಾತಾವರಣ ಹೆಚ್ಚಾಗಿದೆ. ಕೂಡಲೇ ಅವರಿಂದ ರಸ್ತೆ ದುರಸ್ತಿಗೆ ಕ್ರಮ ಕೈಗೊಳ್ಳಬೇಕು ಎಂದು ಸದಸ್ಯರು ಒತ್ತಾಯಿಸಿದರು.

ಸಮಯಾವಕಾಶ ಕೊಡಿ: ರಾಜಕಾಲುವೆಗೆ ಸಂಬಂಧಿಸಿದ ಟೆಂಡರ್ ಬಗ್ಗೆ ಕೆಲವು ಆಕ್ಷೇಪಣೆಗಳಿದ್ದವು. ಈಗ ಸರಿಪಡಿಸಲಾಗಿದೆ. ಬೇಸಿಗೆಯಲ್ಲಿ ಕಾಮಗಾರಿ ಪೂರ್ಣಗೊಳಿಸಲಾಗುವುದು. ಸಮಯಾವಕಾಶ ಕೊಡಬೇಕು ಎಂದು ಪೌರಾಯುಕ್ತ ಗುರುಲಿಂಗಪ್ಪ ಕೇಳಿಕೊಂಡರು.

ಈಗಿರುವ ನಿಯಮಾನುಸಾರ ಕಡಿಮೆ ಮೊತ್ತ ಉಲ್ಲೇಖಿಸುವವರಿಗೆ ಟೆಂಡರ್‌ ಕೊಡಲಾಗುತ್ತಿದೆ. ಸಾಮಾನ್ಯ ಸಭೆಯಲ್ಲಿ ಕೈಗೊಂಡ ತೀರ್ಮಾನವನ್ನು ಸರ್ಕಾರದ ಗಮನಕ್ಕೆ ತರಲಾಗುವುದು ಎಂದು ಹೇಳಿದರು.

ಆಯಾ ವಾರ್ಡ್‌ಗಳಲ್ಲಿ ಕಾಮಗಾರಿಗಳು ನಡೆಯುತ್ತಿರುವಾಗ ವಾರ್ಡ್‌ ಸದಸ್ಯರು ಪರಿವೀಕ್ಷಣೆ ಮಾಡಬೇಕು. ಕಳಪೆ ಕಾಮಗಾರಿಗಳಿದ್ದರೆ ಗಮನಕ್ಕೆ ತರಬೇಕು. ತ್ಯಾಜ್ಯ ವಿಲೇವಾರಿ ಎಂದಿನಂತೆ ನಡೆಯುತ್ತಿದೆ. ಫಾಗಿಂಗ್‌ ಮಾಡಿಸಿ ಸೊಳ್ಳೆಗಳನ್ನು ನಿಯಂತ್ರಿಸಲಾಗುತ್ತಿದೆ. ಏಪ್ರಿಲ್‌ ಒಳಗಾಗಿ ಒಳಚರಂಡಿ ಕೆಲಸ ಪೂರ್ಣ ಗೊಳಿಸುತ್ತೇವೆ ಎಂದು ಅವರು ತಿಳಿಸಿದರು.