ರಜೆಯು ಬಂದಿದೆ ಮಜವ ತಂದಿದೆ
ಎಲ್ಲರು ಕಲೆತು ಸೇರೋಣ
ನಡೆಯಿರಿ ನಡೆಯಿರಿ ಹೊರಡೋಣ
ಅಜ್ಜನಮನೆಗೆ ನಡೆಯೋಣ
ಬಸ್ಸಲಿ ಕುಳಿತು ಓಡುವ ಮರಗಳ
ಕಣ್ಣುಗಳರಳಿಸಿ ನೋಡೋಣ
ಕಾಲು ಹಾದಿಯಲಿ ಜಿಗಿಜಿಗಿದೋಡುತ
ಖುಷಿಯಲಿ ಮನೆಯ ಸೇರೋಣ
ಕಾಡನು ಅಲೆದು ಹೊಳೆಯಲಿ ಮಿಂದು
ಮರಳಿನ ಮನೆಗಳ ಕಟ್ಟೋಣ
ಕಪ್ಪೆ ಚಿಪ್ಪು ಬಣ್ಣದ ಕಲ್ಲುಗಳ
ಹೆಕ್ಕುತ ಹಿರಿಹಿರಿ ಹಿಗ್ಗೋಣ
ಅಜ್ಜಿಯ ಕೈರುಚಿ ಅಜ್ಜನ ಕಥೆಗಳ
ಹೂಂ ಹೂಂ ಎನ್ನುತ ಕೇಳೋಣ
ಕೈ ಬರಹಗಳ ಬಾಯಿಪಾಠಗಳ
ಮರೆಯದೆ ಮೆಲುಕನು ಹಾಕೋಣ
ಮರ ಮರದಲಿ ಜೋಕಾಲಿಯ ಕಟ್ಟುತ
ಜೀಕುತ ದೂರಕೆ ಸಾಗೋಣ
ಬಿಸಿಲಿನ ನಗರವ ಸ್ವಲ್ಪ ಮರೆಯುತ
ಹಳ್ಳಿಯ ತಂಪಲಿ ಆಡೋಣ
-ಗಾಯತ್ರೀ ರಾಘವೇಂದ್ರ, ಶಿರಸಿ
