ಉಳಿತಾಯ ಖಾತೆಗಳಲ್ಲಿ ಕನಿಷ್ಠ ಮೊತ್ತ ಪರಾಮರ್ಶೆಗೆ ಎಸ್‍ಬಿಐ ನಿರ್ಧಾರ

ಮಹಾನಗರಗಳಲ್ಲಿ ಖಾತೆ ಹೊಂದಿರುವ ಗ್ರಾಹಕರು ತಮ್ಮ ಉಳಿತಾಯ ಖಾತೆಯಲ್ಲಿ ಕನಿಷ್ಠ ಮೊತ್ತ ₹3,000 ಉಳಿಸಿಕೊಳ್ಳಬೇಕಿದೆ.
ಜೂನ್ ತಿಂಗಳಲ್ಲಿ  ಖಾತೆಯಲ್ಲಿ ಕಾಯ್ದುಕೊಳ್ಳಬೇಕಾದ ತಿಂಗಳ ಸರಾಸರಿ ಮೊತ್ತ (ಎಂಎಬಿ)ಯನ್ನು ಎಸ್‌ಬಿಐ ₹5000ಕ್ಕೆ ನಿಗದಿಪಡಿಸಿತ್ತು. ಆದರೆ ಇದಕ್ಕೆ ಜನರಿಂದ ಆಕ್ರೋಶ ವ್ಯಕ್ತವಾದ ಹಿನ್ನೆಲೆಯಲ್ಲಿ ಮೆಟ್ರೊ ನಗರಗಳಲ್ಲಿ ಕನಿಷ್ಠ ಮೊತ್ತ  ₹3,000, ಉಪ ನಗರಗಳಲ್ಲಿ ₹2,000 ಮತ್ತು ಗ್ರಾಮ ಪ್ರದೇಶಗಳಲ್ಲಿ ₹1,000 ನಿಗದಿ ಪಡಿಸಿತ್ತು.

ಆದಾಗ್ಯೂ, ತಿಂಗಳ ಸರಾಸರಿ ಮೊತ್ತ (ಎಂಎಬಿ)ವನ್ನು ತ್ರೈಮಾಸಿಕ ಸರಾಸರಿ ಮೊತ್ತವನ್ನಾಗಿ ಬದಲಿಸುವ ಬಗ್ಗೆಯೂ ಎಸ್‍ಬಿಐ ಚಿಂತನೆ ನಡೆಸಿದೆ. ಉಳಿತಾಯ ಖಾತೆಗಳಲ್ಲಿ ಕನಿಷ್ಠ  ಮೊತ್ತ ಕಾಯ್ದುಕೊಳ್ಳಲು ವಿಫಲರಾದ ಖಾತೆದಾರರಿಂದ ಎಸ್‍ಬಿಐ ವಸೂಲಿ ಮಾಡಿದ ದಂಡ ₹1.771 ಕೋಟಿ ಎಂದು ಕೆಲವು ದಿನಗಳ ಹಿಂದೆಯಷ್ಟೇ ವಿತ್ತ ಸಚಿವಾಲಯ ವರದಿ ಪ್ರಕಟಿಸಿತ್ತು.  ಜುಲೈ- ಸಪ್ಟೆಂಬರ್ ತ್ರೈಮಾಸಿಕದಲ್ಲಿ ಎಸ್‍ಬಿಐಯ ಆದಾಯಕ್ಕಿಂತ ಹೆಚ್ಚಿನ ಮೊತ್ತ ದಂಡ ವಸೂಲಿಯಿಂದ ಲಭಿಸಿದೆ. ಏಪ್ರಿಲ್ - ಸಪ್ಟೆಂಬರ್ ಅವಧಿಯಲ್ಲಿ ಬ್ಯಾಂಕ್‍ನ ಲಾಭದ ಮೊತ್ತವಾದ ₹3,586 ಕೋಟಿಯ ಅರ್ಧದಷ್ಟು ಮೊತ್ತ ದಂಡ ವಸೂಲಿಯಿಂದಲೇ ಸಿಕ್ಕಿದೆ.

ಮೂಲಗಳ ಪ್ರಕಾರ ಖಾತೆಗಳಲ್ಲಿ ಕನಿಷ್ಠ ಮೊತ್ತ ₹1000 ಮಾಡುವ ಬಗ್ಗೆ ಎಸ್‍ಬಿಐ ಚಿಂತಿಸುತ್ತಿದ್ದು, ಈ ಬಗ್ಗೆ ನಿರ್ಧಾರ ತೆಗೆದುಕೊಂಡಿಲ್ಲ.

[related]

ನೀವು ಎಸ್‍ಬಿಐ ಗ್ರಾಹಕರಾಗಿದ್ದರೆ ಅರಿತುಕೊಳ್ಳಬೇಕಾದ ಸಂಗತಿಗಳಿವು

*ನಿಮ್ಮ ಉಳಿತಾಯ ಖಾತೆಯಲ್ಲಿ ಕನಿಷ್ಠ ಮೊತ್ತ ಎಷ್ಟಿರಬೇಕು?
ಮೆಟ್ರೊ ನಗರಗದಲ್ಲಾದರೆ ಕನಿಷ್ಠ ಮೊತ್ತ ₹5,000 ಇತ್ತು, ಆದರೆ ಸೆಪ್ಟೆಂಬರ್ ನಂತರ ಕನಿಷ್ಠ ಮೊತ್ತ ₹3,000ಕ್ಕೆ ಇಳಿಸಲಾಗಿದೆ. ನಗರದಲ್ಲಾದರೆ ₹3,000, ಉಪನಗರಗಳಲ್ಲಿ ₹2,000 ಮತ್ತು ಗ್ರಾಮ ಪ್ರದೇಶದಲ್ಲಿ ಖಾತೆ ಹೊಂದಿದವರು ಕನಿಷ್ಠ ಮೊತ್ತ ₹1000 ಕಾಯ್ದುಕೊಳ್ಳಬೇಕು. ಪಿಂಚಣಿದಾರರು, ಸರ್ಕಾರದಿಂದ ಸೌಲಭ್ಯ ಪಡೆಯುತ್ತಿರುವವರು, ಅಪ್ರಾಪ್ತರ ಖಾತೆಗಳಿಗೆ ಇದು ಅನ್ವಯವಾಗುವುದಿಲ್ಲ.

ಕನಿಷ್ಠ ಮೊತ್ತ ಕಾಯ್ದುಕೊಳ್ಳದೇ ಇದ್ದರೆ ಏನಾಗುತ್ತದೆ?
ಎಸ್‍ಬಿಐಯ ಪರಿಷ್ಕೃತ ಶುಲ್ಕ ಪ್ರಕಾರ, ಖಾತೆಯಲ್ಲಿ ಕನಿಷ್ಠ ಮೊತ್ತ ಕಾಯ್ದುಕೊಳ್ಳದ ಗ್ರಾಹಕರಿಗೆ ₹100 ದಂಡ +ಸೇವಾ ಶುಲ್ಕ ವಿಧಿಸಲಾಗುವುದು. ಮೆಟ್ರೊ ನಗರಗಳಲ್ಲಿ ಗ್ರಾಹಕರ ಖಾತೆಯಲ್ಲಿರುವ ಹಣ ಮೊತ್ತ ಕನಿಷ್ಠ ಮೊತ್ತಕ್ಕಿಂತ ಶೇ. 75ಕ್ಕಿಂತ ಕಡಿಮೆಯಾಗಿದ್ದರೆ ₹100 ದಂಡ+ ಸೇವಾ ಶುಲ್ಕ ವಿಧಿಸಲಾಗುತ್ತದೆ. ಅದೇ ವೇಳೆ ಶೇ.50 ಮತ್ತು ಅದಕ್ಕಿಂತ ಕಡಿಮೆ ಇದ್ದರೆ ₹50 ದಂಡ + ಸೇವಾ ಶುಲ್ಕ ವಿಧಿಸಲಾಗುವುದು. ಗ್ರಾಮ ಪ್ರದೇಶಗಳಲ್ಲಿ ₹20ರಿಂದ ₹50 ವರೆಗೆ ದಂಡ+ಸೇವಾ ಶುಲ್ಕ ವಿಧಿಸಲಾಗುವುದು.