ಮುಚ್ಚಿದ ಗೋಶಾಲೆ: ರೈತರ ಧರಣಿ

ಒಂದು ವಾರದಿಂದ ಈಚೆಗೆ ತಾಲ್ಲೂಕಿನಲ್ಲಿ ಮಳೆಯಾಗುತ್ತಿದೆ. ಮಳೆ ಬಿದ್ದಾಕ್ಷಣ ಮೇವು ಸಿಗದು. ಯಾವ ಹಳ್ಳಿಯಲ್ಲೂ ಹಳೆಯ ಮೇವು ಇಲ್ಲ. ಹಸಿ ಮೇವು ಸಿಗುತ್ತಿಲ್ಲ. ಇಂಥ ಸಂದರ್ಭದಲ್ಲಿ ಜಾನುವಾರು ಸಾಕುವುದು ಸವಾಲಾಗಿದೆ. ಜಿಲ್ಲಾಡಳಿತ ಏಕಾಏಕಿ ಗೋಶಾಲೆ ಬಂದ್ ಮಾಡಿರುವುದು ರೈತರನ್ನು ಕಂಗೆಡಿಸಿದೆ ಎಂದು ಧರಣಿ ನಿರತ ರೈತರು ಆರೋಪಿಸಿದರು.

ಜಿಲ್ಲಾಡಳಿತ ಇನ್ನೂ 15–20ದಿನ ಗೋಶಾಲೆ ಮುಂದುವರಿಸಬೇಕು. ಮಳೆ ಮುಂದುವರಿದಲ್ಲಿ ನಾವೇ ಜಾನುವಾರುಗಳನ್ನು ಊರಿಗೆ ಒಯ್ಯುತ್ತೇವೆ. ಇಲ್ಲವಾದಲ್ಲಿ ಉಗ್ರ ಹೋರಾಟ ನಡೆಸಬೇಕಾಗುತ್ತದೆ ಎಂದು ರೈತ ಮುಖಂಡರಾದ ತಿಮ್ಮರಾಯಪ್ಪ, ರಂಗಸ್ವಾಮಿ, ಶಾಂತಕುಮಾರ್, ಹರೀಶ್, ಶಿವಲಿಂಗಪ್ಪ, ಮನೋಹರ್, ಮಂಜುನಾಥ್, ಪಾರ್ಥ, ರಾಜಣ್ಣ, ಚಿಕ್ಕಣ್ಣ ಎಚ್ಚರಿಸಿದರು.

ತಹಶೀಲ್ದಾರರ ಸ್ಪಷ್ಟನೆ: ಜಿಲ್ಲೆಯಲ್ಲಿ ಉತ್ತಮ ಮಳೆಯಾಗಿರುವ ಕಾರಣ ಜಿಲ್ಲಾಧಿಕಾರಿ ಮತ್ತು ಉಪ ವಿಭಾಗಾಧಿಕಾರಿಗಳ ಆದೇಶದಂತೆ ಗೋ ಶಾಲೆ ಬಂದ್ ಮಾಡಲಾಗಿದೆ. ತಾಲ್ಲೂಕಿನಲ್ಲಿ 6 ತಿಂಗಳ ಕಾಲ ಗೋ ಶಾಲೆ ತೆರೆದು ಜಾನುವಾರುಗಳಿಗೆ ಮೇವು ಪೂರೈಕೆ ಮಾಡಲಾಗಿದೆ ಎಂದು ತಹಶೀಲ್ದಾರ್ ಜೆ.ಸಿ.ವೆಂಕಟೇಶಯ್ಯ ಸುದ್ದಿಗಾರರಿಗೆ ತಿಳಿಸಿದರು.