ಕೇರಳ: ಇಂದಿನಿಂದ ಬಿಜೆಪಿಯ ಜನರಕ್ಷಾ ಯಾತ್ರೆ

ಕೇರಳ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್‌ ಅವರ ಹುಟ್ಟೂರಿನಿಂದಲೇ ಯಾತ್ರೆ ಆರಂಭವಾಗುತ್ತಿದೆ. 17ರಂದು ತಿರುವನಂತಪುರದಲ್ಲಿ ಸಮಾರೋಪ
ಗೊಳ್ಳಲಿದೆ ಎಂದು ಕೇಂದ್ರ ಸಚಿವ ಪ್ರಕಾಶ್‌ ಜಾವಡೇಕರ್‌ ತಿಳಿಸಿದ್ದಾರೆ.

ಕೇಂದ್ರದ ಹಿರಿಯ ಸಚಿವರಾದ ಅನಂತಕುಮಾರ್‌, ಸ್ಮೃತಿ ಇರಾನಿ, ಗಿರಿರಾಜ್‌ ಸಿಂಗ್‌, ವಿ.ಕೆ.ಸಿಂಗ್‌, ಪ್ರಕಾಶ್‌ ಜಾವಡೇಕರ್‌ ಮತ್ತು ಧರ್ಮೇಂದ್ರ ಪ್ರಧಾನ್‌ ಅವರು ಯಾತ್ರೆಯಲ್ಲಿ ಭಾಗವಹಿಸಲಿದ್ದಾರೆ.

ವಿಜಯನ್‌ ಮತ್ತು ಬಿಜೆಪಿ ಹಾಗೂ ಆರ್‌ಎಸ್‌ಎಸ್‌ ಮುಖಂಡರ ನಡುವೆ ವಾಗ್ಯುದ್ಧ ಇತ್ತೀಚಿನ ದಿನಗಳಲ್ಲಿ ಸಾಮಾನ್ಯ ವಾಗಿದೆ. ಆರ್‌ಎಸ್‌ಎಸ್‌ ಮುಖ್ಯಸ್ಥ ಮೋಹನ್‌ ಭಾಗವತ್‌ ಅವರು ವಿಜಯದಶಮಿ ದಿನ ನಾಗಪುರದಲ್ಲಿ ಮಾತನಾಡಿ ಕೇರಳ ಸರ್ಕಾರ ರಾಷ್ಟ್ರ ವಿರೋಧಿಗಳಿಗೆ ಬೆಂಬಲ ನೀಡುತ್ತಿದೆ ಎಂದು ಆರೋಪಿಸಿದ್ದರು. ಇದಕ್ಕೆ ತಿರುಗೇಟು ನೀಡಿದ್ದ ವಿಜಯನ್‌ ಅವರು, ಇದು ಜನರನ್ನು ಪರಸ್ಪರ ಎತ್ತಿಕಟ್ಟಲು ಸಂಘ ಪರಿವಾರ ಬಳಸುವ ಸಾಮಾನ್ಯ ತಂತ್ರ ಎಂದು ಹೇಳಿದ್ದಾರೆ. ‘ಯಾವುದೇ ಕೋಮುವಾದಿ, ರಾಷ್ಟ್ರವಿರೋಧಿ ಶಕ್ತಿಗಳು ಕೇರಳದ ಜನರನ್ನು ಕೆರಳಿಸಲು ಸಾಧ್ಯವಿಲ್ಲ. ಇಂತಹ ಸಂಘಟನೆಗಳನ್ನು ಕೇರಳ ಸಂಪೂರ್ಣವಾಗಿ ತಿರಸ್ಕರಿಸಿದೆ’ ಎಂದಿದ್ದರು.

‘ಹತಾಶಗೊಂಡಿರುವ ಸಿಪಿಎಂ ಎಲ್ಲ ರನ್ನೂ ಕೊಲ್ಲುವ ಹುಚ್ಚು ಹಿಡಿಸಿಕೊಂಡಿದೆ. ಈ ಕೊಲೆಗಡುಕ ರಾಜಕಾರಣದಿಂದಾಗಿ ಸಿಪಿಎಂ ಕಾರ್ಯಕರ್ತರೂ ಸೇರಿ ಕೇರಳದ ಜನರು ಬಿಜೆಪಿ ಸೇರುತ್ತಿದ್ದಾರೆ. ಸಿಪಿಎಂನ ಹಿಂಸೆಗೆ ಪ್ರಜಾಸತ್ತಾತ್ಮಕವಾಗಿ ಉತ್ತರ ನೀಡುತ್ತೇವೆ’ ಎಂದು ಜಾವಡೇಕರ್‌ ಹೇಳಿದ್ದಾರೆ.

2001ರಿಂದ ಕೇರಳದಲ್ಲಿ ಬಿಜೆಪಿಯ 120 ಕಾರ್ಯಕರ್ತರ ಕೊಲೆಯಾಗಿದೆ. ಕಣ್ಣೂರು ಜಿಲ್ಲೆಯೊಂದರಲ್ಲಿಯೇ 84 ಕಾರ್ಯಕರ್ತರ ಹತ್ಯೆ ನಡೆದಿದೆ. ಸಿಪಿಎಂ ಅಧಿಕಾರಕ್ಕೆ ಬಂದ ಬಳಿಕ ವಿಜಯನ್‌ ಕ್ಷೇತ್ರದಲ್ಲಿ 14 ಹತ್ಯೆ ನಡೆದಿದೆ ಎಂದು ಜಾವಡೇಕರ್‌ ಆರೋಪಿಸಿದ್ದಾರೆ.