ದೋಹಾ: ವಿಶ್ವ ಸ್ನೂಕರ್ ಚಾಂಪಿಯನ್ಷಿಪ್ನಲ್ಲಿ ಕರ್ನಾಟಕದ ಪಂಕಜ್ ಅಡ್ವಾಣಿ ಅವರ ಗೆಲುವಿನ ಓಟ ಮುಂದುವರಿದಿದೆ.
ಮಂಗಳವಾರ ನಡೆದ ಪುರುಷರ ವಿಭಾಗದ ಮೂರನೇ ಲೀಗ್ ಹೋರಾಟದಲ್ಲಿ 17 ಬಾರಿಯ ವಿಶ್ವ ಚಾಂಪಿಯನ್ ಪಂಕಜ್ 4–1 ಫ್ರೇಮ್ಗಳಿಂದ ಕತಾರ್ನ ಖಾಮಿಸ್ ಅಲೊಬೈದಿಲಿ ಅವರನ್ನು ಪರಾಭವಗೊಳಿಸಿದರು. ಈ ಮೂಲಕ ರೌಂಡ್ ರಾಬಿನ್ ಲೀಗ್ ಹಂತದ ಪ್ರವೇಶವನ್ನು ಖಚಿತಪಡಿಸಿಕೊಂಡರು.
ಮೊದಲ ಲೀಗ್ ಹಣಾಹಣಿಯಲ್ಲಿ ಬೆಂಗಳೂರಿನ ಪಂಕಜ್ 4–0ರಲ್ಲಿ ಫಿನ್ಲೆಂಡ್ನ ಹೀಕಿ ನಿವಾ ಅವರನ್ನು ಮಣಿಸಿದರು. ಈ ಪಂದ್ಯದಲ್ಲಿ ಭಾರತದ ಆಟಗಾರ 107 ಮತ್ತು 58 ಬ್ರೇಕ್ಗಳನ್ನು ಸಿಡಿಸಿದರು. ಎರಡನೇ ಲೀಗ್ ಪಂದ್ಯದಲ್ಲಿ ಪಂಕಜ್ 4–1ರಲ್ಲಿ ಐರ್ಲೆಂಡ್ನ ಕಾರ್ಲ್ ಫಿಟ್ಜ್ಪ್ಯಾಟ್ರಿಕ್ ಸವಾಲು ಮೀರಿದರು.
ಈ ಹಣಾಹಣಿಯ ಮೊದಲ ನಾಲ್ಕು ಫ್ರೇಮ್ಗಳಲ್ಲಿ ಅವರು ಕ್ರಮವಾಗಿ 108, 46,45 ಮತ್ತು 40 ಬ್ರೇಕ್ಗಳನ್ನು ದಾಖಲಿಸಿದರು.
ನವೆಂಬರ್ 12ರಂದು ನಡೆದಿದ್ದ ವಿಶ್ವ ಬಿಲಿಯರ್ಡ್ಸ್ ಚಾಂಪಿಯನ್ಷಿಪ್ನಲ್ಲಿ ‘ಗೋಲ್ಡನ್ ಬಾಯ್’ ಪಂಕಜ್ ಕಿರೀಟ ಮುಡಿಗೇರಿಸಿಕೊಂಡಿದ್ದರು. ಈ ಮೂಲಕ 17ನೇ ಪ್ರಶಸ್ತಿ ಗೆದ್ದ ಹಿರಿಮೆ ತಮ್ಮದಾಗಿಸಿಕೊಂಡಿದ್ದರು.