ಯೋಗ

ಭುಜ, ಕಾಲಿಗೆ ಬಲತುಂಬುವ ಗೋಮುಖಾಸನ

ಕಂಪ್ಯೂಟರ್ ಎದುರು ಸತತವಾಗಿ ಕುಳಿತು ಕೆಲಸ ಮಾಡುವವರು ಯೋಗದ ಕೆಲವು ಸರಳ ಆಸನ ಮಾಡುವ ಮೂಲಕ ಇಂಥ ಸಮಸ್ಯೆಗಳನ್ನು ಪರಿಹರಿಸಿಕೊಳ್ಳಬಹುದು. ಯೋಗ ಅಭ್ಯಾಸ ಮಾಡಿದರೆ..

ಭುಜ, ಕಾಲಿಗೆ ಬಲತುಂಬುವ ಗೋಮುಖಾಸನ

ಬೆಳಿಗ್ಗೆಯಿಂದ ಸಂಜೆಯವರೆಗೆ ಕಂಪ್ಯೂಟರ್‌ನಲ್ಲಿ ಕೆಲಸ ಮಾಡುವ ಉದ್ಯೋಗಿಗಳನ್ನು ಕೆಲ ಆರೋಗ್ಯ ಸಮಸ್ಯೆಗಳು ಕಾಡುತ್ತವೆ. ಇವರು ಒಂದೇ ಕಡೆ ಕುಳಿತು, ದೃಷ್ಟಿಯನ್ನು ಕೇಂದ್ರೀಕರಿಸಿ ನಿರಂತರವಾಗಿ ಕೆಲಸ ನಿರ್ವಹಿಸಬೇಕು. ಈ ಸಂದರ್ಭದಲ್ಲಿ ಸಹಜವಾಗಿ ಕಣ್ಣಿಗೆ ಆಯಾಸ, ಕುತ್ತಿಗೆ ಭುಜಗಳ ಸೆಳೆತ, ಬೆನ್ನು ಇತ್ಯಾದಿ ಆರೋಗ್ಯ ಸಮಸ್ಯೆಗಳು ಕಂಡುಬರುತ್ತದೆ.

ಕಂಪ್ಯೂಟರ್ ಎದುರು ಸತತವಾಗಿ ಕುಳಿತು ಕೆಲಸ ಮಾಡುವವರು ಯೋಗದ ಕೆಲವು ಸರಳ ಆಸನ ಮಾಡುವ ಮೂಲಕ ಇಂಥ ಸಮಸ್ಯೆಗಳನ್ನು ಪರಿಹರಿಸಿಕೊಳ್ಳಬಹುದು. ಯೋಗ ಅಭ್ಯಾಸ ಮಾಡಿದರೆ ದೇಹದ ಒಳಗಿನ ಅಂಗಗಳಿಗೆ ವ್ಯಾಯಾಮ ಮತ್ತು ಚೆನ್ನಾಗಿ ರಕ್ತಪರಿಚಲನೆ ಆಗುತ್ತದೆ. ಯೋಗದಿಂದ ಪ್ರತಿ ಅಂಗಗಳಿಗೂ ನವಚೈತನ್ಯ ಉಂಟಾಗುತ್ತದೆ. ಯೋಗವನ್ನು ಶಿಸ್ತುಬದ್ಧವಾಗಿ ಕ್ರಮವತ್ತಾಗಿ ಉಸಿರಿನ ಗತಿಯೊಂದಿಗೆ ಗುರುಮುಖೇನ ಕಲಿತು ನಿರಂತರ ಅಭ್ಯಾಸ ಮಾಡಬೇಕು.

ಹೀಗೆ ಮಾಡುವುದರಿಂದ ದೈಹಿಕ ಆರೋಗ್ಯ ವೃದ್ಧಿಯಾಗುತ್ತದೆ. ತಾಳ್ಮೆ, ಶಾಂತಿ ಒದಗಿ ಬರುತ್ತದೆ. ಮನಸ್ಸು ಪ್ರಫುಲ್ಲವಾಗುತ್ತದೆ.

ಗೋಮುಖಾಸನ: ಗೋಮುಖಾಸನದಿಂದ ಭುಜಗಳ ಭಾಗ ಮತ್ತು ಕಾಲಿನ ಭಾಗ ಬಲಗೊಳ್ಳುತ್ತದೆ. ಗೋ ಎಂದರೆ ಹಸು. ಈ ಆಸನದ ಭಂಗಿಯು ಹಸುವಿನ ಮುಖವನ್ನು ಹೋಲುವುದರಿಂದ ಇದಕ್ಕೆ ಗೋಮುಖಾಸನ ಎಂದು ಹೆಸರು.

ಅಭ್ಯಾಸ ಕ್ರಮ: ಜಮಖಾನ ಹಾಸಿದ ನೆಲದ ಮೇಲೆ ದಂಡಾಸನದಲ್ಲಿ ಕುಳಿತುಕೊಳ್ಳಬೇಕು. ಎಡಗಾಲನ್ನು ಮಡಚಿ ಹಿಂದಕ್ಕೆ  ತೆಗೆದುಕೊಂಡು ಎಡಪಾದದ ಮೇಲೆ ಪೃಷ್ಠವನ್ನೂರಬೇಕು. ನಂತರ ಬಲಗಾಲನ್ನು ತುಸು ಮೇಲೆತ್ತಿ ಬಲತೊಡೆಯನ್ನು ಎಡತೊಡೆಯ ಮೇಲೆ ಬರುವಂತೆ ಅಳವಡಿಸಬೇಕು. ಎಡಪಾದದ ಬೆರಳುಗಳು ಹಿಂದೆ ಚಾಚಿರಲಿ. ಆಮೇಲೆ ಎಡಗೈಯನ್ನು ಬೆನ್ನ ಹಿಂದೆ ತರಬೇಕು. ಬಲಗೈಯನ್ನು ಮೇಲೆತ್ತಿ ಬೆನ್ನ ಹಿಂದಿರುವ ಎಡಗೈಯನ್ನು ಹಿಡಿಯಬೇಕು (ಚಿತ್ರ ಗಮನಿಸಿ).

ಈ ಭಂಗಿಯಲ್ಲಿ ಸಾಮಾನ್ಯ ಉಸಿರಾಟ ನಡೆಸುತ್ತಾ ಕೆಲ ಸಮಯ ಇರಬೇಕು. ಈ ಸ್ಥಿತಿಯಲ್ಲಿ ಕುತ್ತಿಗೆ, ತಲೆ, ಬೆನ್ನು ನೇರವಾಗಿರಬೇಕು. ನಂತರ ನಿಧಾನವಾಗಿ ದಂಡಾಸನದ ಸ್ಥಿತಿಗೆ ಬರಬೇಕು. ಅನಂತರ ಕಾಲುಗಳನ್ನು ಮತ್ತು ಕೈಗಳನ್ನು ಬದಲಿಸಿ ಇನ್ನೊಂದು ಬಾರಿ ಅಭ್ಯಾಸ ಮಾಡಬೇಕು. ಕೊನೆಗೆ ವಿಶ್ರಾಂತಿ ಪಡೆಯಬೇಕು.

ಉಪಯೋಗಗಳು: ಈ ಆಸನದ ನಿಯಮಿತ ಅಭ್ಯಾಸದಿಂದ ಭುಜಗಳು ಬಲಗೊಳ್ಳುತ್ತವೆ. ಕಾಲುಗಳ ಬಿಗಿತ (ಮರಗಟ್ಟುವಿಕೆ) ಹೋಗುತ್ತದೆ. ಎದೆಯ ಭಾಗ ಹಿಗ್ಗುತ್ತದೆ. ಬೆನ್ನು ನೆಟ್ಟಗಾಗುತ್ತದೆ. ಹೆಗಲು ನೋವು ಮತ್ತು ಕುತ್ತಿಗೆ ನೋವಿನ ನಿವಾರಣೆಗೆ ಸಹಾಯ ಮಾಡುತ್ತದೆ. ಬೆನ್ನಿನ ನೋವು ಕಡಿಮೆಯಾಗುತ್ತದೆ. ಗೂನುಬೆನ್ನು ನಿವಾರಣೆಗೂ ಸಹಕಾರಿ. ಕಚೇರಿಯಲ್ಲಿ ದೀರ್ಘಕಾಲ ಕಂಪ್ಯೂಟರ್ ಎದುರು ಕೆಲಸ ನಿರ್ವಹಿಸುವವರಿಗೆ ಈ ಆಸನದ ಅಭ್ಯಾಸ ಉಪಯುಕ್ತ.

Comments
ಈ ವಿಭಾಗದಿಂದ ಇನ್ನಷ್ಟು
ಕಾಯಿಲೆಗೆ ಮದ್ದಲ್ಲದ ಔಷಧಗಳು!

ಉತ್ತಮ ಆರೋಗ್ಯ
ಕಾಯಿಲೆಗೆ ಮದ್ದಲ್ಲದ ಔಷಧಗಳು!

20 Jan, 2018
ಜನಸಂಖ್ಯೆ ಹೆಚ್ಚಳ: ಸಮಸ್ಯೆಯೂ ದ್ವಿಗುಣ

ವರದಿ
ಜನಸಂಖ್ಯೆ ಹೆಚ್ಚಳ: ಸಮಸ್ಯೆಯೂ ದ್ವಿಗುಣ

20 Jan, 2018
ವ್ಯಾಯಾಮಕ್ಕೂ ಇದೆ ನಿಯಮ!

ಆರೋಗ್ಯ
ವ್ಯಾಯಾಮಕ್ಕೂ ಇದೆ ನಿಯಮ!

20 Jan, 2018

ಆರೋಗ್ಯ
ಯಶಸ್ಸಿನ ಬೆನ್ನೇರಿ...

ಅನೇಕ ಮಹಾಸಾಧಕರ ಜೀವನಚರಿತ್ರೆಯನ್ನು ನೋಡಿ; ಅವರಲ್ಲಿ ಯಾರು ಕೂಡ ಸುಲಭವಾಗಿ ಯಶಸ್ಸಿನ ಉತ್ತುಂಗಕ್ಕೇರಿದ ನಿದರ್ಶನಗಳಿಲ್ಲ. ಆದರೆ ಅವರು ಸಾಧನೆಯ ಹಾದಿಯಲ್ಲಿ ಎದುರಿಸಿದ ಕಷ್ಟಗಳನ್ನು ದೊಡ್ಡದಾಗಿ...

17 Jan, 2018
‘ಶ್ರದ್ಧೆಯೇ ಮದ್ದು’

ಆರೋಗ್ಯ
‘ಶ್ರದ್ಧೆಯೇ ಮದ್ದು’

17 Jan, 2018