ಕಳಸ

ಅರಣ್ಯ ಕಾಯ್ದೆಗಳಿಂದಲೇ ಗಿರಿಜನ ಅಸ್ತಿತ್ವಕ್ಕೆ ಧಕ್ಕೆ

‘ಆದಿವಾಸಿಗಳಿಗೆ ವಿಧಾನಸಭೆ ಮತ್ತು ಸಂಸತ್ತಿನಲ್ಲಿ ನೀಡಿರುವ ಕ್ಷೇತ್ರ ಮೀಸಲಾತಿ ಬಯಲು ಪ್ರದೇಶದಲ್ಲಿ ಹೆಚ್ಚು ಜನಸಂಖ್ಯೆ ಇರುವ ಪ್ರದೇಶಕ್ಕೆ ಸೀಮಿತವಾಗಿದೆ.

ಕಳಸ: ರಾಜ್ಯ ಮತ್ತು ಕೇಂದ್ರ ಸರ್ಕಾರಗಳು ಜಾರಿಗೆ ತಂದಿರುವ ಅರಣ್ಯ ಕಾಯ್ದೆಗಳಿಂದಲೇ ಗಿರಿಜನರ ಅಸ್ತಿತ್ವಕ್ಕೆ ಧಕ್ಕೆ ಬಂದಿದ್ದು, ಮೀಸಲು ಅರಣ್ಯ, ರಾಷ್ಟ್ರೀಯ ಉದ್ಯಾನ, ಹುಲಿ ಯೋಜನೆಗಳು ಗಿರಿಜನರ ಬದುಕನ್ನು ಕಸಿದುಕೊಳ್ಳುತ್ತಿವೆ ಎಂದು ಪ್ರಗತಿಪರ ಚಿಂತಕ ಕಲ್ಕುಳಿ ವಿಠಲ ಹೆಗ್ಡೆ ವಿಷಾದ ವ್ಯಕ್ತಪಡಿಸಿದರು. ಪಟ್ಟಣದಲ್ಲಿ ಕರ್ನಾಟಕ ಆದಿವಾಸಿ ಪರಿಷತ್ ಆಶ್ರಯದಲ್ಲಿ ಭಾನುವಾರ ನಡೆದ ಆದಿವಾಸಿ ಕಲಾ ಮೇಳ ಮತ್ತು ಸಮಾವೇಶದಲ್ಲಿ ಅವರು ಮಾತನಾಡಿದರು.

ಮಾತೃಪ್ರಧಾನ ಕೌಟುಂಬಿಕ ವ್ಯವಸ್ಥೆಯ ಆದಿವಾಸಿಗಳ ಪೈಕಿ ಅನೇಕರು ಇಂದು ಪೇಟೆಯಲ್ಲಿ ವಾಸಿಸುವಂತಾಗಿದ್ದು, ಅಮೆರಿಕದಲ್ಲಿ ಕುಳಿತವರು ನಮ್ಮ ಗಿರಿಜನರನ್ನು ಕಾಡಿನಿಂದ ಹೊರಹಾಕುತ್ತಿದ್ದಾರೆ ಇದನ್ನು ಗಮನಿಸಿದ್ದೀರಾ ಎಂದು ಹೆಗಡೆ ವೇದಿಕೆಯಲ್ಲಿದ್ದ ರಾಜಕಾರಣಿಗಳನ್ನು ಪ್ರಶ್ಹಿಸಿದರು.

‘ಕುದುರೆಮುಖದಲ್ಲಿ ತೆರೆಮರೆಯಲ್ಲಿ 1992ರಿಂದಲೂ ಹುಲಿ ಯೋಜನೆ ಜಾರಿಯಲ್ಲಿದ್ದು, ಅಮೆರಿಕದ ಕಂಪೆನಿಯೊಂದರ ಪ್ರಾಯೋಜಕತ್ವದ ಈ ಯೋಜನೆಯಿಂದಲೇ ನೂರಾರು ಗಿರಿಜನರನ್ನು ಅರಣ್ಯದಿಂದ ಹೊರಹಾಕಲು ಹಣ ನೀಡಲಾಗಿದೆ. ಕಸ್ತೂರಿ ರಂಗನ್, ಗಾಡ್ಗೀಳ್ ವರದಿಗಳು ಮತ್ತು ಸರ್ಕಾರೇತರ ಸಂಸ್ಥೆಗಳ ಚಟುವಟಿಕೆಯೂ ವಿದೇಶಿ ಸಂಸ್ಥೆಗಳ ಅನುದಾನದಿಂದಲೇ ನಡೆಯುತ್ತಿವೆ’ ಎಂದು ಅವರು ಆರೋಪಿಸಿದರು.

‘ಆದಿವಾಸಿಗಳನ್ನು ಆಧುನಿಕಗೊಳಿಸುವ ಮೂಲಕ ಅವರ ಅಭಿವೃದ್ಧಿಯ ಪ್ರಯತ್ನ ನಡೆದಿದೆ. ಆದರೆ ಇದರಿಂದ ಅವರ ವೈವಿಧ್ಯತೆ ನಾಶವಾಗಿದೆ. ಅನೇಕ ಆದಿವಾಸಿ ಪಂಗಡಗಳು ಅವಸಾನಕ್ಕೆ ತರಲುಪಿವೆ. ಅರಣ್ಯದಿಂದ ಒಕ್ಕಲೆಬ್ಬಿಸುವ ಗಿರಿಜನರಿಗೆ ಹಣ ನೀಡುವ ಬದಲು ಅವರಿಗೆ ಜಮೀನು ಮಂಜೂರು ಮಾಡಿ ಪುನರ್ವಸತಿ ನೀಡಿ’ ಎಂದು ಅವರು ಕೋರಿದರು.

ಶಾಸಕ ಬಿ. ಬಿ. ನಿಂಗಯ್ಯ ಮಾತನಾಡಿ ‘ಅರಣ್ಯ ಹಕ್ಕು ಕಾಯ್ದೆಯಲ್ಲಿ ಗಿರಿಜನರಿಗೆ ಭೂಮಿ ಸಿಗುವ ಅವಕಾಶ ಇದ್ದರೂ ಅಧಿಕಾರಿಗಳ ಅಸಹಕಾರದಿಂದಾಗಿ ಗಿರಿಜನರಿಗೆ ಅನ್ಯಾಯವಾಗಿದೆ. ಗಿರಿಜನ ಕಾಲೋನಿಗಳಿಗೆ ಕಾಂಕ್ರೀಟ್ ರಸ್ತೆ ನಿರ್ಮಿಸುವ ಮೂಲಕ ಅಭಿವೃದ್ಧಿಯ ಪ್ರಯತ್ನ ನಡೆದಿದೆಯೇ ವಿನಾ ಅವರಿಗೆ ದುಡಿಯುವ ಅವಕಾಶ ಕಲ್ಪಿಸಲಾಗುತ್ತಿಲ್ಲ’ ಎಂದು ವಿಷಾದಿಸಿದರು.

ಹಂಪಿ ಕನ್ನಡ ವಿವಿಯ ಬುಡಕಟ್ಟು ಅಧ್ಯಯನ ವಿಭಾಗದ ಪ್ರಾಧ್ಯಾಪಕರಾದ ಡಾ.ಕೆ.ಎಂ. ಮೈತ್ರಿ ಪ್ರಾಸ್ತಾವಿಕವಾಗಿ ಮಾತನಾಡಿ, ‘ಆದಿವಾಸಿಗಳಿಗೆ ವಿಧಾನಸಭೆ ಮತ್ತು ಸಂಸತ್ತಿನಲ್ಲಿ ನೀಡಿರುವ ಕ್ಷೇತ್ರ ಮೀಸಲಾತಿ ಬಯಲು ಪ್ರದೇಶದಲ್ಲಿ ಹೆಚ್ಚು ಜನಸಂಖ್ಯೆ ಇರುವ ಪ್ರದೇಶಕ್ಕೆ ಸೀಮಿತವಾಗಿದೆ. ನೈಜ ಗಿರಿಜನರ ಸಮಸ್ಯೆ ಸರ್ಕಾರಕ್ಕೆ ತಲುಪಿಸಲು ಪ್ರತಿನಿಧಿಗಳೇ ಇಲ್ಲವಾಗಿದೆ. ಗಿರಿಜನರ ಹೆಸರನಲ್ಲಿ ಮಂಜೂರಾಗುವ ಹಣ ಬಲಾಢ್ಯರ ಪಾಲಾಗುತ್ತಿದೆ’ ಎಂದು ವಿಷಾದ ವ್ಯಕ್ತಪಡಿಸಿದರು.

ವಿಧಾನಪರಿಷತ್ ಸದಸ್ಯೆ ಮೋಟಮ್ಮ ಮಾತನಾಡಿ, ‘ಮೂಲ ಗಿರಿಜನರಿಗೆ ಆದ್ಯತೆ ಸಿಗಬೇಕು. ಅವರು ಶೈಕ್ಷಣಿಕವಾಗಿ, ಸಾಮಾಜಿಕವಾಗಿ ಮತ್ತು ಆರ್ಥಿಕವಾಗಿ ಅಭಿವೃದ್ಧಿ ಹೊಂದಬೇಕು.ಆದರೆ ಕೆಲ ಗಿರಿಜನ ಸಂಘಟನೆಗಳೇ ಸರ್ಕಾರದ ದಾರಿತಪ್ಪಿಸಿ ಅರ್ಹರಿಗೆ ಸೌಲಭ್ಯ ಸಿಗದಂತೆ ಮಾಡುತ್ತಿವೆ’ ಎಂದು ಆಹಾರ ಯೋನೆಯ ಫಲಾನುಭವಿಗಳಿಗೆ ಆಗಿರುವ ಅನ್ಯಾಯ ಪ್ರಸ್ತಾಪಿಸಿದರು.

ಮಾಜಿ ಶಾಸಕ ಎಂ.ಪಿ.ಕುಮಾರಸ್ವಾಮಿ, ವಿಧಾನಪರಿಷತ್ ಸದಸ್ಯ ಎಂ.ಕೆ.ಪ್ರಾಣೇಶ್, ತಾಲ್ಲೂಕು ಪಂಚಾಯಿತಿ ಅಧ್ಯಕ್ಷ ರತನ್, ಸದಸ್ಯ ರಫೀಕ್, ಜಿಲ್ಲಾ ಪಂಚಾಯಿತಿ ಸದಸ್ಯರಾದ ಪ್ರಭಾಕರ್, ಅಮಿತಾ ಮುತ್ತಪ್ಪ, ಮುಖಂಡರಾದ ಧರಣೇಂದ್ರ, ಶ್ರೀನಿವಾಸ ಹೆಬ್ಬಾರ್, ಸುರೇಶ್ ಭಟ್, ಮುತ್ತಪ್ಪ, ರಾಜಮ್ಮ, ಶ್ರೀನಿವಾಸ ಗೌಡ ಭಾಗವಹಿಸಿದ್ದರು.

ಇದಕ್ಕೂ ಮುನ್ನ ಪಟ್ಟಣದ ಪ್ರಮುಖ ಬೀದಿಗಳಲ್ಲಿ ಕೆಲ ಆದಿವಾಸಿ ತಂಡಗಳೊಂದಿಗೆ ಕಲಾ ಜಾಥಾ ನಡೆಸಲಾಯಿತು.ಶಾಸಕ ನಿಂಗಯ್ಯ, ಮಾಜಿ ಶಾಸಕ ಕುಮಾರಸ್ವಾಮಿ ಜಾಥಾದೊಂದಿಗೆ ಸಾಗಿದರು.

Comments
ಈ ವಿಭಾಗದಿಂದ ಇನ್ನಷ್ಟು

ಮೂಡಿಗೆರೆ
ಮೂಡಿಗೆರೆ: ಮೋಟಮ್ಮ ನಾಮಪತ್ರ ಸಲ್ಲಿಕೆ

ವಿಧಾನ ಪರಿಷತ್‌ ಸದಸ್ಯೆ ಮೋಟಮ್ಮ ಕಾಂಗ್ರೆಸ್‌ ಪಕ್ಷದಿಂದ ಗುರುವಾರ ನಾಮಪತ್ರ ಸಲ್ಲಿಸಿದರು. ಮಧ್ಯಾಹ್ನ 12ಕ್ಕೆ ತಾಲ್ಲೂಕು ಕಚೇರಿಗೆ ಜಿಲ್ಲಾ ಪಂಚಾಯಿತಿ ಸದಸ್ಯ ಕೆ.ಆರ್‌. ಪ್ರಭಾಕರ್‌,...

20 Apr, 2018

ಬಾಳೆಹೊನ್ನೂರು
ಬದಲಾವಣೆ ಬಯಸಿರುವ ಶೃಂಗೇರಿ ಕ್ಷೇತ್ರದ ಜನತೆ

‘ಶೃಂಗೇರಿ ವಿಧಾನಸಭಾ ಕ್ಷೇತ್ರದಿಂದ ಮೂರು ಬಾರಿ ಶಾಸಕರಾಗಿ ಆಯ್ಕೆಯಾಗಿರುವ ಶಾಸಕ ಡಿ.ಎನ್.ಜೀವರಾಜ್ ಅವರು ಜನರು ನಿರೀಕ್ಷಿಸಿದಷ್ಟು ಅಭಿವೃದ್ಧಿ ಕೆಲಸಗಳನ್ನು ಮಾಡಿಲ್ಲ. ಜನರ ಸಮಸ್ಯೆಗಳಿಗೆ ಸ್ಪಂದಿಸಿಲ್ಲ...

20 Apr, 2018

ಕೊಪ್ಪ
₹1.27 ಕೋಟಿ ಮೌಲ್ಯದ ಆಸ್ತಿ ಘೋಷಣೆ

ಶೃಂಗೇರಿ ವಿಧಾನಸಭಾ ಕ್ಷೇತ್ರದ ಚುನಾವಣೆಗೆ ಬಿಜೆಪಿ ಅಭ್ಯರ್ಥಿಯಾಗಿ ಹಾಲಿ ಶಾಸಕ ಡಿ.ಎನ್. ಜೀವರಾಜ್ ಗುರುವಾರ ಮೊತ್ತ ಮೊದಲಿಗರಾಗಿ ನಾಮಪತ್ರ ಸಲ್ಲಿಸಿದರು.

20 Apr, 2018

ಚಿಕ್ಕಮಗಳೂರು
‘ಜಿಲ್ಲಾಧ್ಯಕ್ಷರ ಉಚ್ಚಾಟನೆಗೆ ವರಿಷ್ಠರಿಗೆ ಮೊರೆ’

‘ಜೆಡಿಎಸ್ ಜಿಲ್ಲಾಧ್ಯಕ್ಷ ರಂಜನ್ ಅಜಿತ್‌ಕುಮಾರ್‌ ಅವರು ಪಕ್ಷ ವಿರೋಧಿ ಹೇಳಿಕೆ ನೀಡಿ, ಪಕ್ಷ ವಿರೋಧಿ ಚಟುವಟಿಕೆ ನಡೆಸಿದ್ದಾರೆ. ಅವರನ್ನು ಪಕ್ಷದಿಂದ ಉಚ್ಛಾಟಿಸುವಂತೆ ವರಿಷ್ಠರಿಗೆ ಕೋರಲಾಗಿದೆ’...

20 Apr, 2018
ಸೈಕಲ್ ಬಳಸಿ; ಮಾಲಿನ್ಯ ತಡೆಗೆ ಸಹಕರಿಸಿ

ನರಸಿಂಹರಾಜಪುರ
ಸೈಕಲ್ ಬಳಸಿ; ಮಾಲಿನ್ಯ ತಡೆಗೆ ಸಹಕರಿಸಿ

20 Apr, 2018