ತೆರೆದ ಬಾವಿಗಳು ಮಾತಾಡ್ತವೆ..!

ಮೂರು ದಶಕಗಳ ಹಿಂದಿನವರೆಗೆ ತೆರೆದ ಬಾವಿಗಳು ಯಾವುದೇ ನಗರದ, ಹಳ್ಳಿಯ ಜೀವಸೆಲೆಗಳಾಗಿದ್ದವು. ರಾಟೆಯ ಮೂಲಕ ಬಾವಿಯ ನೀರು ಸೇದುವ ಕೆಲಸವನ್ನು ಮನೆ–ಮಂದಿಯೆಲ್ಲ ಹಂಚಿಕೊಳ್ಳುತ್ತಿದ್ದರು. ವಿದ್ಯುತ್‌ ಇರದ, ಟಿವಿ ಕಾಲಿಡದ ಆ ಯುಗದಲ್ಲಿ ಸುಸ್ಥಿರ ಕೃಷಿ, ನೀರಿನ ಸುಸ್ಥಿರ ಬಳಕೆ ಸಹಜವಾಗಿತ್ತು. ಊರಿನ ಬೃಹತ್‌ ಬಾವಿಕಟ್ಟೆ ಹೆಣ್ಣುಮಕ್ಕಳಿಗೆ ಸುಖದುಃಖ ಹಂಚಿಕೊಳ್ಳುವ ತಾಣವಾಗಿರುತ್ತಿತ್ತು. ‘ಊರಿಗೆ ಬಂದವಳು ನೀರಿಗೆ ಬಾರದೇ ಇದ್ದಾಳೆ?’ ಎಂಬ ಗಾದೆ ಮಾತು ಹುಟ್ಟಿದ್ದು ಹಾಗೆಯೇ.