ಸೋಮವಾರಪೇಟೆ | ಕುಡಿಯುವ ನೀರಿಗಾಗಿ ಜನರ ಪರದಾಟ

ಗ್ರಾಮದ ಕಾಫಿ ತೋಟವೊಂದರಲ್ಲಿ  40 ವರ್ಷಗಳಿಂದ ನೆಲೆಸಿರುವ 6 ಕಾರ್ಮಿಕ ಕುಟುಂಬಗಳಿಗೆ ಕುಡಿಯುವ ನೀರಿನ ಸಮಸ್ಯೆ ಎದುರಾಗಿದೆ. ಸಮಸ್ಯೆ ಬಿಗಡಾಯಿಸುತ್ತಿರುವಂತೆಯೇ ಇಲ್ಲಿಂದ ಒಂದೊಂದೇ ಕುಟುಂಬ ಬೇರೆ ಸ್ಥಳಕ್ಕೆ ತೆರಳಿದ್ದು, ಈಗ ಪರಿಶಿಷ್ಟ ಪಂಗಡದ 2 ಕುಟುಂಬಗಳು ಕುಡಿಯುವ ನೀರನ್ನು ಅರ್ಧ ಕಿ.ಮೀ. ದೂರದ ಬಾವಿಯಿಂದ ಹೊತ್ತು ತರಬೇಕಿದೆ.

ಕಾಡಾನೆಗಳ ಹಾವಳಿ ಇರುವ ಇಲ್ಲಿ ಸಂಜೆ ಕೆಲಸ ಮುಗಿಸಿಕೊಂಡು ಬರುವ ಕಾರ್ಮಿಕರು ನೀರಿಗಾಗಿ ಇಡೀ ಕುಟುಂಬ ತೆರಳಬೇಕಾದ ಅನಿವಾರ್ಯತೆ ಎದುರಾಗಿದೆ. ‌

ಈ ಬಗ್ಗೆ ಸ್ಥಳೀಯ ನಿವಾಸಿ ರವಿ ಮಾತನಾಡಿ, ‘ಗ್ರಾಮಕ್ಕೆ ಕಳೆದ 7 ತಿಂಗಳ ಹಿಂದೆ ಕಾಂಕ್ರೀಟ್ ರಸ್ತೆ ನಿರ್ಮಾಣ ಮಾಡಲು ರಸ್ತೆ ಅಗೆಯಲಾಗಿತ್ತು. ಆಗ ನೀರು ಸರಬರಾಜು ಮಾಡುವ ಪೈಪ್ ತುಂಡಾಗಿ ನೀರು ಸರಬರಾಜು ಸ್ಥಗಿತಗೊಂಡಿತ್ತು. ಸರಿಪಡಿಸುವಂತೆ ಪಂಚಾಯಿತಿಗೆ ಹಲವು ಬಾರಿ ಮನವಿ ಮಾಡಿದರೂ  ಪ್ರಯೋಜನವಾಗಿಲ್ಲ. ಕಳೆದ ತಿಂಗಳು ನೀರು ಸರಬರಾಜು ಮಾಡುವವರು ಬಂದು ಪೈಪ್ ದುರಸ್ತಿಗೊಳಿಸಿ ತೆರಳಿದ್ದರು. ಆದರೂ ನೀರು ಬರುತ್ತಿಲ್ಲ. ಮನೆಯ ಬಳಿ ವಾಲ್ವ್ ಅಳವಡಿಸಬೇಕೆಂದು ಸಮಜಾಯಿಶಿ ನೀಡಿ ಹೋಗಿದ್ದಾರೆ. ಇಂದಿಗೂ ಬಂದು ಸರಿಪಡಿಸಿಲ್ಲ’ ಎಂದು ದೂರಿದರು.

ನೀರಿಗಾಗಿ ಒಂದು ಕಿ.ಮೀ. ದೂರದ ಖಾಸಗಿಯವರ ನೀರಿನ ಬಾವಿಯಿಂದ ಹೊತ್ತು ತರಬೇಕಾಗಿದೆ. ಮಕ್ಕಳು ಸೇರಿದಂತೆ ಎಲ್ಲರೂ ಸಮಸ್ಯೆ ಎದುರಿಸುತ್ತಿದ್ದೇವೆ ಎಂದು ಅವರು ದೂರಿಕೊಂಡರು.

ಇಲ್ಲಿನ ಸಮಸ್ಯೆ ಬಗ್ಗೆ ಚೆಟ್ಟಳ್ಳಿ ಗ್ರಾಮ ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿಗೆ ಕರೆ ಮಾಡಿದರೂ ಅವರು ಕರೆ ಸ್ವೀಕರಿಸಲಿಲ್ಲ.