ನೈಸರ್ಗಿಕ ಔಷಧ `ಪಾಚಿ'

ಇದರ ಪ್ರಯೋಜನವನ್ನು ಅರಿತಿರುವ ಧಾರವಾಡ ಜಿಲ್ಲೆಯ ಮನಗುಂಡಿ ಗ್ರಾಮದ ಮಹಾಮನಿ ಮಠವು ಪಾಚಿ ಬೆಳೆಯುವುದಕ್ಕಾಗಿ ಕೇಂದ್ರವೊಂದನ್ನು ಆರಂಭಿಸಿದೆ. ಮಠದ ಸ್ವಾಮಿಜಿಗಳು ರಾಜ್ಯ ಮಾತ್ರವಲ್ಲದೇ ಕೇರಳ, ತಮಿಳುನಾಡು ಹಾಗೂ ಇತರೆಡೆ ಸಂಚಾರ ನಡೆಸಿ ಅನುಭವ ಪಡೆದುಕೊಳ್ಳುವ ಮೂಲಕ ಇದನ್ನು ಸ್ಥಾಪನೆ ಮಾಡಿದ್ದಾರೆ.

ಪಾಚಿಯಿಂದ ಹಲವು ಬಗೆಯ ಮಾತ್ರೆಗಳನ್ನು ಕೂಡ ತಯಾರು ಮಾಡಲಾಗುತ್ತಿದ್ದು, ಇವು ರಾಷ್ಟ್ರೀಯ ಹಾಗೂ ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಬಹಳ ಬೇಡಿಕೆ ಹೊಂದಿದೆ. ಈ ಮಾತ್ರೆ ನೈಸರ್ಗಿಕ ವಿಧಾನದಿಂದ ತಯಾರು ಮಾಡುವ ಕಾರಣ, ಇದರ ಸೇವನೆಯಿಂದ ಆರೋಗ್ಯದ ಮೇಲೆ ಯಾವುದೇ ಪ್ರತಿಕೂಲ ಪರಿಣಾಮ ಇಲ್ಲ ಎಂಬ ಕಾರಣಕ್ಕೆ ಭಾರಿ ಬೇಡಿಕೆ. ವಿವಿಧ ರೀತಿಯ ಕಾಯಿಲೆಗಳು ಇದರಿಂದ ವಾಸಿಯಾಗುತ್ತವೆ.

ಪಾಚಿ ಬೆಳೆಯುವುದು ಹೇಗೆ?
ದೊಡ್ಡ ದೊಡ್ಡ ಟ್ಯಾಂಕುಗಳಲ್ಲಿ ಮೊದಲು ನೀರನ್ನು ಸಂಗ್ರಹಿಸಬೇಕು. ಆ ನೀರಿಗೆ ಸೋಡಾ, ಯೂರಿಯಾ, ಪೊಟ್ಯಾಷಿಯಂ, ಮ್ಯಾಗ್ನೀಷಿಯಂ, ಸೋಡಿಯಂ ಮತ್ತು ಸಲ್ಫ್ಯೂರಿಕ್ ಆಸಿಡ್ ಬೆರೆಸಿ ಕಲುಕಬೇಕು. 2ರಿಂದ 3 ದಿನಗಳಿಗೆ ಒಮ್ಮೆ ಇದೇ ರೀತಿ ಮಾಡಬೇಕು. ಸುಮಾರು 7ದಿನಗಳ ಅವಧಿಯಲ್ಲಿ ನೀರಿನ ಮೇಲೆ ಪಾಚಿ ಬೆಳೆದಿರುತ್ತದೆ. ನಂತರ ಅದನ್ನು ನೀರಿನಿಂದ ಬೇರ್ಪಡಿಸಿ, ಒಣಗಿಸಿ, ಪೌಡರ್ ಮಾಡಲಾಗುತ್ತದೆ. ನಂತರ ಅದನ್ನು ಮಾತ್ರೆಗಳಿಗೆ ತುಂಬಿ ಮಾರಾಟ ಮಾಡಲಾಗುತ್ತದೆ.

ಪಾಚಿ ಪರಿಸರಕ್ಕೆ ಹೆಚ್ಚು ಆಮ್ಲಜನಕ ಪೂರೈಸುತ್ತದೆ. ಇದೇ ಕಾರಣಕ್ಕೆ ಗಗನಯಾತ್ರಿಗಳು ಮತ್ತು ಸಾಗರ ಯಾತ್ರಿಗಳು ಮುಖ್ಯವಾಗಿ ಇದನ್ನು ಔಷಧಿಯಾಗಿ ಬಳಸುತ್ತಾರೆ. ಪಾಚಿಯನ್ನು ಸೇವನೆ ಮಾಡುವುದರಿಂದ ಹೃದಯ, ಯಕೃತ್, ಮೂತ್ರಪಿಂಡ, ನರಕೋಶ, ಅಂಡಾಶಯ, ಡಿಎನ್‌ಎ ಮತ್ತು ಕಣ್ಣುಗಳ ಮೇಲೆ ಆಗುವ ಹಾನಿಯನ್ನು ತಡೆಗಟ್ಟಬಹುದು ಎಂದು ಅಧ್ಯಯನಗಳಿಂದ ತಿಳಿದುಬಂದಿದೆ. ಇದನ್ನು ಬೆಳೆಯಲು ಹೆಚ್ಚು ಹಣ ಬೇಕಾಗಿಲ್ಲ. ಸ್ವಲ್ಪ ತರಬೇತಿ ಅಗತ್ಯ ಅಷ್ಟೇ. ಇದನ್ನು ಬೆಳೆದರೆ ಕಡಿಮೆ ಬಂಡವಾಳದಿಂದ ಹೆಚ್ಚಿನ ಹಣ ಪಡೆಯಲು ಸಾಧ್ಯ ಎನ್ನುವುದು ಮಠದ ಸ್ವಾಮೀಜಿ ಅನಿಸಿಕೆ.