ಸುರಳಿ ಹುಳಕ್ಕೆ ಸರಳ ಉಪಾಯ

ಬೆಳೆ ಹಾನಿಯ ಲಕ್ಷಣಗಳು
ಮೊಟ್ಟೆಯಿಂದ ಹೊರಬಂದ ಚಿಕ್ಕ ಮರಿಹುಳುಗಳು (ಕ್ಯಾಟರ್‌ಪಿಲ್ಲರ್/ಲಾರ್ವ) ಎಲೆಯ ಹಸಿರು ಭಾಗವನ್ನು ಕೆರೆದು ತಿನ್ನುತ್ತವೆ. ನಂತರ ಹುಳು ಬೆಳೆಯುತ್ತ ಎಲೆಯ ತುದಿಭಾಗವನ್ನು ಕತ್ತರಿಸಿ, ಸುರುಳಿ ಸುತ್ತುತ್ತದೆ. ಒಂದೇ ಎಲೆಯಲ್ಲಿ ಸುಮಾರು 10 ರಿಂದ 20 ಹುಳುಗಳು ಈ ರೀತಿ ಎಲೆಯ ತುದಿಭಾಗವನ್ನು ಕತ್ತರಿಸಿ ಸುರುಳಿ ಸುತ್ತುವುದರಿಂದ, ಬಾಳೆ ಎಲೆ ತನ್ನ ಪೂರ್ಣ ಆಕಾರವನ್ನು ಕಳೆದುಕೊಳ್ಳುತ್ತದೆ (ಚಿತ್ರ 7), ಇದರಿಂದಾಗಿ ಬೆಳೆಯಲ್ಲಿ ದ್ಯುತಿಸಂಶ್ಲೇಷಣಾ ಕ್ರಿಯೆಗೆ ಧಕ್ಕೆಯುಂಟಾಗಿ ಸಸ್ಯದ ಬೆಳವಣಿಗೆಗೆ ಬೇಕಾಗುವ ಆಹಾರ ಉತ್ಪಾದನೆಯಾಗದೆ ಗಿಡದ ಬೆಳವಣಿಗೆ ಸಂಪೂರ್ಣ ಕುಂಠಿತವಾಗುತ್ತದೆ, ಸರಿಯಾಗಿ ಕಾಯಿ ಕಟ್ಟುವುದಿಲ್ಲ, ಕಟ್ಟಿದ ಕಾಯಿಗಳು ಕಡಿಮೆ ಸಂಖ್ಯೆಯಲ್ಲಿರುತ್ತವೆ ಮತ್ತು ಕಾಯಿಯ ಗಾತ್ರ ಚಿಕ್ಕದಾಗಿರುತ್ತದೆ.

ಇದರಿಂದಾಗಿ ಇಳುವರಿಯು ಗಣನೀಯವಾಗಿ ಕಡಿಮೆಯಾಗುತ್ತದೆ. ಈ ತರಹದ ಬಾಳೆಗೆ ಮಾರುಕಟ್ಟೆಯಲ್ಲಿ ಮೌಲ್ಯವಿರುವುದಿಲ್ಲ. ಬಾಳೆಎಲೆಯು ಬಹು ಉಪಯೋಗಿಯಾಗಿದ್ದು, ಆಹಾರ ಸೇವನೆಗೆ, ದೇವತಾಕಾರ್ಯಗಳಲ್ಲಿ, ತರಕಾರಿ, ಸೊಪ್ಪು, ವೀಳ್ಯದೆಲೆ ಇತ್ಯಾದಿಗಳನ್ನು ಬಹು ದಿನಗಳವರೆಗೆ ಕೆಡದ ಹಾಗೆ ತಾಜಾವಾಗಿಡಲು ಮತ್ತು ದೂರದ ಊರುಗಳಿಗೆ ಸಾಗಿಸಲು ಬಾಳೆಎಲೆಗಳಿಂದ ಕಟ್ಟಿ ಕಳಿಸಲಾಗುತ್ತದೆ. ಆದರೆ, ಈ ಹುಳುಗಳು ಎಲೆಯನ್ನು ಸಂಪೂರ್ಣ ಹಾನಿಮಾಡುವುದರಿಂದ ಗುಣಮಟ್ಟದ ಬಾಳೆಎಲೆಗಳು ಸಿಗುವುದಿಲ್ಲ.

ಕೀಟಗಳ ನಿರ್ವಹಣೆ
ಪ್ರಕೃತಿಯಲ್ಲಿ ಸಾಮಾನ್ಯವಾಗಿ ಕೀಟ ಭಕ್ಷಕ ಕೀಟಗಳು, ಕೀಟ ಭಕ್ಷಕಪಕ್ಷಿಗಳು (ಚಿತ್ರ 6) ಇರುತ್ತವೆ, ಹೀಗಾಗಿ ಅವುಗಳಿಗೆ ಹಾನಿಯಾಗದ ಹಾಗೆ ಯಾವುದೇ ರಾಸಾಯನಿಕಗಳನ್ನು ಬಳಸದೆ ಕೀಟಗಳ ನಿರ್ವಹಣೆ ಮಾಡಬೇಕು. ಕೀಟಗಳ ಸಂಖ್ಯೆ ಕಡಿಮೆ ಇರುವಾಗಲೇ ಹತೋಟಿ ಕ್ರಮ ಕೈಗೊಳ್ಳುವುದು ಉತ್ತಮ.

l ಬೇಸಿಗೆಯಲ್ಲಿ, ಆಳವಾಗಿ ಉಳುಮೆ ಮಾಡಬೇಕು. ಈ ರೀತಿ ಮಾಡುವುದರಿಂದ ಮಣ್ಣಿನಲ್ಲಿ ಹುದುಗಿರುವ ಹುಳುಗಳು, ಕೋಶಾವಸ್ಥೆಯ ಕೀಟಗಳು ಸಹ ಮೇಲೆ ಬರುತ್ತವೆ, ಇವುಗಳನ್ನು ಕೀಟ ಭಕ್ಷಕಪಕ್ಷಿಗಳು ಹೆಕ್ಕಿ ತಿನ್ನುತ್ತವೆ ಮತ್ತು ಸೂರ್ಯನ ಬಿಸಿಲಿನ ಶಾಖದಿಂದಲೂ ಹುಳುಗಳು ಸಾಯುತ್ತವೆ. ಎಲೆಯ ಸುರುಳಿ ಒಳಗೆ ಸಿಗುವ ಹುಳುಗಳನ್ನು ಹಿಡಿದು ನಾಶಪಡಿಸುವುದು.

ಈ ಹುಳುಗಳು ಎಲೆಯ ಕೆಳಭಾಗದಲ್ಲಿ ಗುಂಪಾಗಿ ಇಡುವ ಮೊಟ್ಟೆಗಳನ್ನು ಗುರುತಿಸಿ ನಾಶಪಡಿಸುವುದು.
ಟ್ರೈಕೋಗ್ರಾಮ ಎಂಬ ಪರಾವಲಂಬಿ ದುಂಬಿಗಳು ಟ್ರೈಕೋಕಾರ್ಡ್ ರೂಪದಲ್ಲಿ ಮಾರುಕಟ್ಟೆಯಲ್ಲಿ ಲಭ್ಯ, ಇವುಗಳನ್ನು ಎಕರೆಗೆ 1.5 ಸಿ.ಸಿ ಕಾರ್ಡ್‌ಗಳನ್ನು ಗಿಡಗಳಿಗೆ ಕಟ್ಟಬಹುದು. ಟ್ರೈಕೋಗ್ರಾಮ ದುಂಬಿಯು, ಬಾಳೆ ಎಲೆ ಸುರುಳಿ ಹುಳುಗಳ ಮೊಟ್ಟೆಯ ಒಳಗೆ ತನ್ನ ಮೊಟ್ಟೆಯಿಡುತ್ತವೆ ಹಾಗೂ ಟ್ರೈಕೋಗ್ರಾಮ ಮೊಟ್ಟೆಯಿಂದ ಹೊರಬಂದ ಮರಿ ದುಂಬಿ ಹುಳುಗಳು ಎಲೆ ಸುರುಳಿ ಹುಳುಗಳ ಮೊಟ್ಟೆಯನ್ನು ಒಳಗಿನಿಂದಲೇ ತಿಂದು ಬೆಳೆಯುತ್ತವೆ. ಹಾಗಾಗಿ ಬಾಳೆ ಎಲೆ ಸುರುಳಿ ಹುಳುಗಳ ಮೊಟ್ಟೆ ನಾಶವಾಗುತ್ತದೆ ಮತ್ತು ಸ್ವಾಭಾವಿಕವಾಗಿ ಈ ಕೀಟಗಳ ನಿಯಂತ್ರಣವಾಗುತ್ತದೆ.  

ಬೇವಿನ ಬೀಜಗಳನ್ನು ನೆನೆಸಿದ ದ್ರಾವಣ ಅಥವಾ ಬೇವಿನ ಎಣ್ಣೆ 5–10 ಮೀ.ಲೀ. ಪ್ರತಿ ಲೀಟರ್ ನೀರಿಗೆ ಬೆರೆಸಿ ಸಿಂಪಡಿಸಬಹುದು. ಕ್ವೀನಾಲ್ಫಾಸ್ ಅಥವಾ ಕ್ಲೋರೋಫೈರಿಫಾಸ್ ಅಥವಾ ಡೈಕೋರೋವಾಸ್ ಯಾವುದಾದರೂ ಒಂದನ್ನು 2 ಮೀ.ಲೀ. ಪ್ರತಿ ಲೀಟರ್ ನೀರಿಗೆ ಬೆರೆಸಿ ಸಿಂಪಡಿಸಬಹುದು.