ಅಂಕಲ್‌, ನಾವೆಲ್ಲಿ ಆಟ ಆಡೋದು?

ಬೆಂಗಳೂರು: ‘ಅಂಕಲ್‌, ಈ ವಾರ್ಡ್‌ನಲ್ಲಿ ನಾಲ್ಕೈದು ಪಾರ್ಕ್‌ಗಳಿವೆ. ಆದ್ರೆ, ನಮಗೆ ಆಡೋಕೆ ಇರೋದು ಇದೊಂದೇ ಮೈದಾನ. ಇವಾಗ ನೋಡಿದ್ರೆ ಇಲ್ಲಿ ವಾಕಿಂಗ್‌ ಟ್ರ್ಯಾಕ್ ಮಾಡೋಕೆ ಹೊರಟವ್ರೆ.  ಕೆಲವರು ಇಲ್ಲೇ ಕುಡ್ದು, ತಿಂದು ಮಾಡಬಾರದೆಲ್ಲ ಮಾಡ್ತಾರೆ. ಹಿಂಗಾದ್ರೆ ನಾವೆಲ್ಲಿ ಆಡೋದು ಹೇಳಿ. ಪ್ಲೀಸ್‌, ಈ ಮೈದಾನ ನಮಗೆ ಉಳಿಸಿಕೊಡಿ’

ಸಂಜಯನಗರದ ಆದಿತ್ಯ, ಯತಾರ್ಥ, ಅನುರಾಗ ಅವರು ಸ್ನೇಹಿತರೊಂದಿಗೆ  ಬಂದು ತುಂಬಿದ ಸಭೆಯ ಎದುರು  ತಮ್ಮ ಅಹವಾಲು ಹೇಳಿಕೊಂಡರು. ಭಾವಿ ಪ್ರಜೆಗಳ ಮನವಿಗೆ ಸ್ಪಂದಿಸಿದ ಶಾಸಕರು ಮಕ್ಕಳ ಬಳಕೆಗಾಗಿ ಮೈದಾನವನ್ನು ಮೀಸಲಿಡಲು ಅಗತ್ಯ ಕ್ರಮ ಕೈಗೊಳ್ಳುವುದಾಗಿ ಭರವಸೆ ನೀಡಿದರು.  ಆಗ ಸಭೆಯ ಕರತಾಡನ ಮುಗಿಲು ಮುಟ್ಟಿತು.

ಸಂಜಯನಗರದ ಅಮರಜ್ಯೋತಿ ಬಡಾವಣೆಯಲ್ಲಿರುವ ಬಿಬಿಎಂಪಿ ಮೈದಾನದಲ್ಲಿ ಶನಿವಾರ ‘ಪ್ರಜಾವಾಣಿ’ ಹಾಗೂ ‘ಡೆಕ್ಕನ್‌ ಹೆರಾಲ್ಡ್‌’ ಆಯೋಜಿಸಿದ್ದ ‘ಜನ­ಸ್ಪಂದನ’ ಕಾರ್ಯಕ್ರಮದಲ್ಲಿ ಈ ದೃಶ್ಯ ಕಂಡುಬಂತು. ಹೆಬ್ಬಾಳ ವಿಧಾನಸಭಾ ಕ್ಷೇತ್ರದ ಶಾಸಕ ಜಗದೀಶ್ ಕುಮಾರ್,  ಕ್ಷೇತ್ರದ ಭಾಗಗಳಾದ ರಾಧಾಕೃಷ್ಣ ಟೆಂಪಲ್‌ (ವಾರ್ಡ್‌ ನಂ–18ರ) ಪಾಲಿಕೆ ಸದಸ್ಯ ಡಿ.ವೆಂಕಟೇಶ್‌, ಸಂಜಯನಗರದ (ವಾರ್ಡ್‌ ನಂ –19ರ) ಪಾಲಿಕೆ ಸದಸ್ಯ ಎನ್‌.ಎಂ.ಕೃಷ್ಣಮೂರ್ತಿ, ವಿವಿಧ ಇಲಾಖೆಗಳ ಅಧಿಕಾರಿಗಳು ಮತ್ತು ಸ್ಥಳೀಯ ನಾಗರಿಕರು ಈ ‘ಜನಸ್ಪಂದನ’ದಲ್ಲಿ ಭಾಗವಹಿಸಿದ್ದರು.

ಈ ಸಂದರ್ಭದಲ್ಲಿ ಜನರ ಸಮಸ್ಯೆಗಳನ್ನು ಆಲಿಸಿದ ಶಾಸಕ ಜಗದೀಶ್ ಕುಮಾರ್ ಅವರು ಸಮಸ್ಯೆಗಳನ್ನು ಆದ್ಯತೆ ಮೆರೆಗೆ ಬಗೆಹರಿಸಲು ಆಶ್ವಾಸನೆ ಇತ್ತರು. ಕುಡಿಯುವ ನೀರು ಸಮರ್ಪಕವಾಗಿ ಪೂರೈಕೆಯಾಗುತ್ತಿಲ್ಲ, ತ್ಯಾಜ್ಯ ವಿಲೇವಾರಿ ಸರಿಯಾಗಿ ನಡೆಯುತ್ತಿಲ್ಲ, ಬೀದಿ ನಾಯಿ ಕಾಟ ಹೆಚ್ಚಾಗಿದೆ, ಹೊಸ ಬಸ್‌ ಓಡಿಸಿ, ಒಳಚರಂಡಿ ಸ್ವಚ್ಛಗೊಳಿಸಿ, ಉದ್ಯಾನ ಸೊರಗಿದೆ, ಪಾದಚಾರಿ ಮಾರ್ಗ ಅತಿಕ್ರಮಣ ತೆರವುಗೊಳಿಸಿ,  ಬೀದಿದೀಪ ವೇಳೆಗೆ ಸರಿಯಾಗಿ ಬೆಳಗಿಸಿ... ಹೀಗೆ ಜನರಿಂದ ಕೇಳಿಬಂದ ದೂರುಗಳಿಗೆ ಅಧಿಕಾರಿಗಳೊಂದಿಗೆ ಶಾಸಕರು ಸೇರಿ ಶೀಘ್ರದಲ್ಲಿ ಪರಿಹರಿಸುವ ವಚನವಿತ್ತರು.

ಅಧಿಕಾರಿಗಳು ನೀಡುತ್ತಿದ್ದ ಉತ್ತರಗಳಿಗೆ ತೃಪ್ತರಾಗದ ಕೆಲ ಹಿರಿಯ ನಾಗರಿಕರು ಅಧಿಕಾರಿಗಳನ್ನು ತರಾಟೆ ತೆಗೆದುಕೊಂಡರು. ತಮ್ಮ ಸಮಸ್ಯೆ ಪರಿಹಾರಕ್ಕೆ ಕಾಲಮಿತಿಯನ್ನು ವೇದಿಕೆ­ಯಲ್ಲಿಯೇ ಘೋಷಿಸಬೇಕೆಂದು ಪಟ್ಟು ಹಿಡಿದು ಕೆಲವರು ಅಧಿಕಾರಿಗಳಲ್ಲಿ ಭಯ ಮೂಡಿಸಿದರು.

ಜನಪ್ರತಿನಿಧಿ ಮತ್ತು ಅಧಿಕಾರಿಗಳ ದೂ.ಸಂಖ್ಯೆ: ಜಗದೀಶ್ ಕುಮಾರ್, ಶಾಸಕ– 9844260906, ಡಿ.ವೆಂಕಟೇಶ್‌, ವಾರ್ಡ್‌ 18ರ ಪಾಲಿಕೆ ಸದಸ್ಯ – 9243446179, ಎನ್‌.ಎಂ.ಕೃಷ್ಣಮೂರ್ತಿ, ವಾರ್ಡ್‌ 19ರ ಪಾಲಿಕೆ ಸದಸ್ಯ – 9480454138, ಎಸ್‌.ನರಸಿಂಹಯ್ಯ, ಸಂಜಯನಗರ ಪೊಲೀಸ್‌ ಠಾಣೆ ಸಬ್‌ ಇನ್‌ಸ್ಪೆಕ್ಟರ್‌ – 9448616334, ಟಿ.ಎಂ.ಸತೀಶ್, ಬಿಎಂಟಿಸಿ (ಉತ್ತರ) ಡಿಪೋ ಮ್ಯಾನೇಜರ್ – 7760991410, ಕೆ.ಬಿ.ರಾಮಕೃಷ್ಣ ರೆಡ್ಡಿ, ಬಿಎಂಟಿಸಿ ವಿಭಾಗೀಯ ಸಂಚಾರ ಅಧಿಕಾರಿ – 7760991333, ಹರೀಶ್‌ಕುಮಾರ್‌ ಡಿ., ಬಿಬಿಎಂಪಿ ಸಹಾಯಕ ಎಂಜಿನಿಯರ್ – 968668­2555,

ರಾಜಶೇಖರಪ್ಪ, ಜಲಮಂಡಳಿ ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್ – 9845444025, ಕೃಷ್ಣಪ್ಪ, ಬೆಸ್ಕಾಂ ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್ – 9449844644, ಬೆಸ್ಕಾಂ ಸೇವಾ ಕೇಂದ್ರ – 9449844696, ಎಂ.ಎಸ್.ಬಿರಾದಾರ್, ಬಿಬಿಎಂಪಿ ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್ – 9740826690, ದಾವಲ್, ಜಲಮಂಡಳಿ ಸಹಾಯಕ ಎಂಜಿನಿಯರ್‌ – 9900171178, ಎಸ್‌.ಪ್ರಭಾಕರ್, ಬಿಬಿಎಂಪಿ ಆರೋಗ್ಯಾಧಿಕಾರಿ –9739448723

ಸಮಸ್ಯೆ ಗಮನಕ್ಕೆ ತನ್ನಿ
ಇಡೀ ಹೆಬ್ಬಾಳ ವಿಧಾನಸಭಾ ಕ್ಷೇತ್ರದಲ್ಲಿ ಸಾರ್ವಜನಿಕ ಉಪಯೋಗದ ನಿವೇಶನಗಳನ್ನು (ಸಿ.ಎ. ಸೈಟ್) ಕಬಳಿಸಿರುವ ಭ್ರಷ್ಟರ ಸಂಪೂರ್ಣ ಮಾಹಿತಿ ಕಲೆ ಹಾಕಿದ್ದೇನೆ. ಮುಂದಿನ ವಾರ ಈ ಬಗ್ಗೆ ಲೋಕಾಯುಕ್ತ, ಬಿಡಿಎ ಮತ್ತು ಬಿಬಿಎಂಪಿಗೆ ದೂರು ನೀಡುತ್ತೇನೆ.