ಮುಂಬೈ: ಬಾಲಿವುಡ್ ನಟಿ ದೀಪಿಕಾ ಪಡುಕೋಣೆ ಅವರ ಸ್ತನಗಳ ಸೀಳು ತೋರಿಸುವ ವಿಡಿಯೊ ಪ್ರಕಟಿಸಿ ಅವರಿಂದ ತರಾಟೆಗೆ ಒಳಗಾಗಿದ್ದ ಜಾಲತಾಣ ಈಗ ಅದಕ್ಕೆ ಮಾರುತ್ತರ ನೀಡಿದೆ.
‘ದೀಪಿಕಾ ಪಡುಕೋಣೆ, ಇದು ಅಭಿನಂದನೆ. ನೀವು ಚೆನ್ನಾಗಿ ಕಾಣುತ್ತಿದ್ದೀರಿ. ಹಾಗಾಗಿ ಎಲ್ಲರೂ ಇದನ್ನು ನೋಡಬೇಕು ಎಂದು ನಾವು ಅಂದುಕೊಂಡಿದ್ದೆವು’ ಎಂದು ಆ ಸುದ್ದಿ ತಾಣ ಸೋಮವಾರ ಟ್ವೀಟ್ ಮಾಡಿದೆ.
ವಿವಾದ ಏನು?: ಭಾನುವಾರ ಇಂಗ್ಲಿಷ್ ಪತ್ರಿಕೆಯ ಜಾಲತಾಣವೊಂದು ‘ಚೆನ್ನೈ ಎಕ್ಸ್ಪ್ರೆಸ್’ ಸಿನಿಮಾ ಪ್ರಚಾರದ ಸಂದರ್ಭದಲ್ಲಿ ತೆಗೆಯಲಾಗಿದ್ದ ದೀಪಿಕಾ ಪಡುಕೋಣೆ ಅವರ ಚಿತ್ರವೊಂದನ್ನು ಪ್ರಕಟಿಸಿತ್ತು. ಈ ಚಿತ್ರದ ಜತೆ ದೀಪಿಕಾ ಅವರ ವಿವಿಧ ಭಾವಭಂಗಿಗಳಿದ್ದ ವಿಡಿಯೊಗೆ ಲಿಂಕ್ ನೀಡಿತ್ತು.
ಈ ಚಿತ್ರದ ಜತೆ ‘ಓ ಮೈ ಗಾಡ್..! ದೀಪಿಕಾ ಪಡುಕೋಣೆ ಸೀಳಿನ ಪ್ರದರ್ಶನ’ ಎಂದು ವಿವಾದಾತ್ಮಕ ಶಿರೋನಾಮೆ ನೀಡಲಾಗಿತ್ತು. ಇದರಿಂದ ಸಿಟ್ಟಿಗೆದ್ದ ದೀಪಿಕಾ, ಟ್ವಿಟರ್ನಲ್ಲಿ ಸುದ್ದಿತಾಣದ ವಿರುದ್ಧ ಹರಿಹಾಯ್ದಿದ್ದರು.
‘ಹೌದು..! ನಾನು ಮಹಿಳೆ, ನನಗೆ ಸ್ತನಗಳಿವೆ ಮತ್ತು ಸೀಳು ಇದೆ. ನಿಮಗೇನು ತೊಂದರೆ?’ ಎಂದು ಆಕ್ರೋಶದಿಂದ ಪ್ರತಿಕ್ರಿಯಿಸಿದ್ದರು.
ಕೆಲ ಸಮಯದ ನಂತರ ಟ್ವಿಟರ್ನಲ್ಲಿ ಮತ್ತೊಂದು ಹೇಳಿಕೆ ನೀಡಿ, ಮಹಿಳೆಯರನ್ನು ಗೌರವಿಸುವುದು ಗೊತ್ತಿರದಿದ್ದಲ್ಲಿ ‘ಮಹಿಳಾ ಸಬಲೀಕರಣ’ದ ವಿಚಾರದಲ್ಲಿ ದನಿ ಎತ್ತಬೇಡಿ ಎಂದೂ ಆ ಸುದ್ದಿತಾಣಕ್ಕೆ ಚುಚ್ಚಿದ್ದರು.
ದೀಪಿಕಾಗೆ ಬೆಂಬಲ ವ್ಯಕ್ತಪಡಿಸಿ ಬಾಲಿವುಡ್ ತಾರೆಯರಾದ ಪ್ರಿಯಾಂಕಾ ಚೋಪ್ರಾ, ಅನುಷ್ಕಾ ಶರ್ಮಾ, ಅಲಿಯಾ ಭಟ್, ಸೋನಂ ಕಪೂರ್, ಶಾರುಕ್ ಖಾನ್, ಅರ್ಜುನ್ ಕಪೂರ್ ಸೇರಿದಂತೆ ಹಲವು ನಟ, ನಟಿಯರು ಟ್ವೀಟ್ ಮಾಡಿದ್ದರು.