ಅಲ್ ಜಜೀರಾ ಟಿ.ವಿ. ಇಂಗ್ಲಿಷ್ ಸುದ್ದಿವಾಹಿನಿಯ ಮೂವರು ಪತ್ರಕರ್ತರಿಗೆ ಈಜಿಪ್ಟ್ನ ಕೈರೊದ ನ್ಯಾಯಾಲಯವೊಂದು ಸೆರೆವಾಸದ ಶಿಕ್ಷೆ ನೀಡಿದೆ. ಇವರಲ್ಲಿ ಆಸ್ಟ್ರೇಲಿಯಾದ ಪೀಟರ್ ಗ್ರೆಸ್ಟೆ ಹಾಗೂ ಈಜಿಪ್ಟ್ ಸಂಜಾತ ಕೆನಡಾ ಪ್ರಜೆ ಮೊಹಮದ್ ಫಾಹ್ಮಿಗೆ ಏಳು ವರ್ಷ ಸೆರೆವಾಸ ವಿಧಿಸಲಾಗಿದ್ದು ಈಜಿಪ್ಟ್ನ ಬಹೇರ್ ಮೊಹಮ್ಮದ್ಗೆ 10 ವರ್ಷಗಳ ಜೈಲುಶಿಕ್ಷೆ ವಿಧಿಸಲಾಗಿದೆ.
ಪ್ರತಿಭಟನಾ ಪ್ರದರ್ಶನವೊಂದರಲ್ಲಿ ಹಾರಿಸಲಾಗಿದ್ದ ಗುಂಡೊಂದನ್ನು ಸ್ಮರಣಿಕೆಯಾಗಿ ಆತ ತನ್ನ ಬಳಿ ಇರಿಸಿಕೊಂಡಿದ್ದೇ ಈ ಹೆಚ್ಚುವರಿ ಶಿಕ್ಷೆಗೆ ಕಾರಣ. ವರದಿಗಾರಿಕೆಯ ಕರ್ತವ್ಯವನ್ನು ನಿರ್ವಹಿಸಿದ್ದಕ್ಕಾಗಿ ಈ ಪತ್ರಕರ್ತರು ಈ ಶಿಕ್ಷೆಗೆ ಗುರಿಯಾಗಿರುವುದು ಎಲ್ಲಾ ಬಗೆಯ ಪ್ರತಿರೋಧಗಳನ್ನೂ ಹತ್ತಿಕ್ಕುವ ಹೊಸ ಪ್ರಯತ್ನ.
ಈಜಿಪ್ಟ್ನಲ್ಲಿ ಅಂತರ್ಯುದ್ಧ ನಡೆಯುತ್ತಿದೆ ಎಂಬಂತಹ ಸುಳ್ಳು ಚಿತ್ರಣಗಳನ್ನು ನೀಡಲಾಗಿದೆ ಎಂಬ ಆರೋಪವನ್ನು ಈ ಪತ್ರಕರ್ತರ ವಿರುದ್ಧ ಹೊರಿಸಲಾಗಿದೆ. ಅಲ್ಲದೆ ಭಯೋತ್ಪಾದನೆ ಸಂಬಂಧದಲ್ಲಿ ಬಹಿಷ್ಕೃತಗೊಂಡಿರುವ ಮುಸ್ಲಿಂ ಬ್ರದರ್ಹುಡ್ಗೆ ಬೆಂಬಲ ನೀಡಿದ್ದಾರೆಂದೂ ಆರೋಪಿಸಲಾಗಿದೆ. ಆದರೆ ಈ ಪತ್ರಕರ್ತರಿಗೆ ಶಿಕ್ಷೆ ವಿಧಿಸಲು ಒದಗಿಸಲಾದ ಸಾಕ್ಷ್ಯಗಳು ಅಸಂಗತವಾಗಿರುವುದಲ್ಲದೆ ಹಾಸ್ಯಾಸ್ಪದವೂ ಆಗಿವೆ ಎಂಬಂಥ ವ್ಯಾಪಕ ಟೀಕೆಗಳು ವ್ಯಕ್ತವಾಗಿವೆ. ಈ ಬೆಳವಣಿಗೆ ಕೇವಲ ಪತ್ರಕರ್ತರಿಗೆ ಮಾತ್ರ ಆತಂಕಕಾರಿಯಾದುದಲ್ಲ. ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನು ಹತ್ತಿಕ್ಕುವ ಈ ಕ್ರಮ ಈಜಿಪ್ಟ್ ನಾಗರಿಕರಲ್ಲೂ ಕಳವಳ ಉಂಟುಮಾಡು ವಂತಹದ್ದು. ಈಗಾಗಲೇ 16,000ಕ್ಕೂ ಹೆಚ್ಚು ಜನರು ರಾಜಕೀಯ ಕಾರಣಗಳಿಗಾಗಿ ಈಜಿಪ್ಟ್ನಲ್ಲಿ ಜೈಲುಗಳಲ್ಲಿದ್ದಾರೆ.
ಕಳೆದ ಡಿಸೆಂಬರ್ನಿಂದ ಈ ಪತ್ರಕರ್ತರು ಈಜಿಪ್ಟ್ನಲ್ಲಿ ಸೆರೆವಾಸದಲ್ಲೇ ಇದ್ದಾರೆ. ‘ಪತ್ರಿಕೋದ್ಯಮ ಅಪರಾಧವಲ್ಲ’ ಎಂದು ಘೋಷಿಸಿ ಬಂಧಿತ ಪತ್ರಕರ್ತರ ಬಿಡುಗಡೆಗಾಗಿ ವಿಶ್ವದಾದ್ಯಂತ ಪತ್ರಿಕಾ ಸ್ವಾತಂತ್ರ್ಯದ ಬೆಂಬಲಿಗರು ಕಳೆದ ಆರು ತಿಂಗಳಿಂದಲೂ ಪ್ರಚಾರಾಂದೋಲನ ನಡೆಸಿದ್ದರು. ಬಂಧಿತ ಪತ್ರಕರ್ತರ ಪರವಾಗಿ ‘ನ್ಯೂಯಾರ್ಕ್ ಟೈಮ್ಸ್’ ಪತ್ರಿಕೆ ಪುಟವೊಂದನ್ನು ಖಾಲಿ ಬಿಟ್ಟು ಪ್ರತಿಭಟನೆ ಸೂಚಿಸಿದೆ. ಖಾಲಿ ಬಿಟ್ಟ ಪುಟದ ಕೆಳಗಡೆ ಹೀಗೆ ಬರೆಯಲಾಗಿದೆ: ‘ಮುಕ್ತ ಪತ್ರಿಕೋದ್ಯಮದ ದನಿ ಉಡುಗಿದಲ್ಲಿ ಏನಾಗುತ್ತದೆ ಎಂಬುದರ ಸೂಚಕ ಇದು’. ನಿಜ. ಬಂಧಿತರು ಮೇಲ್ಮನವಿ ಸಲ್ಲಿಸಲು ಅವಕಾಶವಿದೆ. ಆದರೆ ಈ ಪ್ರಕ್ರಿಯೆ ಪೂರ್ಣಗೊಳ್ಳಲು ಅನೇಕ ವರ್ಷಗಳು ಹಿಡಿಯುತ್ತವೆ. ಈಜಿಪ್ಟ್ನ ಮಿಲಿಟರಿ ಬೆಂಬಲಿತ ಸರ್ಕಾರಕ್ಕೆ ಬೆಂಬಲ ನೀಡಿರುವ ಅಮೆರಿಕವೂ ಈ ತೀರ್ಪನ್ನು ಖಂಡಿಸಿ ಆತಂಕ ವ್ಯಕ್ತಪಡಿಸಿದೆ. ಈಜಿಪ್ಟ್ನ ತಳಮಳಕ್ಕೆ ಮುಕ್ತಾಯವೇ ಇಲ್ಲ ಎಂಬಂತಾಗಿರುವುದು ಶೋಚನೀಯ.
ಸರ್ವಾಧಿಕಾರಿ ಹೊಸ್ನಿ ಮುಬಾರಕ್ ಅವನತಿಯ ನಂತರ ಅಧಿಕಾರ ವಹಿಸಿಕೊಂಡ ಮೊರ್ಸಿ ಆಡಳಿತವೂ ಜನರಿಗೆ ನೆಮ್ಮದಿ ತರಲಿಲ್ಲ. ಕಳೆದ ವರ್ಷ ನಡೆದ ಕ್ಷಿಪ್ರಕ್ರಾಂತಿಯ ನೇತೃತ್ವ ವಹಿಸಿ, ಈಗ ಮೇ ತಿಂಗಳಲ್ಲಿ ನಡೆದ ಚುನಾವಣೆಯಲ್ಲಿ ಪುನರಾಯ್ಕೆ ಆಗಿರುವ ಅಧ್ಯಕ್ಷ ಅಬ್ದುಲ್ ಫತಾ ಅಲ್ – ಸಿಸಿ, ಮುಸ್ಲಿಂ ಬ್ರದರ್ಹುಡ್ ಸಂಘಟನೆಯನ್ನು ಬಗ್ಗುಬಡಿಯುವ ಉದ್ದೇಶ ಹೊಂದಿರುವುದು ಸ್ಪಷ್ಟ. ಈ ಪ್ರಕ್ರಿಯೆಯಲ್ಲಿ ಪತ್ರಿಕಾ ಸ್ವಾತಂತ್ರ್ಯವನ್ನು ಹತ್ತಿಕ್ಕುವಂತಹ ಇಂತಹ ಬೆಳವಣಿಗೆಗಳು ಅಪಾಯಕಾರಿ ಎಂಬುದನ್ನು ಅಂತರರಾಷ್ಟ್ರೀಯ ಸಮುದಾಯ ಗಂಭೀರವಾಗಿ ಪರಿಗಣಿಸಬೇಕಾಗಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.