ಫರ್ಗ್ಯುಸನ್ (ಅಮೆರಿಕ) (ಎಎಫ್‌ಪಿ): ‘ಫರ್ಗ್ಯುಸನ್ ಪ್ರಕರಣ’ದಲ್ಲಿ ಕೋರ್ಟ್ ತೀರ್ಪಿನ ವಿರುದ್ಧ ನಡೆಯುತ್ತಿರುವ ಪ್ರತಿಭಟನೆ ಅಮೆರಿಕದಾದ್ಯಂತ ಮುಂದುವರಿದಿದೆ. ಪ್ರತಿಭಟನಾಕಾರರು ಹಿಂಸಾಚಾರಕ್ಕೆ ಇಳಿದಿದ್ದು, 12 ಕಟ್ಟಡಗಳು, ವಾಹನಗಳಿಗೆ ಬೆಂಕಿ ಹಚ್ಚಿದ್ದಾರೆ.
ಫರ್ಗ್ಯುಸನ್‌ನಲ್ಲಿ ಜನಾಂಗೀಯ ಗಲಭೆ ಉಂಟಾಗಿರುವುದರಿಂದ ಎರಡು ಸಾವಿರಕ್ಕೂ ಹೆಚ್ಚು ಪೊಲೀಸರನ್ನು ಭದ್ರತೆಗೆ ನಿಯೋಜಿಸಲಾಗಿದೆ.
ಮಿಸ್ಸೋರಿಯ ಸೇಂಟ್‌ ಲೂಯಿಸ್‌ನಲ್ಲೂ ಪ್ರತಿಭಟನಾಕಾರರು ಪುರಭವನದ ಕಿಟಕಿ ಗಾಜುಗಳಿಗೆ ಒಡೆದು ಹಾಕಿದ್ದಾರೆ. ಪೊಲೀಸರ ಕಾರಿಗೆ ಬೆಂಕಿ ಹಚ್ಚಿ, ಕಲ್ಲು ತೂರಾಟ ನಡೆಸಿದ್ದಾರೆ. ಬಾಟಲ್‌ ಒಳಗೆ ಮೂತ್ರ ವಿಸರ್ಜಿಸಿ ಅದನ್ನು ಪೊಲೀಸರತ್ತ ತೂರಿದ್ದಾರೆ ಎನ್ನಲಾಗಿದೆ.
ನ್ಯೂಯಾರ್ಕ್‌ನಲ್ಲಿ ಸಾವಿರಾರು ಪ್ರತಿಭಟನಾಕಾರರು ರಸ್ತೆ, ರೈಲು ತಡೆ ನಡೆಸಿದ್ದಾರೆ. ಹಲವರನ್ನು ಬಂಧಿಸಲಾಗಿದೆ. ಲಾಸ್‌ ಏಂಜಲಿಸ್‌ ನಗರದಲ್ಲೂ ಪ್ರತಿಭಟನಾಕಾರರನ್ನು ಬಂಧಿಸಲಾಗಿದೆ. ವಾಷಿಂಗ್ಟನ್‌ನಲ್ಲಿ ಶ್ವೇತಭವನದ ಮುಂದೆ ಶಾಂತಿಯುತ ಪ್ರತಿಭಟನೆ ನಡೆದಿದೆ.
ಪಶ್ಚಿಮ ಕರಾವಳಿಯ ಆಕ್ಲೆಂಡ್‌ನಿಂದ ಪೂರ್ವದ ಅಟ್ಲಾಂಟ, ಫಿಲಿಡೆಲ್ಫಿಯಾ, ಬಾಲ್ಟಿಮೋರ್‌ ವರೆಗೂ ಪ್ರತಿಭಟನೆ ನಡೆದಿದೆ.ಹಿಂಸಾಚಾರಕ್ಕೆ ಇಳಿದಿರುವವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವುದಾಗಿ ಅಧ್ಯಕ್ಷ ಒಬಾಮ ಎಚ್ಚರಿಸಿದ್ದಾರೆ.
