ಢಾಕಾ (ಪಿಟಿಐ): ಅಮೆರಿಕದ ಜನಪ್ರಿಯ ಬ್ಲಾಗರ್ ಹಾಗೂ ಧಾರ್ಮಿಕ ತೀವ್ರವಾದಿಗಳ ವಿಮರ್ಶಕ ಅವಿಜಿತ್ ರಾಯ್ ಅವರ ಕೊಲೆ ಪ್ರಕರಣದ ಪ್ರಮುಖ ಆರೋಪಿಯೆನ್ನಲಾದ ಇಸ್ಲಾಮಿಕ್ ಮೂಲಭೂತವಾದಿಯೊಬ್ಬನನ್ನು ಬಾಂಗ್ಲಾದೇಶದ ಪೊಲೀಸರು ಸೋಮವಾರ ಬಂಧಿಸಿದ್ದಾರೆ.
ರಾಯ್ಗೆ ಹಲವು ಬಾರಿ ಆನ್ಲೈನ್ನಲ್ಲಿ ಕೊಲೆ ಬೆದರಿಕೆಯೊಡ್ಡಿದ್ದನ್ನು ವಿಚಾರಣೆ ವೇಳೆ ಬಂಧಿತ ಫರಾಬಿ ಶಫೀಯುರ್ ರಹಮಾನ್ ಒಪ್ಪಿಕೊಂಡಿದ್ದಾನೆ ಎಂದು ರ್್ಯಾಪಿಡ್ ಆ್ಯಕ್ಷನ್ ಬೆಟಾಲಿಯನ್ನ ಕಾನೂನು ಮತ್ತು ಮಾಧ್ಯಮ ವಿಭಾಗದ ನಿರ್ದೇಶಕ ಕಮಾಂಡರ್ ಮುಫ್ತಿ ಮಹ್ಮೂದ್ ಖಾನ್ ತಿಳಿಸಿದ್ದಾರೆ.
ಧಾರ್ಮಿಕ ತೀವ್ರವಾದಿಗಳ ವಿರುದ್ಧ ಕಟು ಟೀಕೆ ವ್ಯಕ್ತಪಡಿಸಿದ್ದ ರಾಯ್ ಕಳೆದ ವಾರ ಢಾಕಾದಲ್ಲಿ ಪತ್ನಿಯೊಂದಿಗೆ ಬರು-ತ್ತಿದ್ದ ವೇಳೆ ಅಮಾನುಷವಾಗಿ ಹತ್ಯೆ ಮಾಡಲಾಗಿತ್ತು. ಪತ್ನಿ ರಫೀದಾ ಅಹ್ಮದ್ ಬೋನ್ಯಾ ಅವರೂ ಘಟನೆಯಲ್ಲಿ ತೀವ್ರವಾಗಿ ಗಾಯಗೊಂಡಿದ್ದರು.
ಫರಾಬಿಯನ್ನು ಸೋಮವಾರ ಬೆಳಿಗ್ಗೆ ಇಲ್ಲಿನ ಜತ್ರಾಬರಿ ಬಸ್ ನಿಲ್ದಾಣದ ಬಳಿ ಬಂಧಿಸಲಾಯಿತು. ಚಿತ್ತಗಾಂಗ್ ವಿ.ವಿ ಭೌತವಿಜ್ಞಾನ ವಿಭಾಗದಿಂದ ಹೊರಬಿದ್ದಿದ್ದ ಫರಾಬಿ ಹಲವು ಬಾರಿ ಕೊಲೆ ಬೆದರಿಕೆ ಒಡ್ಡಿದ್ದರಿಂದ ರಾಯ್ ತಂದೆ ಪೊಲೀಸರ ಬಳಿ ಆತನ ಹೆಸರನ್ನು ಪ್ರಸ್ತಾಪಿಸಿದ್ದರು.
ಐದು ವರ್ಷಗಳ ಹಿಂದೆ ಫೇಸ್ಬುಕ್ ಮೂಲಕ ಪರಿಚಯವಾಗಿ ಪರಸ್ಪರ ಚರ್ಚೆ ನಡೆಸುತ್ತಿದ್ದರು ಎನ್ನಲಾಗಿದೆ.