ಆಸೆ ಆಕಾಂಕ್ಷೆಗಳ ಕಡೆಗಣಿಸಿ...

ಚೆನ್ನೈನ ವಿಪ್ರೋ ಕಂಪೆನಿಯಲ್ಲಿ ಕೆಲಸ ಮಾಡುತ್ತಿದ್ದ ದಿನಗಳು ಅವು. ಕಚೇರಿಯಲ್ಲಿ ಕೆಲಸ ಮಾಡುವಾಗ ಕಿವಿಯಲ್ಲಿ ಸದಾ ಗುಯ್‌ಗುಡುವ ಸದ್ದು. ಅದು ಎ.ಸಿ ಸದ್ದು ಎಂದು ಕೃಷ್ಣಮೂರ್ತಿಗೆ ಗೊತ್ತಿದ್ದರೂ ಅವರಿಗೆ ಅದು ಜೇನು ನೋಣಗಳ ಸದ್ದಿನಂತೆ ಭಾಸವಾಗುತ್ತಿತ್ತು!

ಅಂತಿಮವಾಗಿ ಆ ಸದ್ದು ಅವರನ್ನು ಯಶಸ್ವಿ ಜೇನು ಉದ್ಯಮಿಯನ್ನಾಗಿ ರೂಪಿಸಿದ್ದು ವಿಶೇಷ. ಕೃಷ್ಣಮೂರ್ತಿ ತಮಿಳುನಾಡಿನ ಕರೂರು ಜಿಲ್ಲೆಯವರು. ಹುಟ್ಟಿದ್ದು ಸಣ್ಣ ಹಳ್ಳಿಯಲ್ಲಿ. ಅಪ್ಪ ರೈತ. ಮಗನನ್ನು ಚೆನ್ನಾಗಿ ಓದಿಸಬೇಕು ಎಂಬ ಹಂಬಲ ಅವರಲ್ಲಿತ್ತು. ಹಾಗಾಗಿ ಕೃಷ್ಣ ಮೂರ್ತಿಯನ್ನು ವಸತಿ ಶಾಲೆಗಳಲ್ಲಿ ಓದಿಸಿದರು. ಸಾಫ್ಟ್‌ವೇರ್‌ ಎಂಜಿನಿಯರಿಂಗ್‌  ಪದವಿ ಪಡೆದ ಕೃಷ್ಣಮೂರ್ತಿಗೆ ವಿಪ್ರೋದಲ್ಲಿ ಕೆಲಸ ಸಿಕ್ಕಿತ್ತು. ಚೆನ್ನೈ ಕ್ಯಾಂಪಸ್‌ನಲ್ಲಿ ಎರಡು ವರ್ಷ ಕೆಲಸ ಮಾಡಿದರು. ಕಂಪೆನಿಯಿಂದ ಅಮೆರಿಕಕ್ಕೆ ಹೋಗುವ ಅವಕಾಶ ಸಿಕ್ಕಿತು. ಅದನ್ನು ತಿರಸ್ಕರಿಸಿದರು. ಕೊನೆಗೆ ಕೆಲಸಕ್ಕೂ ರಾಜೀನಾಮೆ ನೀಡಿದರು!

ಜಾಗತಿಕ ಹಣಕಾಸು ಹಿಂಜರಿತದ ಪರಿಣಾಮ ಕೆಲಸದಿಂದ ತೆಗೆದು ಹಾಕಿದರು ಎಂದು ಮನೆಯಲ್ಲಿ ಸುಳ್ಳು ಹೇಳಿದರು. ಸ್ಥಳೀಯ ಬ್ಯಾಂಕ್‌ನಲ್ಲಿ ಕೆಲಸ ಮಾಡುವಂತೆ ಕೃಷ್ಣಮೂರ್ತಿ ತಂದೆ ಸಲಹೆ ಕೊಟ್ಟರು. ಅದನ್ನೂ ತಿರಸ್ಕರಿಸಿ, ಕೊಯಮತ್ತೂರಿಗೆ ಬಂದು ಷೇರು ಮಾರುಕಟ್ಟೆಯಲ್ಲಿ ಹಣ ತೊಡಗಿಸಿದರು.  ಅಲ್ಲಿ ಒಂದು ಲಕ್ಷ ರೂಪಾಯಿ ನಷ್ಟವಾಯಿತು.

ಈ ಸೋಲಿನ ನಂತರ ತೋಟದಲ್ಲಿ ಜೇನುಕೃಷಿ ಮಾಡುವ ಬಗ್ಗೆ ಆಲೋಚಿಸಿದರು. ಈ ಬಗ್ಗೆ ವೈಜ್ಞಾನಿಕವಾಗಿ ತರಬೇತಿ ಪಡೆದರು. ಗೆಳೆಯರ ಬಳಿ 3 ಲಕ್ಷ ರೂಪಾಯಿ ಸಾಲ ಮಾಡಿ ಜೇನು ಸಾಕಾಣಿಕೆ ಆರಂಭಿಸಿದರು. ರಾಣಿ ಜೇನು ಅವರ ಕೈಹಿಡಿಯಿತು. ಇಂದು ಪ್ರತಿ ತಿಂಗಳು 5 ಕ್ವಿಂಟಾಲ್‌ ಜೇನು ತುಪ್ಪವನ್ನು ಮಾರಾಟ ಮಾಡುತ್ತಿದ್ದಾರೆ. ಮುಂದಿನ ದಿನಗಳಲ್ಲಿ ಈ ಉದ್ಯಮವನ್ನು ವಿಸ್ತರಿಸಿ ವಿದೇಶಗಳಿಗೂ ತುಪ್ಪವನ್ನು ರಫ್ತು ಮಾಡುವ ಕನಸು ಕೃಷ್ಣಮೂರ್ತಿ ಅವರದ್ದು.

ಕಂಡ ಕನಸನ್ನು ನನಸು ಮಾಡಿಕೊಂಡ ಕೃಷ್ಣಮೂರ್ತಿ ಅವರ ಸಾಧನೆ ಅನನ್ಯವಾದುದು. honeykart/Facebook


ಅಂಕಿತ್‌ ಫಾಡಿಯಾ

ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಮಹತ್ವಾಕಾಂಕ್ಷೆ ಯೋಜನೆಯಾದ ‘ಡಿಜಿಟಲ್‌ ಇಂಡಿಯಾ’ ಕಾರ್ಯಕ್ರಮಕ್ಕೆ ಯುವ ‘ಎಥಿಕಲ್‌ ಹ್ಯಾಕರ್‌’ ಅಂಕಿತ್‌ ಫಾಡಿಯಾ ಅವರನ್ನು ರಾಯಭಾರಿಯಾಗಿ ನೇಮಕ ಮಾಡಲಾಗಿದೆ.

ಚಿಕ್ಕ ವಯಸ್ಸಿಗೆ ಇಡೀ ವಿಶ್ವವೇ ಗುರುತಿಸಬಹುದಾದ ವಿಕ್ರಮಕ್ಕೆ ಅಂಕಿತ್‌  ಸಾಕ್ಷಿಯಾಗಿದ್ದಾರೆ. ಇದರ ಹಿಂದೆ ಅವರ ಓದು ಮತ್ತು ಪರಿಶ್ರಮ ಸಾಕಷ್ಟಿದೆ.
ಅಂಕಿತ್‌ ಮೂಲತಃ ದೆಹಲಿಯವರು. ಕಂಪ್ಯೂಟರ್‌ ಹ್ಯಾಕಿಂಗ್‌ನಲ್ಲಿ ವಿಶೇಷ ಪರಿಣತಿ ಪಡೆದಿದ್ದಾರೆ. ಭಾರತದ ಯಾವುದೋ ಮೂಲೆಯಲ್ಲಿ ಕುಳಿತು ಅಮೆರಿಕದ ಶ್ವೇತಭವನದಲ್ಲಿರುವ ಕಂಪ್ಯೂಟರ್‌ಗಳಿಂದ ಮಾಹಿತಿಯನ್ನು ಸುಲಭವಾಗಿ ಹೆಕ್ಕಿ ತೆಗೆಯಬಹುದಾದ ಚಾಕಚಕ್ಯತೆ ಅಂಕಿತ್‌ಗೆ ಸಿದ್ಧಿಸಿದೆ.

ಅವರು ಹ್ಯಾಕಿಂಗ್‌ ವೃತ್ತಿಯನ್ನು ಎಂದಿಗೂ ದುರುಪಯೋಗಪಡಿಸಿಕೊಂಡಿಲ್ಲ. ಬದಲಿಗೆ ಅಪರಾಧಿಗಳ ಪತ್ತೆಗಾಗಿ ಹ್ಯಾಕಿಂಗ್‌ ಮಾಡುತ್ತಿದ್ದಾರೆ. ಪ್ರಸ್ತುತ ಭಾರತದ ಗುಪ್ತಚರ ಇಲಾಖೆಯಲ್ಲಿ ಅಂಕಿತ್‌ ಕೆಲಸ ಮಾಡುತ್ತಿದ್ದಾರೆ.

ಹ್ಯಾಕಿಂಗ್‌ ಕುರಿತಂತೆ ಅಂಕಿತ್‌ 13ನೇ ವಯಸ್ಸಿಗೆ ಬರೆದ ‘The Unofficial Guide to Ethical Hacking’ ಪುಸ್ತಕ ವಿಶ್ವದಲ್ಲೇ ಭಾರೀ ಜನಪ್ರಿಯಗೊಂಡಿದೆ. ಈ ಪುಸ್ತಕದ 75 ಲಕ್ಷ ಪ್ರತಿಗಳು ಭಾರತ ಸೇರಿದಂತೆ ವಿಶ್ವದಾದ್ಯಂತ ಮಾರಾಟವಾಗಿರುವುದು ವಿಶೇಷ. ಅಂಕಿತ್‌ ಇಲ್ಲಿಯವರೆಗೂ ಒಟ್ಟು ಹದಿನಾಲ್ಕು ಪುಸ್ತಕಗಳನ್ನು ಬರೆದಿದ್ದಾರೆ. ಈ ಎಲ್ಲಾ ಪುಸ್ತಕಗಳು ಹ್ಯಾಕಿಂಗ್‌ಗೆ ಸಂಬಂಧಿಸಿದ ಪುಸ್ತಕಗಳಾಗಿವೆ. ಸದ್ಯ ‘How to hack into Windows Vista and Windows 7’ ಎಂಬ ಪುಸ್ತಕ ಬರೆಯುವ ಸಿದ್ಧತೆಯಲ್ಲಿದ್ದಾರೆ.

ಇದೀಗ ಡಿಜಿಟಲ್‌ ಇಂಡಿಯಾಗೆ ರಾಯಭಾರಿಯಾಗಿ ನೇಮಕಗೊಂಡಿರುವುದು ಖುಷಿ ತಂದಿದೆ ಎನ್ನುವ ಅಂಕಿತ್‌ ಸೈಬರ್‌ ಅಪರಾಧ ವಿಭಾಗದಲ್ಲಿ ಹೆಚ್ಚು ಕೆಲಸ ಮಾಡಬೇಕಿದೆ ಎನ್ನುತ್ತಾರೆ. ‘ಓದು ಮತ್ತು ಕಠಿಣ ಪರಿಶ್ರಮ ನನ್ನನ್ನು ಈ ಮಟ್ಟಕ್ಕೆ ಬೆಳೆಸಿದೆ. ಈ ಎರಡು ಅಂಶಗಳೇ ನನ್ನ ಯಶಸ್ಸಿನ ಸೂತ್ರಗಳು’ ಎನ್ನುತ್ತಾರೆ ಅಂಕಿತ್‌. ankitfadia/facebook