ಈರುಳ್ಳಿ ಧಾರಣೆ ಏರಿಳಿತವೂ ರಾಜಕೀಯ ಲಾಬಿಯೂ...

ಉತ್ತರಪ್ರದೇಶ, ಒಡಿಶಾ, ಪಶ್ಚಿಮ ಬಂಗಾಳದಲ್ಲೂ ಈರುಳ್ಳಿ ಹಂಗಾಮು ಆರಂಭವಾಗುವುದರಿಂದ ಉತ್ತರಭಾರತದಿಂದಲೂ ಬೇಡಿಕೆ ಇಲ್ಲವಾಗುತ್ತದೆ. ಈ ಅವಧಿಯಲ್ಲಿ ರಫ್ತಿಗೆ ನಿಷೇಧ ಇರುವುದರಿಂದ ಬೆಲೆ ದಿಢೀರ್ ಕುಸಿಯಲು ಆರಂಭಿಸಿ ರೈತರ ಆಕ್ರೋಶ ಭುಗಿ ಲೇಳುತ್ತದೆ. ‘ಕೆಲವೊಮ್ಮೆ ರಫ್ತಿಗೆ ಅವಕಾಶ ಕೊಟ್ಟರೂ ಅದಕ್ಕೆ ನಿಗದಿಪಡಿಸುವ ಅರ್ಹತೆ ಗಳಿಸಲು ಸಾಧ್ಯವಾಗು ವುದಿಲ್ಲ. ಮಹಾರಾಷ್ಟ್ರದಲ್ಲಿ ಫಸಲು ಇದ್ದಾಗ ಕ್ವಿಂಟಲ್‌ಗೆ 200 ಡಾಲರ್ (₨12,300) ನಿಗದಿಗೊಳಿಸಿ ರಫ್ತಿಗೆ ಅವಕಾಶ ನೀಡುವ ಕೇಂದ್ರ ಸರ್ಕಾರ ಅದೇ ರಾಜ್ಯದಲ್ಲಿ ಫಸಲು ಇದ್ದ ಅವಧಿಯಲ್ಲಿ ಕ್ವಿಂಟಲ್‌ಗೆ 500 ಡಾಲರ್‌ನ(₨30,750) ಮಿತಿ ನಿಗದಿ ಮಾಡುತ್ತದೆ. ಆ ಗುಣಮಟ್ಟವೂ ಇಲ್ಲದೆ, ಬೆಲೆಯೂ ಸಿಗದೆ ರಫ್ತು ಮಾಡಲು ಸಾಧ್ಯವಾಗುವುದಿಲ್ಲ’ ಎಂದು ಹುಬ್ಬಳ್ಳಿ ಎಪಿಎಂಸಿಯ ಈರುಳ್ಳಿ ವರ್ತಕರ ಸಂಘದ ಅಧ್ಯಕ್ಷ ಸಲೀಂ ಬ್ಯಾಹಟ್ಟಿ ಅಭಿಪ್ರಾಯ­ಪಡುತ್ತಾರೆ.

ಈ ವರ್ಷ ಪಾಕಿಸ್ತಾನ, ಬಾಂಗ್ಲಾದೇಶದಿಂದ ಈರುಳ್ಳಿ ಆಮದು ಮಾಡಿಕೊಳ್ಳಲು ಸರ್ಕಾರ ಅವಕಾಶ ಮಾಡಿ ಕೊಟ್ಟಿದೆ. ಉತ್ತರ ಭಾರತದ ವ್ಯಾಪಾರಿಗಳಿಗೆ ಇಲ್ಲಿಂದ ಈರುಳ್ಳಿ ಒಯ್ಯುವುದಕ್ಕಿಂತ ಅಲ್ಲಿಂದ ತರಿಸಿಕೊಳ್ಳು ವುದೇ ಸುಲಭ. ಹಾಗಾಗಿ ಪ್ರತಿ ವರ್ಷ ದೆಹಲಿ ಭಾಗದಿಂದ ಇರುತ್ತಿದ್ದ ಅಲ್ಪಸ್ವಲ್ಪ ಬೇಡಿಕೆ ಈ ಬಾರಿ ಇಲ್ಲದಂತಾಗಿದೆ ಎಂದು ಬ್ಯಾಹಟ್ಟಿ ಹೇಳುತ್ತಾರೆ.

ಅಕ್ಟೋಬರ್ ಮಧ್ಯಭಾಗದಿಂದ ಡಿಸೆಂಬರ್‌ವರೆಗೆ ಇಲ್ಲಿನ ಫಸಲು ಹೆಚ್ಚಿನ ಪ್ರಮಾಣದಲ್ಲಿ ಮಾರುಕಟ್ಟೆಗೆ ಬರುವುದರಿಂದ ಈ ಅವಧಿಯಲ್ಲಾದರೂ ಇಲ್ಲಿನ ಈರುಳ್ಳಿಯ ಗುಣಮಟ್ಟಕ್ಕೆ ತಕ್ಕಂತೆ ‘ಅರ್ಹತೆ’ ನಿಗದಿ ಗೊಳಿಸಿ ರಫ್ತಿಗೆ ಅವಕಾಶ ನೀಡಲಿ ಎಂಬುದು ರಾಜ್ಯದ ರೈತರ ಬೇಡಿಕೆ. ಆದರೆ ಅದಕ್ಕೆ ‘ರಾಜಕೀಯ ಲಾಬಿ’ಯ ಒತ್ತಾಸೆ ಸಿಗದೇ ಬೀದಿಗಿಳಿಯುವುದು ಇತ್ತೀಚಿನ ವರ್ಷಗ ಳಲ್ಲಿ ಸಾಮಾನ್ಯವಾಗಿದೆ.

ಮಹಾರಾಷ್ಟ್ರದಲ್ಲಿ ಬೆಳೆಯುವ ಭೀಮಾ ತಳಿಯ (ಭೀಮಾ ಶಕ್ತಿ, ಭೀಮಾ ಗೋಲ್ಡ್) ಈರುಳ್ಳಿ ಕಂದು ಬಣ್ಣ ಹೊಂದಿದ್ದು, ದೊಡ್ಡ ಗಾತ್ರ ಹೊಂದಿದೆ. ತೇವಾಂಶ ಪ್ರಮಾಣ ಕಡಿಮೆ ಇರುವುದರಿಂದ ಚೆನ್ನಾಗಿ ಒಣಗಿಸಿದರೆ ಕನಿಷ್ಠ ಮೂರು ತಿಂಗಳು  ಕಾಲ ಕೆಡದಂತೆ ಸಂರಕ್ಷಿಸಿ ಇಡಬಹುದು. ಇದಕ್ಕೆ ಪೂರಕವಾಗಿ ಅಲ್ಲಿನ ಬೆಳೆಗಾರರೇ ಸಹಕಾರಿ ತತ್ವದ ಅಡಿ ವೈಜ್ಞಾನಿಕ ದಾಸ್ತಾನು ಕೇಂದ್ರಗಳನ್ನು ಸ್ಥಾಪಿಸಿಕೊಂಡಿದ್ದಾರೆ. ಈ ಕೇಂದ್ರಗಳಿಗೆ ಸಹಾಯಧನ, ಭೂಮಿ ಉಚಿತವಾಗಿ ನೀಡಿರುವ ಅಲ್ಲಿನ ಸರ್ಕಾರ ಮುಂಬೈ ಸಮೀಪದ ರಸೆಲ್‌ಗಾಂವ್‌ ಬಳಿ ಅತ್ಯಾಧುನಿಕ ಈರುಳ್ಳಿ ಸಂಗ್ರಹಣಾ ಕೇಂದ್ರವನ್ನು ಸ್ಥಾಪಿಸಿ ರೈತರಿಗೆ ನೆರವಾಗಿದೆ.

ಕರ್ನಾಟಕ, ಆಂಧ್ರಪ್ರದೇಶದಲ್ಲಿ ಅರ್ಕಾ ಕಲ್ಯಾಣ, ಅರ್ಕಾ ಕೇತನ್, ಪೂಸಾ ಮಾಧವಿ, ಬಳ್ಳಾರಿ ರೆಡ್, ಬಸವಂತ–780, ಲೈನ್‌–28 ತಳಿಯ ಈರುಳ್ಳಿ ಬೆಳೆಯಲಾಗುತ್ತಿದೆ. ಮುಂಗಾರು ಹಂಗಾಮಿನ ಪೀಕು ಆಗಿರುವುದರಿಂದ ಗಡ್ಡೆಯಲ್ಲಿ ತೇವಾಂಶದ ಪ್ರಮಾಣವೂ ಹೆಚ್ಚಿರುತ್ತದೆ. ಈ ತಳಿಗಳ ಈರುಳ್ಳಿಯನ್ನು 15 ದಿನ ಮಾತ್ರ ಕೆಡದಂತೆ ಸಂರಕ್ಷಿಸಿಡಬಹುದಾಗಿದೆ. ಮುಂಗಾರೋತ್ತರ ಅವಧಿಯಾದ್ದರಿಂದ ಕೊಯ್ಲಿನ ಸಂದರ್ಭದಲ್ಲಿ ಮಳೆ ಸಾಮಾನ್ಯ. ಇದರಿಂದ ಫಸಲು ಕೊಳೆಯುವುದು ಸಾಮಾನ್ಯ.  ದೀರ್ಘ ಕಾಲ ಈರುಳ್ಳಿ ಸಂರಕ್ಷಿಸಿಡಲು ವೈಜ್ಞಾನಿಕ ಸಂಗ್ರಹಾಗಾರಗಳು ಇಲ್ಲ. ಕೊಯ್ದ ಮೇಲೆ ಸಂಗ್ರಹಿಸಿಡುವ ಹವ್ಯಾಸವೂ ಇಲ್ಲಿನ ರೈತರಲ್ಲಿ ಇಲ್ಲ. ಹೊಲದಿಂದ ನೇರ ಮಾರುಕಟ್ಟೆಗೆ ಕೊಂಡೊಯ್ದು ಮಾರಾಟ ಮಾಡಬೇಕಾದ ಒತ್ತಡ ಅವರದ್ದು ಎನ್ನುತ್ತಾರೆ ಹುಬ್ಬಳ್ಳಿ ಎಪಿಎಂಸಿ ಪ್ರಾಂಗಣ­ದಲ್ಲಿ ಇರುವ ರಾಷ್ಟ್ರೀಯ ತೋಟಗಾರಿಕೆ ಸಂಶೋಧನೆ ಮತ್ತು ಅಭಿವೃದ್ಧಿ ಪ್ರತಿಷ್ಠಾನದ ಸಹಾಯಕ ನಿರ್ದೇಶಕ ಅಲೋಕ್‌ಕುಮಾರ್ ಸಿಂಗ್.

ಬೆಳೆಗಾರರ ಈ ದೌರ್ಬಲ್ಯ ಬಳಸಿಕೊಳ್ಳುವ ವರ್ತಕರು ಬಾಯಿಗೆ ಬಂದಷ್ಟು ಬೆಲೆ ನಿಗದಿ ಮಾಡುತ್ತಾರೆ. ಇನ್ನು ಈರುಳ್ಳಿ ಗುಣಮಟ್ಟದ ಆಧಾರದ ಮೇಲೆ ಬೆಲೆ ನಿಗದಿಗೊಳಿಸಲಾಗುತ್ತದೆ. ಇದಕ್ಕೂ ಯಾವುದೇ ವೈಜ್ಞಾನಿಕ ಮಾನದಂಡ ಇಲ್ಲ. ದಲ್ಲಾಳಿ ಹಾಗೂ ಖರೀದಿದಾರರ ಮೂಗಿನ ನೇರಕ್ಕೆ ಬೆಲೆ ನಿಗದಿ ಮಾಡಲಾಗುತ್ತದೆ. ಈ ಅಸಹಾಯಕತೆ ಬೆಳೆಗಾರರಲ್ಲಿ ಹತಾಶೆ ಸೃಷ್ಟಿಸಿ ಪದೇ ಪದೇ ಗದ್ದಲಕ್ಕೆ ದಾರಿಯಾಗುತ್ತಿದೆ.

ಬೆಂಬಲ ಬೆಲೆಗೆ ಮೀನಾಮೇಷ...
ಪ್ರತಿ ವರ್ಷ ಈರುಳ್ಳಿ ಬೆಲೆ ಕುಸಿದಾಗ ಬೆಂಬಲ ಬೆಲೆಯಡಿ ಖರೀದಿ ಕೇಂದ್ರ ಆರಂಭಿಸುತ್ತಿದ್ದ ಸರ್ಕಾರ ಈ ಬಾರಿ ಮೀನಾಮೇಷ ಎಣಿಸುತ್ತಿದೆ. ಈ ವರ್ಷ ಅತಿವೃಷ್ಟಿಗೆ ಹೆಚ್ಚಿನ ಪ್ರಮಾಣದಲ್ಲಿ ಬೆಳೆ ಹಾಳಾಗಿದ್ದು, ಖರೀದಿ ಕೇಂದ್ರ ತೆರೆಯುವುದರಿಂದ ಉಪಯೋಗ­ವಿಲ್ಲ. ಬದಲಿಗೆ ಹಾನಿಯಾದ ಬೆಳೆಗೆ ಈಗಾಗಲೇ ಪರಿಹಾರ ಘೋಷಿಸಲಾಗಿದೆ ಎಂಬುದು ಸರ್ಕಾರದ ನಿಲುವಾಗಿದೆ. ಈಗಾಗಲೇ ಬೆಂಬಲ ಬೆಲೆಯಲ್ಲಿ ಟೊಮೆಟೊ ಖರೀದಿಸಿ ಕೈ ಸುಟ್ಟು­ಕೊಂಡಿ­ರುವ ಸರ್ಕಾರ ಈರುಳ್ಳಿ ಖರೀದಿಗೆ ಮುಂದಾ­ಗುತ್ತಿಲ್ಲ. ದಾಸ್ತಾನು ಕೇಂದ್ರಗಳ ಕೊರತೆ­ಯಿಂದ ನಾಳೆ ರೈತರಿಂದ ಖರೀದಿಸಿದ ಈರುಳ್ಳಿಯನ್ನು ತಿಪ್ಪೆಗೆ ಸುರಿಯ­ಬೇಕಾದೀತು ಎಂದು ಎಚ್ಚರಿಕೆಯ ಹೆಜ್ಜೆ ಇಡುತ್ತಿದೆ ಎಂಬುದು ತೋಟಗಾರಿಕೆ ಇಲಾಖೆಯ ಹಿರಿಯ ಅಧಿಕಾರಿಯೊಬ್ಬರ ಅಭಿಮತ.