ಈ ಸರಣಿ ಯಾರಿಗಾಗಿ...?

ಭಾರತ-ಲಂಕಾ ನಡುವೆ ತುರ್ತಾಗಿ ಆಯೋಜಿಸಲಾಗಿರುವ ಏಕದಿನ ಸರಣಿ ಹಲವು ಪ್ರಶ್ನೆಗಳನ್ನು ಮುಂದಿ­­ಟ್ಟಿದೆ. ವೇತನ ಸಮಸ್ಯೆ­ಯಿಂದಾಗಿ ವಿಂಡೀಸ್‌ ತಂಡದವರು ಸರಣಿ ಮಧ್ಯದಲ್ಲಿಯೇ ನಿರ್ಗಮಿಸಿ­ದ್ದರಿಂದ ಉಂಟಾದ ಆರ್ಥಿಕ ನಷ್ಟವನ್ನು ಭರಿಸಲು ಬಿಸಿಸಿಐ ಈ ನಿರ್ಧಾರ ತೆಗೆದುಕೊಂಡಿದೆ. ಮತ್ತೊಂದೆಡೆ ಲಂಕಾ ಪಾಲಿಗೆ ‘ವೈದ್ಯ ಹೇಳಿದ್ದೂ ಹಾಲು ಅನ್ನ, ರೋಗಿ ಬಯಸಿದ್ದೂ ಹಾಲು ಅನ್ನ’ ಎಂಬಂತಾಗಿದೆ. ಆದರೆ, ನಿಜವಾಗಿಯೂ ಈ ಸರಣಿಯ ಹಿಂದಿನ ಉದ್ದೇಶವೇನು...?

ಇದು ಕ್ರಿಕೆಟ್‌ ಜಗತ್ತಿನಲ್ಲಿ ಬಿಸಿಸಿಐ ಹೊಂದಿರುವ ಪ್ರಭಾವಕ್ಕೊಂದು ಅತ್ಯುತ್ತಮ ಉದಾಹರಣೆೆ!
ಏಕೆಂದರೆ ವೇತನ ಸಮಸ್ಯೆಯಿಂದಾಗಿ ವೆಸ್ಟ್‌ಇಂಡೀಸ್‌ ತಂಡದವರು ಸರಣಿ ಮಧ್ಯದಲ್ಲಿಯೇ ನಿರ್ಗಮಿಸಿದ ಕೆಲವೇ ಗಂಟೆಗಳಲ್ಲಿ ಭಾರತ ಕ್ರಿಕೆಟ್‌ ನಿಯಂತ್ರಣ ಮಂಡಳಿಯು (ಬಿಸಿಸಿಐ) ನೆರೆಯ ಶ್ರೀಲಂಕಾದೊಂದಿಗೆ ಏಕದಿನ ಸರಣಿ ಆಡಲು ಒಪ್ಪಂದ ಕುದುರಿಸಿಯಾಗಿತ್ತು.
ಕೆಲ ದೇಶಗಳು ಕ್ರಿಕೆಟ್‌ ಆಡಲು ಭಾರತದವರ ಆಹ್ವಾನವನ್ನು ಬಾಯಿಬಿಟ್ಟುಕೊಂಡೇ ಎದುರು ನೋಡು ತ್ತಿರುವ ಕಾಲವಿದು. ಇನ್ನು ಆರ್ಥಿಕ ಪರಿಸ್ಥಿತಿ ಚಿಂತಾಜನಕ ವಾಗಿರುವ ಲಂಕಾ ಕ್ರಿಕೆಟ್‌ ಮಂಡಳಿಯು ಚಿನ್ನದಂಥ ಈ ಅವಕಾಶ ತಪ್ಪಿಸಿಕೊಳ್ಳುವುದೇ?  ಕ್ಷಣಮಾತ್ರದಲ್ಲಿ ಒಪ್ಪಿಗೆ ಸೂಚಿಸಿತು.

ಆದರೆ, ಇದ್ದಕ್ಕಿದ್ದಂತೆ ಸರಣಿಯಲ್ಲಿ ಆಡಲು ಒಪ್ಪಿಗೆ ಸೂಚಿಸಿರುವ ಲಂಕಾ ಕ್ರಿಕೆಟ್ ಮಂಡಳಿಯ ಕ್ರಮವನ್ನು ಆ ದೇಶದ ಹಿರಿಯ ಹಾಗೂ ಮಾಜಿ ನಾಯಕ ಕುಮಾರ ಸಂಗಕ್ಕಾರ ಅವರೇ ಹಿಗ್ಗಾಮುಗ್ಗಾ ಟೀಕಿಸಿದ್ದಾರೆ. ಸಾಮಾ ಜಿಕ ಜಾಲತಾಣಗಳಲ್ಲಿ ಕೂಡ ಟೀಕಾ ಪ್ರಹಾರ ಹರಿ ಯುತ್ತಿದೆ. ಬಿಸಿಸಿಐ ಕ್ರಮವೂ ಟೀಕೆಗೆ ಒಳಗಾಗಿದೆ.

ಇದಕ್ಕೆ ಕಾರಣ ಉಭಯ ದೇಶಗಳ ನಡುವೆ ಇತ್ತೀಚೆಗೆ ನಡೆದಿರುವ ವಿಪರೀತ ಸರಣಿಗಳು. ಇತ್ತೀಚೆಗೆ ಈ ಎರಡು ದೇಶಗಳ ನಡುವೆ ವರ್ಷಕ್ಕೆ 3-4 ಸರಣಿ ಖಚಿತ ಎನ್ನುವಂತಾಗಿದೆ. ಜೊತೆಗೆ ತ್ರಿಕೋನ ಸರಣಿ ಹಾಗೂ ಐಸಿಸಿ ಆಯೋಜಿಸುವ ವಿವಿಧ ಟೂರ್ನಿಗಳಲ್ಲಿ ಆಡುತ್ತಿವೆ. ಉಭಯ ದೇಶಗಳು ಪದೇ ಪದೇ ಮುಖಾಮುಖಿ ಯಾಗುತ್ತಿರುವುದು ಹೆಚ್ಚಿನ ಪ್ರೇಕ್ಷಕರಿಗೆ ಬೇಸರ ಉಂಟು ಮಾಡಿದೆ. ಇವೆಲ್ಲದರ ನಡುವೆ ಬರೋಬ್ಬರಿ ಎರಡು ತಿಂಗಳು ನಡೆಯುವ ಐಪಿಎಲ್‌ ಬೇರೆ.

‘ಭಾರತ ಹಾಗೂ ಲಂಕಾ ತಂಡಗಳಿಗೆ ತಿಂಗಳ ಪಾಸ್‌ ನೀಡುವುದೇ ಒಳ್ಳೆಯದು’, ‘ಮತ್ತೊಂದು ಬೋರು ಹೊಡೆಸುವ ಸರಣಿ’, ‘ಮತ್ತೊಮ್ಮೆ ರಿಪ್ಲೇ ಶುರು ವಾಯಿತಾ?’, ‘ಅದೇ ಪಿಚ್‌ಗಳು, ಅದೇ ತಂಡಗಳು’, ‘ಅದೇ ರಾಗ ಅದೇ ಹಾಡು...’ ಎಂಬಿತ್ಯಾದ ತಮಾಷೆಯ ಪ್ರತಿಕ್ರಿಯೆಗಳು ಟ್ವಿಟರ್‌, ಫೇಸ್‌ಬುಕ್‌ನಲ್ಲಿ ಹರಿದಾಡುತ್ತಿವೆ.  ‘ಕೆಲವೇ ತಿಂಗಳಲ್ಲಿ ಆಸ್ಟ್ರೇಲಿಯ ಮತ್ತು ನ್ಯೂಜಿಲೆಂಡ್‌­ನಲ್ಲಿ ಏಕದಿನ ವಿಶ್ವಕಪ್‌ ಶುರುವಾಗಲಿದೆ. ಅದಕ್ಕಾಗಿ ನಾವೆಲ್ಲಾ ಆರು ವಾರಗಳ ಫಿಟ್‌ನೆಸ್‌ ಶಿಬಿರದಲ್ಲಿ ಪಾಲ್ಗೊಂಡಿದ್ದೇವೆ. ಇಂಥ ಸಮಯದಲ್ಲಿ ಈ ಸರಣಿ ಅಗತ್ಯವಿತ್ತೇ? ಏಕಾಏಕಿ ಶಿಬಿರವನ್ನು ಕೈಬಿಟ್ಟು ಸರಣಿ ಆಯೋಜಿಸಿದ್ದೇಕೆ?’ ಎಂದು ಸಂಗಕ್ಕಾರ ಪ್ರಶ್ನಿಸಿದ್ದಾರೆ.

ಇತ್ತ ಲಂಕಾ ಕ್ರಿಕೆಟ್‌ ಮಂಡಳಿ ತನ್ನ ಕ್ರಮವನ್ನು ಸಮ ರ್ಥಿಸಿಕೊಂಡಿದೆ. ‘ಇದು ಆಟದ ಹಿತದೃಷ್ಟಿ ಇಟ್ಟುಕೊಂಡು ತೆಗೆದುಕೊಂಡ ನಿರ್ಧಾರ’ ಎಂದು ಸಂಗಕ್ಕಾರ ಅವರಿಗೆ ತಿರುಗೇಟು ನೀಡಿದೆ. ಭಾರತ ಹಾಗೂ ಶ್ರೀಲಂಕಾ ತಂಡಗಳು ಪದೇ ಪದೇ ಮುಖಾಮುಖಿಯಾಗುತ್ತಿರು ವುದರಿಂದ ಉಭಯ ದೇಶ­ಗಳ ನಡುವಿನ ಪೈಪೋಟಿ ಆಸಕ್ತಿ ಕಳೆದು­ಕೊಂಡಿರುವುದು ನಿಜ. ಜೊತೆಗೆ ಆಟಗಾರರನ್ನು ಹೈರಾಣಾಗಿಸಿದೆ.

ವಿಂಡೀಸ್‌ ತಂಡದವರು ಸರಣಿಯನ್ನು ಅರ್ಧದಲ್ಲೇ ಮೊಟಕುಗೊಳಿಸಿ ತವರಿಗೆ ಮರಳಿದ್ದರಿಂದ ಸುಮಾರು ₨400 ಕೋಟಿ ನಷ್ಟವಾಗಿದೆ ಎಂಬುದು ಬಿಸಿಸಿಐ ವಾದ. ಅದನ್ನು ಕೊಂಚವಾದರೂ ಸರಿದೂಗಿ­ಸಲು ಲಂಕಾ ಎದುರಿನ ಸರಣಿ ನೆರವಾಗಲಿದೆ ಎಂಬುದು ಮಂಡಳಿಯ ನಿಲುವು. ಆದರೆ, ಸತತ ಕ್ರಿಕೆಟ್‌ ಆಡಿ ದಣಿದಿರುವ ಆಟಗಾರರಿಗೆ ಈ ನೆಪದಲ್ಲಾದರೂ ವಿಶ್ರಾಂತಿ ನೀಡಬಹು ದಿತ್ತಲ್ಲವೇ ಎಂಬುದು ಕ್ರಿಕೆಟ್‌ ವಿಶ್ಲೇಷಕರ ವಾದ.

ಜೊತೆಗೆ ವೀಕ್ಷಕರ ಸಂಖ್ಯೆಯೂ ಇತ್ತೀಚಿನ ದಿನಗಳಲ್ಲಿ ಕೆಳಮುಖವಾಗುತ್ತಿದೆ. ಐಪಿಎಲ್‌, ಚಾಂಪಿಯನ್ಸ್‌ ಲೀಗ್‌, ವಿಶ್ವಕಪ್‌, ಚಾಂಪಿಯನ್ಸ್‌ ಟ್ರೋಫಿ  ಟೂರ್ನಿಗಳನ್ನು ಆಸಕ್ತಿಯಿಂದ ವೀಕ್ಷಿಸುವ ಪ್ರೇಕ್ಷಕರು ಏಕದಿನ ಹಾಗೂ ಟೆಸ್ಟ್‌ ಸರಣಿಗಳತ್ತ ಗಮನ ಹರಿಸುವುದು ಕಡಿಮೆ. ಹಾಗಾಗಿ ಉಭಯ ದೇಶಗಳ ಸರಣಿ ವೇಳೆ ಕ್ರೀಡಾಂಗಣಗಳು ಖಾಲಿ ಖಾಲಿಯಾಗಿರುತ್ತವೆ. 2011ರಲ್ಲಿ 3.4 ಇದ್ದ ಟಿಆರ್‌ಪಿ ಈಗ 2.2ಕ್ಕೆ ಬಂದು ನಿಂತಿದೆ. ವೀಕ್ಷಕರ ಸಂಖ್ಯೆ ಬೆಳೆಯುತ್ತಿಲ್ಲ ಎಂಬುದಕ್ಕೆ ಇವೆಲ್ಲಾ ಉದಾಹರಣೆ ಅಷ್ಟೆ.