ನವದೆಹಲಿ (ಪಿಟಿಐ): ಪೆಟ್ರೋಲಿಯಂ ಸಚಿವಾಲಯ ಗೃಹ ಬಳಕೆ ಅಡುಗೆ ಅನಿಲದ (ಎಲ್‌ಪಿಜಿ) ಬೆಲೆಯನ್ನು ಪ್ರತಿ ಸಿಲಿಂಡರ್‌ಗೆ ₨ 250 ಮತ್ತು ಪ್ರತಿ ಲೀಟರ್‌ ಸೀಮೆಎಣ್ಣೆಗೆ ₨ 4ರಂತೆ ದರ ಏರಿಸುವ ಪ್ರಸ್ತಾವವನ್ನು ರಾಜಕೀಯ ವ್ಯವಹಾರಗಳ ಸಂಪುಟ ಉಪಸಮಿತಿ (ಸಿಸಿಪಿಎ) ಮುಂದೆ ಶೀಘ್ರ ಇರಿಸುವ ಸಾಧ್ಯತೆ ಇದೆ.
ಈ ನಿಟ್ಟಿನಲ್ಲಿ ಕರಡು ಪ್ರಸ್ತಾವವನ್ನು ಪೆಟ್ರೋಲಿಯಂ ಸಚಿವಾಲಯ ಸಿದ್ಧ ಪಡಿಸುತ್ತಿದೆ ಎಂದು ಮೂಲಗಳು ಶುಕ್ರವಾರ ತಿಳಿಸಿವೆ.
ಜತೆಗೆ, ಡೀಸೆಲ್‌ ಮಾರಾಟ ದರದಲ್ಲಿ ಆಗುತ್ತಿರುವ ನಷ್ಟ ಪ್ರಮಾಣ (ಪ್ರತಿ ಲೀಟರ್‌ಗೆ ₨3.40) ಸರಿದೂಗುವವರೆಗೂ ಈಗ ಇರುವಂತೆ ಪ್ರತಿ ತಿಂಗಳು ಪ್ರತಿ ಲೀಟರ್‌ಗೆ ಸರಾಸರಿ 40ರಿಂದ 50 ಪೈಸೆ ಹೆಚ್ಚಳ ಮುಂದುವರಿಸುವಂತೆ ಮನವಿ ಮಾಡಿಕೊಳ್ಳುವ ಸಾಧ್ಯತೆ ಕೂಡ ಇದೆ ಎಂದು ಮೂಲಗಳು ಹೇಳಿವೆ.
ಈ ಮಧ್ಯೆ, 2010ರ ಜೂನ್‌ನಲ್ಲಿ ಪೆಟ್ರೋಲ್‌ ದರ ನಿಗದಿಯನ್ನು ಸರ್ಕಾರದ ನಿಯಂತ್ರಣದಿಂದ ಮುಕ್ತ ಮಾಡಿದಂತೆ ಡೀಸೆಲ್‌ ದರ ನಿಗದಿಯನ್ನೂ ಮುಂದಿನ ದಿನಗಳಲ್ಲಿ ಮುಕ್ತ ಮಾಡಬೇಕೆಂದು ಕೋರುವ ಚಿಂತನೆ ಪೆಟ್ರೋಲಿಯಂ ಸಚಿವಾಲಯಕ್ಕೆ ಇದೆ ಎಂದೂ ಮೂಲಗಳು ತಿಳಿಸಿವೆ.
