ಬೆಂಗಳೂರು: ಇದೇ 30 ರಿಂದ ಎಸ್ಎಸ್ಎಲ್ಸಿ ಪರೀಕ್ಷೆಗಳು ಆರಂಭ ವಾಗಲಿದ್ದು ಏಪ್ರಿಲ್ 13 ರವರೆಗೆ ನಡೆಯಲಿವೆ.
ಈ ಬಾರಿ ಒಟ್ಟು 8,56,438 ವಿದ್ಯಾರ್ಥಿಗಳು ಪರೀಕ್ಷೆಗೆ ಹಾಜರಾಗಲಿದ್ದಾರೆ. ಇದರಲ್ಲಿ ಸರ್ಕಾರಿ ಶಾಲೆಯ 3,48,684 ಮಕ್ಕಳು, ಅನುದಾನಿತ ಶಾಲೆಗಳ 2,67,155 ಮತ್ತು ಅನುದಾನರಹಿತ ಶಾಲೆಗಳ 2,40,599 ವಿದ್ಯಾರ್ಥಿಗಳು ಸೇರಿದ್ದಾರೆ.
ರಾಜ್ಯದ ಒಟ್ಟು 34 ಜಿಲ್ಲೆಗಳಿಂದ 3038 ಪರೀಕ್ಷಾ ಕೇಂದ್ರಗಳಿದ್ದು, 148 ಸೂಕ್ಷ್ಮ ಪರೀಕ್ಷಾ ಕೇಂದ್ರಗಳು ಮತ್ತು 50 ಅತಿಸೂಕ್ಷ್ಮ ಪರೀಕ್ಷಾ ಕೇಂದ್ರಗಳು ಎಂದು ಗುರುತಿಸಲಾಗಿದೆ. 829 ಕೇಂದ್ರಗಳಲ್ಲಿ ಸಿಸಿಟಿವಿ ಕ್ಯಾಮರಾಗಳನ್ನು ಅಳವಡಿಸಲಾಗಿದೆ. ಸಿ.ಸಿ.ಟಿ.ವಿ. ಕ್ಯಾಮೆರಾ ಅಳವಡಿಸಿರುವ ಕೇಂದ್ರಗಳ ಯಾವುದೇ ದೂರುಗಳಿದ್ದಲ್ಲಿ ಸಂಬಂಧಪಟ್ಟ ಬಿ.ಇ.ಓ. ಮತ್ತು ಡಿ.ಡಿ.ಪಿ.ಐ. ಅಥವಾ ಸಂಚಾರಿ ಜಾಗೃತ ದಳವನ್ನು (ಮೊಬೈಲ್ ಸ್ಕ್ವಾಡ್) ಸಂಪರ್ಕಿಸಲು ಸೂಚಿಸಲಾಗಿದೆ.
ಪರೀಕ್ಷೆಗೆ ಸಂಬಂಧಿಸಿದಂತೆ ಅವ್ಯವಹಾರದಲ್ಲಿ ತೊಡಗುವ ಯಾವುದೇ ಶಿಕ್ಷಕರು, ಸಿಬ್ಬಂದಿ ಅಥವಾ ಪೋಷಕರ ವಿರುದ್ಧ ಕಠಿಣ ಕ್ರಮ ಕೈಗೊಂಡು, ಅಂಥವರ ವಿರುದ್ಧ ಕ್ರಿಮಿ ನಲ್ ಮೊಕದ್ದಮೆ ಹೂಡಲು ಸಂಬಂಧ ಪಟ್ಟ ಪರೀಕ್ಷಾ ಕೇಂದ್ರದ ಅಧೀಕ್ಷಕರು ಮತ್ತು ಬಿ.ಇ.ಓ. ರವರಿಗೆ ಸೂಚಿಸಲಾಗಿದೆ ಎಂದು ಪ್ರೌಢ ಶಿಕ್ಷಣ ಪರೀಕ್ಷಾ ಮಂಡಳಿಯ ಪ್ರಕಟಣೆ ತಿಳಿಸಿದೆ.