ಹೈದರಾಬಾದ್: ವಿಮಾನಯಾನ ಸಂಸ್ಥೆ ಏರ್ ಕೋಸ್ಟಾ 2015ರ ಮೊದಲ ತ್ರೈಮಾಸಿಕದಲ್ಲಿ ದೇಶೀಯ ಮಾರ್ಗಗಳಲ್ಲಿ ಸೇವೆ ವಿಸ್ತರಿಸುವ ಹಾಗೂ 2018ರ ವೇಳೆಗೆ ಅಂತರರಾಷ್ಟ್ರೀಯ ಮಾರ್ಗಗಳಲ್ಲಿ ಹೊಸ ಸೇವೆ ಆರಂಭಿಸುವ ಯೋಜನೆ ಹೊಂದಿದೆ.
ಅಂತರರಾಷ್ಟ್ರೀಯ ವಿಮಾನ ಸೇವೆ ಆರಂಭಿಸಲು ಕಂಪೆನಿಗೆ ಕನಿಷ್ಠ 15 ವಿಮಾನಗಳ ಅಗತ್ಯವಿದೆ. ಆದರೆ ಸದ್ಯ 4 ವಿಮಾನಗಳು ದೇಶೀಯ ಮಾರ್ಗದಲ್ಲಿ ಮಾತ್ರ ಸಂಚಾರ ಸೇವೆ ಒದಗಿಸುತ್ತಿವೆ. ವಿಮಾನಗಳ ಸಂಖ್ಯೆಯನ್ನು ವರ್ಷಕ್ಕೆ 4 ರಂತೆ ಹೆಚ್ಚಿಸುವುದಾಗಿ ಸಂಸ್ಥೆ ಅಧ್ಯಕ್ಷ ರಮೆಶ್ ಲಿಂಗಮನೇನಿ ಪ್ರಜಾಶವಾಣಿಗೆ ತಿಳಿಸಿದ್ದಾರೆ.
₨183 ಕೋಟಿಗೆ 50 ಎಂಬ್ರೇರ್ ವಿಮಾನಗಳ ಖರೀದಿ ಮಾಡಲಾಗುವುದು. ಈ ಹೊಸ ವಿಮಾನಗಳು ದೇಶ ಮತ್ತು ವಿದೇಶಗಳ 2 ಮತ್ತು 3ನೇ ಹಂತದ ನಗರಗಳಿಗೆ ಸಂಪರ್ಕ ಕಲ್ಪಿಸಲಿವೆ ಎಂದು ಅವರು ಹೇಳಿದ್ದಾರೆ.
ಮಾತೃಸಂಸ್ಥೆ ಎಲ್ಇಪಿಎಲ್ ಪ್ರಾಜೆಕ್ಟ್ ಲಿಮಿಟೆಡ್ನಿಂದ ಬೇರ್ಪಡಲು ಹೈದರಾಬಾದ್ ಹೈಕೋರ್ಟ್ ಒಪ್ಪಿಗೆ ನೀಡಿದೆ. ಇದರಿಂದ ಹೆಚ್ಚಿನ ಹೂಡಿಕೆಗೆ ಅವಕಾಶ ಸಿಗಲಿದೆ ಎಂದು ಸಂಸ್ಥೆಯ ಮುಖ್ಯ ಹಣಕಾಸು ಅಧಿಕಾರಿ ವಿವೇಕ್ ಚೌಧರಿ ಮಾಹಿತಿ ನೀಡಿದ್ದಾರೆ.