ಒಳಗೂ ಹಸಿರು ಹೊರಗೂ ಹಸಿರು!

ಬಾಲ್ಕನಿಗೆ ತೂಗು ಉದ್ಯಾನ
ಮನೆಯ ಹೊರಭಾಗಕ್ಕೆ ಚಾಚಿರುವ ಬಾಲ್ಕನಿಯಲ್ಲಿ ಬಿಸಿಲು ಹಾಗೂ ಗಾಳಿ ಧಾರಾಳ. ಹೊರನೋಟಕ್ಕೆ ತಕ್ಷಣ ಕಾಣುವ ಈ ಭಾಗವನ್ನು ಹಸಿರಿನಿಂದ ಅಲಂಕರಿಸಿದರೆ, ಮನೆಯ ಸೌಂದರ್ಯ ಹೆಚ್ಚುತ್ತದೆ. ಅದಕ್ಕಾಗಿ ಕೆಲವು ಸುಲಭ ವಿಧಾನಗಳಿವೆ.

ಬಾಲ್ಕನಿ ಭಾಗದಲ್ಲಿ ತಾರಸಿಗೆ ಹುಕ್ಸ್‌ (ಕೊಕ್ಕೆ) ಇರುತ್ತವೆ. ಅಲ್ಲಿಂದ ಗಟ್ಟಿಯಾದ ದಾರಕ್ಕೆ ‘ಹ್ಯಾಂಗಿಂಗ್ ಪಾಟ್’ ಕಟ್ಟಿ, ಅವುಗಳಲ್ಲಿ ಸಸಿ ಬೆಳೆಸಿಕೊಳ್ಳಬಹುದು. ಈ ವಿಧಾನಕ್ಕೆ ‘ತೂಗು ಉದ್ಯಾನ’ (ಹ್ಯಾಂಗಿಂಗ್ ಗಾರ್ಡನ್) ಎಂದೂ, ಅಲ್ಲಿನ ಕುಂಡಗಳಿಂದ ಕೆಳಗೆ ಇಳಿಯುವ ಸಸ್ಯಗಳಿಗೆ ‘ಫ್ಲೋಯಿಂಗ್ ಪ್ಲಾಂಟ್ಸ್‌’ ಎಂದೂ ಕರೆಯುತ್ತಾರೆ. ಈ ಕುಂಡಗಳಲ್ಲಿ ರೋಸರಿ ವೈನ್, ಸ್ಟ್ರಿಂಗ್ ಆಫ್ ಡೀಲ್ಸ್‌, ಸ್ಟ್ರಾಬೆರಿ, ಗೆರೆನಿಯಂಸ್ ಇತ್ಯಾದಿ ಬೆಳೆಸಬಹುದು.

ಬಾಲ್ಕನಿ ಗ್ರಿಲ್‌ಗೆ ಹೊಂದಿಕೊಂಡಂತೆ ಕ್ರೋಟಾನ್ ಬೆಳೆಸಬಹುದು. ಮಳೆಗಾಲ ಅಥವಾ ಚಳಿಗಾಲದಲ್ಲಿ ಮಾತ್ರವೇ ಹೂ ಅರಳಿಸಿ ಬಳಿಕ ಒಣಗಿಹೋಗುವ ಋತುಮಾನದ ಸಸಿಗಳು ನರ್ಸರಿಯಲ್ಲಿ ಸಿಗುತ್ತವೆ. ಅಂಥವುಗಳನ್ನು ತಂದಿಟ್ಟುಕೊಳ್ಳಬೇಕು. ಸ್ಥಳೀಯವಾಗಿ ಸಿಗುವ ಸೇವಂತಿಗೆ, ಬಣ್ಣದ ತುಂಬೆ ಈ ಸಾಲಿಗೆ ಸೇರುತ್ತವೆ. ಹೆಚ್ಚು ಗಾಳಿಯಾಡುವ ಸ್ಥಳ ಇದಾಗಿರುವುದರಿಂದ, ಪನ್ನೀರೆಲೆ, ಮರುಗ, ಪಚ್ಚೆ ತೆನೆ ಸಸ್ಯಕ್ಕೆ ಜಾಗ ಕಲ್ಪಿಸಿದರೆ ಅಲ್ಲಿಂದ ಒಳಬರುವ ಗಾಳಿಯು ಪರಿಮಳವನ್ನೂ ತನ್ನೊಂದಿಗೆ ತರುತ್ತದೆ. ಮಾಸ್ಟಿಕ್ ಗಿಡ– ಇದೊಂದು ಅಲ್ಗೆ ಸಸ್ಯ. ಬಾಲ್ಕನಿ ಮೂಲೆಯಲ್ಲಿ ಕುಂಡವೊಂದರ ಮಧ್ಯೆ ಕಟ್ಟಿಗೆ ತುಂಡು ಇಟ್ಟು ಈ ಸಸ್ಯ ಬೆಳೆಸಬಹುದು. ಬೇಕಿದ್ದರೆ ಇದಕ್ಕೆ ವೀಳ್ಯದೆಲೆ ಅಥವಾ ಬಸಳೆಯನ್ನೂ ಹಬ್ಬಿಸಿಕೊಳ್ಳಬಹುದು.

ಕಿಟಕಿಯೊಳಗೆ ಸ್ವಲ್ಪ ಸ್ಥಳಾವಕಾಶವಿದ್ದರೂ ಅಲ್ಲಿ ಬೆಳೆಸಬಹುದಾದ ಹಲವು ಸುಂದರ ಗಿಡಗಳಿವೆ. ಬಾಟಲಿಯಲ್ಲಿ ಬೆಳೆಯುವ ‘ಮನಿ ಪ್ಲಾಂಟ್’ ಅಂಥವುಗಳಲ್ಲಿ ಹೆಚ್ಚು ಜನಪ್ರಿಯ. ಕಿಟಕಿಯಲ್ಲಿ ಇದನ್ನಿಡಲು ಜಾಗ ಇಲ್ಲವೇ? ಚಿಂತೆ ಬೇಡ. ಅಲ್ಲೆಲ್ಲೋ ಇರುವ ಟೀಪಾಯ್ ಮೇಲೆ ಅದನ್ನಿಡಿ ಅಥವಾ ಮೊಳೆಗೆ ಬಾಟಲಿ ತೂಗು ಹಾಕಿ. ಬಣ್ಣಬಣ್ಣದ ನೀರು, ವಿವಿಧ ವಿನ್ಯಾಸಗಳ ಬಾಟಲಿಯನ್ನು ಬಳಸಿದರೆ ಗೋಡೆಯ ಅಂದ ಹೆಚ್ಚುತ್ತದೆ.

ಬೆಡ್‌ರೂಮಿನ ಮೂಲೆಯಲ್ಲಿ ಸ್ಟೂಲ್ ಮೇಲೆ ಆಸ್ಪರಾಗಸ್ ಮಯೂರಿ, ಕೊಲಿಯೆಟ್ ಕುಂಡಗಳ ಇಡಬಹುದು. ಬಾತ್‌ರೂಮಿನಲ್ಲಿ ನೀರು ಯಾವಾಗಲೂ ಹರಿಯುವುದರಿಂದ, ಈ ತೇವಾಂಶದಲ್ಲಿ ಸುಲಭ ಮತ್ತು ಶೀಘ್ರವಾಗಿ ಬೆಳೆಯುವ ಸಾಕಷ್ಟು ಪ್ರಭೇದಗಳ ಫರ್ನ್‌ಗಳಿವೆ. ಮನೆಯ ಹಾಲ್‌ನಲ್ಲಿಯೋ ಬಾಲ್ಕನಿಯಲ್ಲೋ ಜಾಗ ಸ್ವಲ್ಪ ಹೆಚ್ಚಿಗೆ ಸಿಗುತ್ತದೆ ಎಂದಾದರೆ ಕಬ್ಬಿಣ ಅಥವಾ ಕಟ್ಟಿಗೆ ಸ್ಟ್ಯಾಂಡ್‌ನಲ್ಲಿ ಹೂಕುಂಡ ಇಡಬಹುದು. ಸಸ್ಯಗಳ ಕುರಿತು ಜನರಲ್ಲಿ ಹೆಚ್ಚುತ್ತಿರುವ ಒಲವಿಗೆ ಪೂರಕವಾಗಿ ಮಹಾನಗರಗಳಲ್ಲಿ ವಾರಾಂತ್ಯದ ಅವಧಿಯ ಕಾರ್ಯಾಗಾರ, ಚರ್ಚೆಗಳು ಸಾಕಷ್ಟು ನಡೆಯುತ್ತಿವೆ. ಸಾಮಾಜಿಕ ಜಾಲತಾಣಗಳಲ್ಲಿ ಪ್ರತ್ಯೇಕ ಗುಂಪುಗಳೂ ಸಕ್ರಿಯವಾಗಿವೆ. ಏನೇ ಮಾಹಿತಿ ಬೇಕಿದ್ದರೂ ಕ್ಷಣಾರ್ಧದಲ್ಲಿ ಸಿಗುವ ಅವಕಾಶ ಈಗ ಲಭ್ಯ. ‘ಮನೆಯಲ್ಲಿ ಜಾಗವೇ ಇಲ್ಲ’ ಎಂದು ಕೈಚೆಲ್ಲಿ ಕೂರುವ ಬದಲಿಗೆ ಇದ್ದ ಸ್ಥಳದಲ್ಲೇ ಏನೆಲ್ಲ ಮಾಡಲು ಸಾಧ್ಯ ಎಂಬುದನ್ನು ತೋರಿಸಲು ನೂರಾರು ದಾರಿಗಳಿವೆ.
ಗಿಡಮರ– ಹೂಬಳ್ಳಿ ಮೇಲೆ ಪ್ರೀತಿ ಇದ್ದರೆ ಅಲ್ಪ ಸ್ಥಳವನ್ನೇ ಆಲಂಕಾರಿಕ ತಾಣವನ್ನಾಗಿ ಮಾಡಲು ಸಾಧ್ಯ ಎಂಬುದನ್ನು ಪ್ರಕೃತಿಪ್ರಿಯರು ತೋರಿಸಿಕೊಟ್ಟಿದ್ದಾರೆ.   

ನಿರ್ವಹಣೆಯೂ ಇರಬೇಕು
* ಎಲ್ಲ ಗಿಡಗಳ ಕುಂಡಗಳ ತಳಭಾಗದಲ್ಲಿ ಪ್ಲಾಸ್ಟಿಕ್ ಅಥವಾ ಮಣ್ಣಿನ ಟ್ರೇ ಇಡಲು ಮರೆಯಬೇಡಿ. ಇದರಿಂದ ಎರಡು ಬಗೆಯ ಪ್ರಯೋಜನಗಳಿವೆ. ಸಸ್ಯಗಳಿಗೆ ನೀರನ್ನು ಪದೇ ಪದೇ ಹಾಕುತ್ತಲೇ ಇರಬೇಕಿಲ್ಲ ಹಾಗೂ ಕುಂಡಕ್ಕೆ ಹಾಕಿದ ನೀರು ಹೆಚ್ಚಾದರೂ ಹರಿದು ಮನೆ ಗಲೀಜು ಆಗುವುದಿಲ್ಲ.

* ಹಿತ್ತಲಿನಲ್ಲಿ ಬೆಳೆದ ಗಿಡಗಳಿಗೆ ಗೊಬ್ಬರ ಹಾಕಬಹುದು. ಆದರೆ ಮನೆಯೊಳಗೆ ಬೆಳೆಸಿದ ಸಸ್ಯಗಳಿಗೆ? ಇವುಗಳಿಗೆಂದೇ ದ್ರವರೂಪಿ ಗೊಬ್ಬರ ಲಭ್ಯ. ಸ್ಪ್ರೇಯರ್‌ ಮೂಲಕ ಇದನ್ನು ಸಿಂಪಡಣೆ ಮಾಡಬಹುದು. ಇದರಿಂದ ಸಸ್ಯಗಳ ಮೇಲೆ ಕುಳಿತ ದೂಳು ಹೋಗುತ್ತದೆ ಹಾಗೂ ಗೊಬ್ಬರದ ಸಾರವನ್ನು ಆ ಸಸ್ಯ ಹೀರುತ್ತದೆ.

* ದಪ್ಪ ಎಲೆಗಳುಳ್ಳ ಸಕ್ಕುಲೆಂಟ್‌ ಪ್ಲಾಂಟ್‌ಗಳನ್ನು ಹೆಚ್ಚು ಹೆಚ್ಚಾಗಿ ಬೆಳೆಸಬಹುದು. ಇವುಗಳಿಗೆ ಹೆಚ್ಚು ನೀರು ಹಾಕುವ ಪ್ರಮೇಯವೇ ಉದ್ಭವಿಸುವುದಿಲ್ಲ. ನೋಡಲು ಸುಂದರ ವಿನ್ಯಾಸ ಇವುಗಳದು.

* ತೀರ ಬೆಳಕಿಲ್ಲದೇ ಇರುವ ಕೋಣೆಯಲ್ಲಿ ಬೆಳೆಯುವ ಸಸ್ಯಗಳನ್ನು ಆಗಾಗ್ಗೆ ಹೊರಗೆ ತಂದು ಒಂದೆರಡು ತಾಸು ಬಿಸಿಲಿನಲ್ಲಿ ಇಡಬೇಕು.

* ದುಂಬಿ, ಪತಂಗಗಳನ್ನು ಆಹ್ವಾನಿಸುವ ಹೂಗಿಡ ಬೆಳೆಸಿ. ಇದು ಮನಕ್ಕೆ ಖುಷಿಯನ್ನೂ ಕೊಡುತ್ತದೆ.