ಜ್ಯೋತಿಷಿಗಳ ವಿರುದ್ಧ ಸಿಡಿಮಿಡಿ

ಬೆಂಗಳೂರು: ‘ಉಪಗ್ರಹಗಳು, ಸಂಪರ್ಕ ಕ್ರಾಂತಿ, ವಿಜ್ಞಾನದ ಆವಿಷ್ಕಾರ ಹಾಗೂ ತಂತ್ರಜ್ಞಾನದ ನೆರವಿನಿಂದ ಸುದ್ದಿ ವಾಹಿನಿ­ಗಳು ಕಾರ್ಯನಿರ್ವಹಿಸುತ್ತಿವೆ. ಆದರೆ  ಈ ವಾಹಿನಿಗಳ ಸ್ಟುಡಿಯೊ­ದೊ­ಳಗೆ ಕುಳಿತು ಗ್ರಹಗತಿಯೇ ಸರಿ ಇಲ್ಲ ಎಂದು ಜ್ಯೋತಿಷಿಗಳು ಬೊಗಳೆ ಬಿಡುತ್ತಾರೆ’
–ವಾಹಿನಿಗಳಲ್ಲಿ ಜ್ಯೋತಿಷ ಕಾರ್ಯ­ಕ್ರಮ ನಡೆಸಿಕೊಡುವ ಜ್ಯೋತಿಷಿಗಳನ್ನು ಈ ರೀತಿ ತರಾಟೆಗೆ ತೆಗೆದುಕೊಂಡಿದ್ದು ಖ್ಯಾತ ವಿಜ್ಞಾನಿ ಹಾಗೂ ಇಸ್ರೊ ಮಾಜಿ ಮುಖ್ಯಸ್ಥ ಪ್ರೊ.ಯು.ಆರ್‌.ರಾವ್‌.

ಬ್ರೇಕ್‌ಥ್ರೂ ಸೈನ್ಸ್‌ ಸೊಸೈಟಿ ಹಾಗೂ ಕೆಎಲ್‌ಇ ಸಂಸ್ಥೆಯ ಎಸ್‌.ನಿಜಲಿಂಗಪ್ಪ ಕಾಲೇಜು ಆಶ್ರಯದಲ್ಲಿ ನಗರದಲ್ಲಿ ಶುಕ್ರ­ವಾರ ಆರಂಭವಾದ ‘ಜನರ ವಿಜ್ಞಾನ ಹಬ್ಬ’ ಕಾರ್ಯಕ್ರಮಕ್ಕೆ ಚಾಲನೆ ನೀಡಿ ಅವರು ಮಾತ­ನಾಡಿ­ದರು.

‘ಜಗತ್ತು ವೈಜ್ಞಾನಿಕವಾಗಿ ಬಹಳಷ್ಟು ಪ್ರಗತಿ ಸಾಧಿಸಿದೆ. ಮಾಹಿತಿ ತಂತ್ರಜ್ಞಾನ­ದಲ್ಲಿ ಕ್ರಾಂತಿಯಾಗಿದೆ. ಆದರೂ ಈ ಜ್ಯೋತಿಷಿಗಳು ಜನರನ್ನು ಮೂರ್ಖ­ರನ್ನಾಗಿ­ಸಲು ಪ್ರಯತ್ನಿ­ಸುತ್ತಿದ್ದಾರೆ. ಅಂಥ­ವ­ರಿಗೆ ಸುದ್ದಿ ವಾಹಿನಿಗಳು ಅವ­ಕಾಶ ಮಾಡಿಕೊಡುತ್ತಿವೆ. ಕ್ರಿಕೆಟ್‌, ರಾಜಕೀಯ, ಸಿನಿಮಾದ ಬಳಿಕ ಬೊಗಳೆ ಜ್ಯೋತಿಷಿಗಳಿಗೆ ಮಾಧ್ಯಮಗಳು ಹೆಚ್ಚಿನ ಆದ್ಯತೆ ನೀಡುತ್ತಿವೆ’ ಎಂದು ಆತಂಕ ವ್ಯಕ್ತಪಡಿಸಿದರು.

‘ಬಹುದೂರದಲ್ಲಿರುವ ಗ್ರಹಗಳು, ತಾರೆಗಳು ತಮ್ಮ ಕೆಲಸ ಬಿಟ್ಟು ಈ ಜ್ಯೋತಿಷಿಗಳ ಮಾತಿಗೆ ಕಿವಿಗೊಡು­ತ್ತ­ವೆಯೇ? ಜನರ ಕಷ್ಟಕ್ಕೂ, ಗ್ರಹಗಳಿಗೂ ಏನು ಸಂಬಂಧ? ಎಂದು ಪ್ರಶ್ನಿಸಿದರು.

ಬಾಹ್ಯಾಕಾಶ ಅಧ್ಯಯನ ಏಕೆ?: ‘ಜನ­ಸಂಖ್ಯೆ ಕ್ಷಿಪ್ರಗತಿಯಲ್ಲಿ ಹೆಚ್ಚುತ್ತಿದೆ. ಅದಕ್ಕೆ ಪೂರಕವಾಗಿ ಆಹಾರದ ಉತ್ಪಾ­ದನೆ ಆಗುತ್ತಿಲ್ಲ. ಮುಂದಿನ 200 ವರ್ಷಗಳಲ್ಲಿ ಎಲ್ಲಾ ಸಂಪನ್ಮೂಲಗಳು ಖಾಲಿಯಾಗಲಿವೆ. ಆಗ ಬಾಹ್ಯಾಕಾಶ ವಿಜ್ಞಾನ ನೆರವಿಗೆ ಬರಬಹುದು. ಮಂಗಳಗ್ರಹ ಹಾಗೂ ಚಂದ್ರನಲ್ಲಿ ದಲ್ಲಿ ಸಂಪನ್ಮೂಲಗಳನ್ನು ಹುಡುಕಬಹುದು. ವಿಜ್ಞಾನ ಹಾಗೂ ತಂತ್ರಜ್ಞಾನದಿಂದ ಮಾತ್ರ ಸಂಪನ್ಮೂಲ ಕಂಡುಕೊಳ್ಳಲು ಸಾಧ್ಯ. ಈ ನಿಟ್ಟಿನಲ್ಲಿ ಯುವ ಪೀಳಿಗೆ ವಿಜ್ಞಾನಕ್ಕೆ ಒತ್ತು ನೀಡಿ ಹೊಸ ಹೊಸ ಸಂಶೋಧನೆ ನಡೆಸಬೇಕು’ ಎಂದರು.

ಕಾರ್ಯಕ್ರಮದಲ್ಲಿ ಎಸ್‌.­ನಿಜ­ಲಿಂಗಪ್ಪ ಪದವಿ ಕಾಲೇಜಿನ ಪ್ರಾಂಶು­ಪಾಲ ಡಾ.ಸುರೇಶ್‌ ಸಿ. ಹೆಗಡಿ, ಪಿಯು ಕಾಲೇಜಿನ ಪ್ರಾಂಶುಪಾಲ ಪ್ರೊ. ಆರ್‌.­ವಿನಯ್‌ಕುಮಾರ್, ಬೆಂಗ­ಳೂರು ಜಿಲ್ಲೆ ಬ್ರೇಕ್‌ಥ್ರೂ ಸೈನ್ಸ್‌ ಸೊಸೈಟಿಯ ಅಧ್ಯಕ್ಷೆ ಕೆ.ಎಸ್‌.ರಜನಿ, ಸೊಸೈಟಿಯ ರಾಜ್ಯ ಸಂಚಾಲಕ ಸತೀಶ್‌ಕುಮಾರ್‌  ಅವರು ಇದ್ದರು.

ವಿಜ್ಞಾನಿಗಳು, ಪ್ರಾಧ್ಯಾ­ಪಕರು, ರಾಜ್ಯದ ವಿವಿಧ ಶಾಲಾ, ಕಾಲೇಜು ವಿದ್ಯಾರ್ಥಿ­ಗಳು ಪಾಲ್ಗೊಂಡಿದ್ದರು.
ಮಾದರಿಗಳ ಪ್ರದರ್ಶನ: ಈ ಹಬ್ಬದ ಅಂಗವಾಗಿ ಕಾಲೇಜಿನಲ್ಲಿ ವಿಜ್ಞಾನ ಮಾದರಿ­ಗಳ ಪ್ರದರ್ಶನ, ವಿಚಾರ­ಗೋಷ್ಠಿ ಹಾಗೂ ಛಾಯಾಚಿತ್ರ ಪ್ರದ­ರ್ಶನ ಆಯೋಜಿಸಲಾಗಿದೆ.

ಇಸ್ರೊ ವತಿಯಿಂದ ಭಾರತದ ಅನೇಕ ಉಪಗ್ರಹ ಹಾಗೂ ರಾಕೆಟ್‌ ಮಾದರಿ­ಯನ್ನು ಪ್ರದರ್ಶನಕ್ಕಿಡಲಾಗಿದೆ.