ಡಿಐಜಿ ಐಷಾರಾಮದ ಚಿತ್ರ: ವಿವಾದ ಸೃಷ್ಟಿಸಿದ ಪುತ್ರ!
ಜಮ್ಮು: ಜಮ್ಮು–ಕಾಶ್ಮೀರ ಡಿಐಜಿ ಶಕೀಲ್‌ ಅಹ್ಮದ್‌ ಬೇಗ್‌ ಅವರ ಉದ್ಯಮಿ ಪುತ್ರ ಟೋನಿ ಬೇಗ್‌, ತನ್ನ ತಂದೆಯ ಐಷಾರಾಮಿ ಬದುಕನ್ನು ತೋರಿಸುವ ಭಾವಚಿತ್ರಗಳನ್ನು ಸಾಮಾಜಿಕ ಜಾಲ ತಾಣಗಳಲ್ಲಿ ಹರಿಬಿಟ್ಟಿದ್ದು ದೊಡ್ಡ ವಿವಾದಕ್ಕೆ ಕಾರಣವಾಗಿದೆ. ಸರ್ಕಾರ ತನ್ನ ತಂದೆಗೆ ಕೊಟ್ಟಿರುವ ವಿಶೇಷ ಸೌಲಭ್ಯಗಳ ಬಗ್ಗೆ ಜಂಬ ಕೊಚ್ಚಿಕೊಳ್ಳುವ ರೀತಿಯಲ್ಲಿ ಟೋನಿ ಈ ಚಿತ್ರಗಳನ್ನು ಫೇಸ್ಬುಕ್ ಹಾಗೂ ಇನ್‌ಸ್ಟಾಗ್ರಾಂನಲ್ಲಿ ಹಾಕಿದ್ದಾರೆ.
ಸೋಫಾ ಮೇಲೆ ಆರಾಮವಾಗಿ ಕೂತಿರುವ ಡಿಐಜಿ ಅವರ ಬೂಟಿನ ಲೇಸ್‌ ಕಟ್ಟುವುದಕ್ಕೆ ಪೊಲೀಸ್‌ ಸಿಬ್ಬಂದಿಯೊಬ್ಬರು ಸಹಾಯ ಮಾಡುತ್ತಿರುವ ಚಿತ್ರವನ್ನು 670 ಮಂದಿ ಇಷ್ಟಪಟ್ಟಿದ್ದಾರೆ. ‘....ರಿಯಲ್‌ ಕಿಂಗ್‌ ಮೈ ಡ್ಯಾಡ್‌!! ನನ್ನ ತಂದೆ ತಮ್ಮ ಬೂಟಿನ ಲೇಸ್‌ ತಾವೇ ಕಟ್ಟಿಕೊಂಡಿದ್ದು ೧೫ ವರ್ಷಗಳ ಹಿಂದೆ....’ ಎನ್ನುವ ಶೀರ್ಷಿಕೆಯ ಈ ಚಿತ್ರಕ್ಕೆ 13 ಮಂದಿ ಪ್ರತಿಕ್ರಿಯೆ ನೀಡಿದ್ದಾರೆ. ಡಿಐಜಿಗೆ ವ್ಯಕ್ತಿಯೊಬ್ಬ ಕೊಡೆ ಹಿಡಿದು ಬರುತ್ತಿರುವ ಚಿತ್ರವನ್ನು ಕೂಡ ಟೋನಿ ಅಪ್‌ಲೋಡ್‌ ಮಾಡಿದ್ದಾರೆ. ಇನ್ನೊಂದು ಚಿತ್ರದಲ್ಲಿ ಪುತ್ರ ಟೋನಿ ಜತೆ ಕಟ್ಟಡವೊಂದರಿಂದ ಹೊರಬರುತ್ತಿರುವ ಡಿಐಜಿ ಸುತ್ತಮುತ್ತ ಪೊಲೀಸರು ಇರುವುದನ್ನು ಕಾಣಬಹುದು.
ಡಿಐಜಿ ಪ್ರತಿಕ್ರಿಯೆ: ‘ನಾನು ಗೌರವ ಘನತೆಯಿಂದ ಬದುಕಿದವನು. ಈಗ ನಿವೃತ್ತಿಯಾಗುತ್ತಿದ್ದೇನೆ. ಯಾರೋ ಕಿಡಿಗೇಡಿಗಳು ಈ ಕುಚೇಷ್ಟೆ ಮಾಡಿದ್ದಾರೆ’ ಎಂದು ಡಿಐಜಿ ಪ್ರತಿಕ್ರಿಯೆ ನೀಡಿದ್ದಾರೆ. ಇನ್‌ಸ್ಟಾಗ್ರಾಂ ಖಾತೆ ತಮ್ಮ ಮಗನಿಗೆ ಸೇರಿದ್ದಲ್ಲ ಎಂದೂ ಅವರು ಸ್ಪಷ್ಟನೆ ನೀಡಿದ್ದಾರೆ. ಪೊಲೀಸ್‌ ಸಿಬ್ಬಂದಿಯೊಬ್ಬರು ತಮ್ಮ ಬೂಟಿನ ಲೇಸ್‌ ಕಟ್ಟುತ್ತಿರುವ ಚಿತ್ರದ ಬಗ್ಗೆ ಸುದ್ದಿವಾಹಿನಿಯೊಂದು ಕೇಳಿದ ಪ್ರಶ್ನೆಗೆ, ‘ಷೂ ಖರೀದಿಸುವಾಗ ಅಂಗಡಿಯಾತ ಕಾಲಿಗೆ ಷೂ ಹಾಕಿಸಿ ನೋಡುವುದಿಲ್ಲವೇ’ ಎಂದು ಪ್ರಶ್ನಿಸಿದರು.
ರಾಜ್ಯ ಸರ್ಕಾರ ಮತ್ತು ಪೊಲೀಸ್‌ ಇಲಾಖೆ ಈ ಬಗ್ಗೆ ಅಂತರ ಕಾಯ್ದುಕೊಂಡಿದೆ. ಜಾಲತಾಣಗಳ ಬಳಕೆದಾರರು ಈ ಚಿತ್ರಗಳನ್ನು ನೋಡಿ ಆಕ್ರೋಶಗೊಂಡಿದ್ದು, ಡಿಐಜಿ ವಿರುದ್ಧ ಕಟ್ಟುನಿಟ್ಟಿನ ಕ್ರಮಕ್ಕೆ ಆಗ್ರಹಿಸಿದ್ದಾರೆ. ‘ಇದು ಅಸಹ್ಯಕರ! ಹಿಂದುಳಿದ ದೇಶಗಳಲ್ಲಿ ಪೊಲೀಸರು ಈ ರೀತಿ ವರ್ತಿಸುತ್ತಾರೆ. ಡಿಐಜಿಗೆ ನಾಚಿಕೆ ಆಗಬೇಕು’ ಎಂದು ಹೀನಾ ಖಾನ್‌ ಎಂಬುವವರು ಜಾಲತಾಣದಲ್ಲಿ ಟೀಕಿಸಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.