ನವದೆಹಲಿ(ಪಿಟಿಐ): ವಿದೇಶದಲ್ಲಿ ಅಕ್ರಮವಾಗಿ ಆಸ್ತಿ ಹೊಂದುವ ಮೂಲಕ ದೇಶಕ್ಕೆ ಆದಾಯ ತೆರಿಗೆಯನ್ನು ವಂಚಿಸುವುದು ‘ಅಕ್ರಮ ಹಣ ಸಾಗಣೆ ತಡೆ’ ಕಾನೂನಿನಡಿ ಅಪರಾಧ ಪ್ರಕರಣವಾಗುತ್ತದೆ ಎಂದು ಕೇಂದ್ರ ಹಣಕಾಸು ಸಚಿವಾಲಯ ಹೇಳಿದೆ.
ಬಜೆಟ್‌ ಮಂಡನೆ ವೇಳೆ ತೆರಿಗೆ ವಂಚನೆ ವಿಚಾರ ಪ್ರಸ್ತಾಪವಾದ ಸಂದರ್ಭದಲ್ಲಿ ಈ ಕುರಿತು ಕೇಂದ್ರ ಹಣಕಾಸು ಸಚಿವ ಅರುಣ್‌ ಜೇಟ್ಲಿ ಸ್ಪಷ್ಟನೆ ನೀಡಿದ್ದಾರೆ ಎಂದು ಸಚಿವಾಲಯ ತಿಳಿಸಿದೆ.
ಈವರೆಗೆ ಸಿವಿಲ್‌ ಪ್ರಕರಣ
ಸದ್ಯ, ತೆರಿಗೆ ವಂಚನೆಯು ಸಿವಿಲ್‌ ಪ್ರಕರಣದ ವ್ಯಾಪ್ತಿಯಲ್ಲಿದ್ದು, ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್‌ನಡಿ ಸೂಕ್ತ ಕಾನೂನು ಕ್ರಮ ಜರುಗಿಸಲಾಗುತ್ತಿದೆ. ಇದೀಗ ತೆರಿಗೆ ವಂಚನೆಯನ್ನು ಅಕ್ರಮವಾಗಿ ಹಣ ಸಾಗಣೆ ತಡೆ ಕಾಯ್ದೆಯಡಿ ತರಲು ನಿರ್ಧರಿಸಲಾಗಿದೆ. ಈ ಮೂಲಕ ತೆರಿಗೆ ವಂಚನೆಯನ್ನು ‘ಅಪರಾಧ ಪ್ರಕರಣ’ ಎಂದು ಪರಿಗಣಿಸುವ ಕೆಲವೇ ದೇಶಗಳ ಸಾಲಿಗೆ ಭಾರತವೂ ಸೇರಿಕೊಳ್ಳಲಿದೆ ಎಂದು ಸಚಿವಾಲಯದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ತೆರಿಗೆ ವಂಚನೆಯನ್ನು ಗುರುತಿಸುವ ಮತ್ತು ಪ್ರತ್ಯೇಕವಾಗಿ ಅಪರಾಧ ಪ್ರಕರಣ ದಾಖಲಿಸುವ ಅವಕಾಶವನ್ನು ಸಿಬಿಐ, ಜಾರಿ ನಿರ್ದೇಶನಾಲಯ, ಪೊಲೀಸ್‌, ಎನ್‌ಸಿಬಿ ಮತ್ತು ‘ಸೆಬಿ’ಗೆ ನೀಡಲಾಗುವುದು ಎಂದು ಅವರು ಹೇಳಿದ್ದಾರೆ. ವಿದೇಶದಲ್ಲಿ ಅಕ್ರಮವಾಗಿ ಆಸ್ತಿ ಹೊಂದುವ ಮೂಲಕ ತೆರಿಗೆ ವಂಚನೆ ಮಾಡಿದರೆ ಅದನ್ನು ‘ಉದ್ದೇಶಿತ ಅಪರಾಧ’ ಎಂದೇ ಪರಿಗಣಿಸಲಾಗುವುದು. ಆದರೆ, ದೇಶದಲ್ಲಿಯೇ ಅಕ್ರಮ ಆಸ್ತಿ ಹೊಂದಿದ್ದು, ತೆರಿಗೆ ವಂಚಿಸಿದರೆ ಸಿವಿಲ್‌ ಐ.ಟಿ ಕಾಯ್ದೆ ವ್ಯಾಪ್ತಿಗೆ ಬರುತ್ತದೆ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.
