ಅಹಮದಾಬಾದ್‌ (ಪಿಟಿಐ): ಹಜ್‌ ಯಾತ್ರಿಕರಿಗೆ ₹ 2.68 ಕೋಟಿ ಹಣ ವಂಚಿಸಿದ ಆರೋಪದಲ್ಲಿ ಕನ್ನಡದ ನಟಿ ಮರಿಯಾ ಮೋನಿಕಾ ಸುಸೈರಾಜ್‌ ಅವರನ್ನು ಪೊಲೀಸರು ಬಂಧಿಸಿದ್ದಾರೆ.
ಈ ಮೊದಲು ಟಿ.ವಿ.ನಿರ್ಮಾಪಕ ನೀರಜ್‌ ಗ್ರೋವರ್‌ ಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅವರನ್ನು ಬಂಧಿಸಲಾಗಿತ್ತು. ನಂತರ ಗುಜರಾತ್‌ ಹೈಕೋರ್ಟ್‌ನಲ್ಲಿ ಅವರು ನಿರೀಕ್ಷಣಾ ಜಾಮೀನಿಗೆ ಅರ್ಜಿ ಸಲ್ಲಿಸಿದ್ದರು. ಅವರ ಅರ್ಜಿಯನ್ನು ಬುಧವಾರ ಕೋರ್ಟ್‌ ನಿರಾಕರಿಸಿತ್ತು.
‘35 ವರ್ಷದ ಮರಿಯಾ ಅವರನ್ನು ಮೈಸೂರಿನ ಅವರ ನಿವಾಸದಲ್ಲಿ ಬಂಧಿಸಲಾಗಿದೆ. ವಡೋದರಾ ಪೊಲೀಸರಿಗೆ ಅವರನ್ನು ಹಸ್ತಾಂತರಿಸುವ ಪ್ರಕ್ರಿಯೆ ಶುರುವಾಗಿದೆ’ ಎಂದು ಅಹಮದಾಬಾದ್‌ ಅಪರಾಧ ದಳ ತಿಳಿಸಿದೆ.
ವಂಚನೆ ವಿಧಾನ: ಮುಂಬೈನ ಪರೋಮಿತಾ ಚಕ್ರವರ್ತಿ ಎಂಬುವರ ಜತೆ ಸೇರಿಕೊಂಡು ಮರಿಯಾ ಅವರು ಕೆಲವು ತಿಂಗಳ ಹಿಂದೆ ವಡೋದರದಲ್ಲಿ ಟಿಕೆಟ್‌ ಬುಕಿಂಗ್‌ ಏಜೆನ್ಸಿ ಪ್ರಾರಂಭಿಸಿದ್ದರು. ಹಜ್‌ ಯಾತ್ರಿಕರಿಂದ ಹಣ ಪಡೆದು ವಿಮಾನ ಟಿಕೆಟ್‌ ಬುಕ್‌ ಮಾಡಿದ್ದರು. ನಂತರ ಅವರಿಗೆ ಗೊತ್ತಿಲ್ಲದಂತೆ ಟಿಕೆಟ್‌ ರದ್ದು ಮಾಡಿ ಹಣ ಲಪಟಾಯಿಸಿದ್ದರು.
