ಪೀಠೋಪಕರಣಗಳ ಕಾಡದಿರಲಿ ಮಳೆಗಾಲ

ಮಾಡಬಾರದ್ದೇನು?
*ಹಸಿ ಬಟ್ಟೆ ಹರಡಬೇಡಿ: ಮಳೆಗಾಲದಲ್ಲಿ ಒಗೆದ ಬಟ್ಟೆಗಳನ್ನು ಒಣಗಿಸುವುದೊಂದು ದೊಡ್ಡ ತಲೆನೋವು. ಒಗೆದ ಬಟ್ಟೆಗಳನ್ನು ಮೇಜಿನ ಮೇಲೋ, ಕುರ್ಚಿಯ ಮೇಲೋ, ಮಂಚದ ಮೇಲೋ ಆರಲು ಹಾಕುವುದು ಸಾಮಾನ್ಯ ರೂಢಿ. ಹೀಗೆ ಮಾಡುವುದು ಕೂಡಾ ಪೀಠೋಪಕರಣಗಳು ಹಾಳಾಗಲು ಕಾರಣವಾಗುತ್ತದೆ. ಹಸಿಯಾದ ಬಟ್ಟೆಗಳನ್ನು ಪೀಠೋಪಕರಣಗಳ ಮೇಲೆ ಆರಲು ಹಾಕುವ ಅಭ್ಯಾಸ ಬಿಡಿ. ಹಸಿ ಬಟ್ಟೆ ಒಣಗಿಸಲು ಮನೆಯೊಳಗೇ ಒಂದು ಭಾಗದಲ್ಲಿ ಪ್ಲಾಸ್ಟಿಕ್‌ ಹಗ್ಗ ಕಟ್ಟಿ.

*ಗೋಡೆಗೆ ಒರಗಿಸಬೇಡಿ: ಮಳೆಗಾಲದಲ್ಲಿ ಗೋಡೆಗಳೂ ತೇವವಾಗುವುದು ಸಾಮಾನ್ಯ. ಗೋಡೆಗಳಿಗೆ ಒರಗಿಸಿ ಕುರ್ಚಿ, ಮೇಜು, ಪುಸ್ತಕದ ಕಪಾಟನ್ನು ಇಟ್ಟರೆ ಅವು ಕೂಡಾ ತೇವ ಹೀರುವ ಸಾಧ್ಯತೆ ಇರುತ್ತದೆ. ಹೀಗಾಗಿ ಮಳೆಗಾಲದಲ್ಲಿ ಮರದ ಪೀಠೋಪಕರಣಗಳನ್ನು ಗೋಡೆಗೆ ತಾಗುವಂತೆ ಇಡಬೇಡಿ. ಗೋಡೆಯಿಂದ ಕನಿಷ್ಠ ಎರಡು ಅಡಿ ಅಂತರದಲ್ಲಿ ಮರದ ಪೀಠೋಪಕರಣಗಳನ್ನು ಇಡಿ.

*ನವೀಕರಣ ಬೇಡ: ಮಳೆಗಾಲದಲ್ಲಿ ಮನೆಯ ನವೀಕರಣ ಅಥವಾ ದುರಸ್ತಿ ಮಾಡಿಸುವುದು ರೇಜಿಗೆಯ ಕೆಲಸ. ನವೀಕರಣಕ್ಕೆಂದು ಮನೆಯ ಪೀಠೋಪಕರಣಗಳನ್ನು ಹೊರಗಿಡಬೇಕಾಗುತ್ತದೆ. ಇಂಥ ಸಂದರ್ಭದಲ್ಲಿ ಪೀಠೋಪಕರಣಗಳು ಮಳೆಯಲ್ಲಿ ನೆನೆದು ಹಾಳಾಗಬಹುದು.

*ಕಿಟಕಿ, ಬಾಗಿಲು ಮುಚ್ಚಬೇಡಿ: ಮಳೆಗಾಲದಲ್ಲಿ ಚಳಿ ಹಾಗೂ ಮಳೆಗಾಳಿಯ ಕಾರಣಕ್ಕೆ ಮನೆಯ ಕಿಟಕಿ, ಬಾಗಿಲು ಮುಚ್ಚುವುದು ಸಾಮಾನ್ಯ. ಆದರೆ,  ಸಾಧಾರಣವಾಗಿರುವ ಮಳೆಯ ಸಂದರ್ಭದಲ್ಲೆಲ್ಲಾ ಕಿಟಕಿ, ಬಾಗಿಲುಗಳನ್ನು ತೆರೆದಿಡಿ. ಇದರಿಂದ ಮನೆಯೊಳಗೆ ಗಾಳಿಯಾಗಲು ಅನುಕೂಲವಾಗುತ್ತದೆ.  ಆಗಾಗ ಫ್ಯಾನ್‌ ಹಾಕಿ. ಈ ಅಭ್ಯಾಸ ಮನೆಯೊಳಗಿನ ತೇವ ಆರಲು ಸಹಕಾರಿ.

ಮಾಡಬೇಕಾದ್ದೇನು?
*ತೇವವಾಗದಿರಲಿ: ಮರದ ಪೀಠೋಪಕರಣಗಳಿಗೂ ತೇವಕ್ಕೂ ಬದ್ಧ ವೈರ! ತೇವವಾದರೆ ಮರದ ಪೀಠೋಪಕರಣ ಅಂಕುಡೊಂಕಾಗುವ ಜತೆಗೆ ಅದರ ಗುಣಮಟ್ಟವೂ ಹಾಳಾಗುತ್ತದೆ. ಪ್ಲೈವುಡ್‌ ಬಳಸಿದ ಪೀಠೋಪಕರಣಗಳಂತೂ ತೇವ ಹಿಡಿದರೆ ಚಕ್ಕೆ ಏಳಲು ಶುರುಮಾಡುತ್ತವೆ. ಹೀಗಾಗಿ ಪೀಠೋಪಕರಣಗಳು ತೇವದಿಂದ ದೂರವಿರಬೇಕಾದ್ದು ಅತ್ಯಗತ್ಯ. ಮಳೆಗಾಲದಲ್ಲಿ ಮರದ ಪೀಠೋಪಕರಣಗಳು ತೇವವಾಗದಂತೆ ಆದಷ್ಟೂ ಎಚ್ಚರ ವಹಿಸಿ.

*ಕಿಟಕಿ, ಬಾಗಿಲಿಂದ ದೂರವಿರಲಿ: ಮಳೆಗಾಲದಲ್ಲಿ ಮರದ ಪೀಠೋಪಕರಣಗಳು ಕಿಟಕಿ, ಬಾಗಿಲಿಂದ ದೂರವಿದ್ದರೆ ಒಳಿತು. ಇದರಿಂದ ಕಿಟಕಿ, ಬಾಗಿಲಿಂದ ಸಿಡಿಯುವ ಮಳೆ ನೀರು ಪೀಠೋಪಕರಣಗಳ ಮೇಲೆ ಬೀಳದಂತೆ ತಡೆಯಬಹುದು.

*ಒಣಗಿದ ಬಟ್ಟೆಯಿಂದ ಒರೆಸಿ: ಮಳೆಗಾಲದಲ್ಲಿ ವಾತಾವರಣದ ತೇವಾಂಶವನ್ನು ಮರದ ಪೀಠೋಪಕರಣಗಳು ಹೀರುವ ಸಾಧ್ಯತೆ ಹೆಚ್ಚಾಗಿರುತ್ತದೆ. ಹೀಗಾಗಿ ಮಳೆಗಾಲದಲ್ಲಿ ಚೆನ್ನಾಗಿ ಒಣಗಿದ ಬಟ್ಟೆಯಿಂದ ಪೀಠೋಪಕರಣಗಳನ್ನು ಒರೆಸುವುದು ಒಳಿತು.

*ಉತ್ತಮ ಪಾಲಿಷ್‌ ಹಾಕಿಸಿ: ಮಳೆಗಾಲಕ್ಕೆ ಮುನ್ನವೇ ಪೀಠೋಪಕರಣಗಳಿಗೆ ವಾಟರ್‌ಪ್ರೂಫ್‌ ಪಾಲಿಷ್‌ ಹಾಕಿಸುವುದರಿಂದ ಅವು ತೇವಾಂಶದ ಕಾರಣದಿಂದ ಹಾಳಾಗದಂತೆ ತಡೆಬಹುದು. ಆದರೆ, ಮಳೆಗಾಲದಲ್ಲಿ ಪೀಠೋಪಕರಣಗಳಿಗೆ ಪಾಲಿಷ್‌ ಹಾಕಿಸಲು ಮುಂದಾಗುವುದು ಅಂಥ ಒಳ್ಳೆಯ ಅಭ್ಯಾಸವಲ್ಲ.

*ಕುಟ್ಟು ಹಿಡಿದಿಯೇ ಪರೀಕ್ಷಿಸಿ: ಮರದ ಪೀಠೋಪಕರಣಗಳಿಗೆ ಕುಟ್ಟು ಹಿಡಿಯುವ ಬಾಧೆ ಸಾಮಾನ್ಯ. ಮಳೆಗಾಲದಲ್ಲಿ ಕುಟ್ಟು ಹುಳುಗಳು ಮರದಲ್ಲಿ ಉತ್ಪತ್ತಿಯಾಗುವ ಸಾಧ್ಯತೆ ಹೆಚ್ಚಾಗಿರುತ್ತದೆ. ಹೀಗಾಗಿ ಮರದ ಪೀಠೋಪಕರಣಗಳ ಎಲ್ಲಾ ಭಾಗಗಳನ್ನೂ ಸೂಕ್ಷ್ಮವಾಗಿ ಪರೀಕ್ಷಿಸಿ. ಕುಟ್ಟು ಪುಡಿ ಉದುರುತ್ತಿದ್ದರೆ ಆ ಪೀಠೋಪಕರಣಕ್ಕೆ ಸೀಮೆಎಣ್ಣೆ ಅಥವಾ ಕುಟ್ಟು ನಿರೋಧಕವನ್ನು ಬಳಿಯಿರಿ.