ನವದೆಹಲಿ (ಪಿಟಿಐ): ಪೋಲಿಯೊ ನಿರ್ಮೂಲನೆಗೆ ಸಂಪೂರ್ಣ ಸಹಕಾರ ನೀಡುವುದಾಗಿ ಪಾಕಿಸ್ತಾನಕ್ಕೆ ಭಾರತ ತಿಳಿಸಿದೆ. ಜಗತ್ತಿನ ಶೇ 85ರಷ್ಟು ಪೋಲಿಯೊ ಪ್ರಕರಣಗಳು ನೆರೆಯ ಪಾಕಿಸ್ತಾನದಲ್ಲಿಯೇ ವರದಿಯಾಗುತ್ತಿದೆ. ಆ ನೆಲದಲ್ಲಿ ಪೋಲಿಯೊ ನಿರ್ಮೂಲನೆಗೆ ನೆರವಾಗುವ ಕಳಕಳಿ ಹೊಂದಿರುವುದಾಗಿ ಭಾರತ ಹೇಳಿದೆ.
ವಿಶ್ವ ಪೋಲಿಯೊ ದಿನದ ಅಂಗವಾಗಿ ನಡೆದ ಕಾರ್ಯಕ್ರಮದಲ್ಲಿ ಮಾತನಾಡಿದ ಕೇಂದ್ರ ಆರೋಗ್ಯ ಸಚಿವ ಹರ್ಷವರ್ಧನ್ ಅವರು, ಪೋಲಿಯೊ ನಿರ್ಮೂಲನೆ ವಿಚಾರವಾಗಿ ಎರಡೂ ರಾಷ್ಟ್ರಗಳ ನಡುವೆ ಈ ಹಿಂದೆ ನಡೆಸಲಾಗಿದ್ದ ಪ್ರಯತ್ನಗಳು ಮಹತ್ವದ ಪ್ರಗತಿ ಕಂಡಿಲ್ಲ ಎಂದರು.
‘ಪಾಕಿಸ್ತಾನದ ಇತ್ತೀಚಿನ ಯೋಜನೆ ಸಮರ್ಪಕವಾಗಿದೆ. ಪೋಲಿಯೊ ನಿರ್ಮೂಲನೆಗೆ ತಳಮಟ್ಟದಿಂದ ಪ್ರಯತ್ನಗಳನ್ನು ನಡೆಸುತ್ತಿದೆ. ಭಾರತದಲ್ಲಿ ಪರಿಣಾಮಕಾರಿಯಾಗಿ ಕೆಲಸ ನಿರ್ವಹಿಸಿದ್ದ ಸಾಮಾಜಿಕ ಸಂಘಟನೆಗಳನ್ನು ಒಳಗೊಳ್ಳುವ ಕುರಿತೂ ಮಾತುಗಳು ಕೇಳಿಬರುತ್ತಿದೆ’ ಎಂದು ಹೇಳಿದರು.
ಪೋಲಿಯೊ ನಿರ್ಮೂಲನೆ ಸಂಬಂಧ ಸಹಕಾರ ಸ್ಥಾಪನೆಗಾಗಿ 2012 ಸೆಪ್ಟೆಂಬರ್ನಿಂದಲೇ ವಿದೇಶಾಂಗ ಸಚಿವರ ಮಟ್ಟದ ಜಂಟಿ ಮಾತುಕತೆಗಳು ನಡೆಯುತ್ತಿದ್ದರೂ ಮಹತ್ವದ ಪ್ರಗತಿ ಇದುವರೆಗೂ ಕಂಡಿಲ್ಲ ಎಂದ ಅವರು, ಪಾಕ್ಗೆ ಸಹಾಯಹಸ್ತ ಚಾಚುವ ಭರವಸೆ ನೀಡಿದರು. ಪಾಕಿಸ್ತಾನದಿಂದಾಗಿ ದೇಶದಲ್ಲಿ ಪೋಲಿಯೊ ಮತ್ತೆ ಹರಡುವ ಅಪಾಯವಿದೆ ಎಂದರು.