ನವದೆಹಲಿ (ಪಿಟಿಐ/ಐಎಎನ್ಎಸ್): ನರೇಂದ್ರ ಮೋದಿ ಅವರ ಪ್ರಮಾಣವಚನ ಸಮಾರಂಭಕ್ಕೆ ಸರ್ಪ-ಗಾವಲು ಹಾಕಲಾಗುತ್ತಿದೆ. ರೈಸಿನಾ ಹಿಲ್ಸ್ ಸುತ್ತಮುತ್ತ ಬಿಗಿ ಭದ್ರತೆ ಒದಗಿಸಲಾಗುತ್ತದೆ. ಸೇನಾ ಹೆಲಿಕಾಪ್ಟರ್ಗಳು ಗಸ್ತು ನಡೆಸಲಿವೆ.
‘ರಾಷ್ಟ್ರಪತಿ ಭವನದ ಸುತ್ತಮುತ್ತ ಇರುವ ಕಚೇರಿಗಳನ್ನು ಈ ತಿಂಗಳ 26ರ ಮಧ್ಯಾಹ್ನ ಒಂದು ಗಂಟೆಗೆ ಮುಚ್ಚಲಾಗುತ್ತದೆ. ಗಣರಾಜ್ಯೋತ್ಸವದ ಪಥ ಸಂಚಲನಕ್ಕೆ ನೀಡುವ ರೀತಿಯಲ್ಲಿಯೇ ಮೋದಿ ಪ್ರಮಾಣವಚನ ಸಮಾರಂಭಕ್ಕೆ ಬಿಗಿ ಭದ್ರತೆ ನೀಡಲಾಗುತ್ತದೆ’ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಭದ್ರತಾ ಕ್ರಮದ ಭಾಗವಾಗಿ ರೈಸಿನಾ ಹಿಲ್ಸ್ ಸುತ್ತಲಿನ ರಸ್ತೆಗಳಿಗೆ ತಡೆಗೋಡೆ ಗಳನ್ನು ಹಾಕಲಾಗುತ್ತದೆ. ಅರೆಸೇನಾ ಪಡೆ, ದೆಹಲಿ ಪೊಲೀಸ್್ ಕಮಾಂಡೊಗಳ ಜತೆಗೆ ಎನ್ಎಸ್ಜಿ ಶಾರ್ಪ್ ಶೂಟರ್ಗಳನ್ನು ನಿಯೋಜಿಸಲಾಗುತ್ತದೆ. ಸಮಾರಂಭ ನಡೆಯುವ ಸ್ಥಳವನ್ನು ಶ್ವಾನದಳ, ಬಾಂಬ್ ನಿಷ್ಕ್ರಿಯ ದಳದಿಂದ ತಪಾಸಣೆ ಮಾಡಿಸಲಾಗುತ್ತದೆ.
‘ರಾಷ್ಟ್ರಪತಿ ಭವನದ ಸುತ್ತಮುತ್ತ ಮಾತ್ರವಲ್ಲ, ವಿದೇಶಿ ಗಣ್ಯರು ತಂಗುವ ಹೊಟೆಲ್ಗಳಿಗೂ ಬಿಗಿ ಭದ್ರತೆ ಒದಗಿಸಲಾಗುತ್ತದೆ’ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ನಿರ್ಬಂಧ: ಮೋದಿ ಅವರ ಪ್ರಮಾಣವಚನ ಸ್ವೀಕಾರ ಸಮಾರಂಭದ ಸಿದ್ಧತೆ ಹಿನ್ನೆಲೆಯಲ್ಲಿ ಈ ತಿಂಗಳ 24, 25ರಂದು ರಾಷ್ಟ್ರಪತಿ ಭವನದಲ್ಲಿ ಸಾರ್ವಜನಿಕರ ಭೇಟಿಯನ್ನು ನಿರ್ಬಂಧಿಸಲಾಗಿದೆ.
ಸಕಲ ಸಜ್ಜು: ಪ್ರಧಾನಿಯವರ ಅಧಿಕೃತ ನಿವಾಸ 7 ರೇಸ್ ಕೋರ್ಸ್್ ರಸ್ತೆ ನಿಯೋಜಿತ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಸ್ವಾಗತಿಸಲು ಸುಣ್ಣ ಬಣ್ಣ ಬಳಿದುಕೊಂಡು ಸಿಂಗಾರಗೊಂಡಿದೆ.
‘ಒಂದು ವೇಳೆ ಮೋದಿ ಈ ತಿಂಗಳ 26ರಂದು ಇಲ್ಲಿಗೆ ಬಂದಲ್ಲಿ ಮೂರನೇ ನಂಬರಿನ ಬಂಗಲೆಯಲ್ಲಿ ವಾಸ್ತವ್ಯ ಹೂಡಲಿದ್ದಾರೆ’ ಎಂದು ಮೂಲಗಳು ತಿಳಿಸಿವೆ.
‘ಮೋದಿ ಅವರ ಅಭಿರುಚಿಗೆ ಅನುಗುಣವಾಗಿ ನಾವು ಬಂಗಲೆಯನ್ನು ಸಿಂಗರಿಸುತ್ತೇವೆ. ಈವರೆಗೆ ಹೊರಾಂಗಣದ ನವೀಕರಣ ಕಾರ್ಯ ಮಾತ್ರ ನಡೆದಿದೆ’ ಎಂದೂ ಅವು ತಿಳಿಸಿವೆ.
ಈ ತಿಂಗಳ 16ರಂದು ಲೋಕಸಭೆ ಚುನಾವಣೆ ಫಲಿತಾಂಶ ಹೊರಬಿದ್ದ ತಕ್ಷಣವೇ ನವೀಕರಣ ಕಾರ್ಯ ನಡೆಯುತ್ತಿದೆ.
ಇಲ್ಲಿನ ಎಲ್ಲ ಬಂಗಲೆಗಳು ಹಾಗೂ ಕಾಂಪೌಂಡ್ ಗೋಡೆಗಳಿಗೆ ಹೊಸದಾಗಿ ಬಣ್ಣ ಬಳಿಯಲಾಗಿದೆ. ಕೈತೋಟಗಳನ್ನು ಅಂದಗೊಳಿಸಲಾಗಿದೆ. ಹೂಕುಂಡಗಳನ್ನೂ ಸಿಂಗರಿಸಲಾಗಿದೆ.
ಟಿಎಂಸಿಯಿಂದ ಸಚಿವ ಹಾಜರಿ
ಕೋಲ್ಕತ್ತ ವರದಿ: ಮೋದಿ ಪ್ರಮಾಣವಚನ ಸಮಾರಂಭದಲ್ಲಿ ಪಶ್ಚಿಮಬಂಗಾಳ ಹಣಕಾಸು ಸಚಿವ ಅಮಿತ್್ ಮಿತ್ರಾ ಹಾಗೂ ಟಿಎಂಸಿ ಪ್ರಧಾನ ಕಾರ್ಯದರ್ಶಿ ಮುಕುಲ್ ರಾಯ್ ಭಾಗವಹಿಸುವರು.
ಬಂಗಾಳ ಸಿಪಿಎಂ ಅನುಪಸ್ಥಿತಿ
ನರೇಂದ್ರ ಮೋದಿ ಅವರ ಪ್ರಮಾಣವಚನ ಸಮಾರಂಭಕ್ಕೆ ಸಿಪಿಎಂ ಪಶ್ಚಿಮಬಂಗಾಳ ಘಟಕದಿಂದ ಯಾರೂ ಭಾಗವಹಿಸುತ್ತಿಲ್ಲ.
‘ಈ ಹಿಂದೆ ಕೂಡ ಬಿಜೆಪಿ ಪ್ರಧಾನಿ ಪ್ರಮಾಣವಚನ ಸಮಾರಂಭವನ್ನು ಬಹಿಷ್ಕರಿಸಿದ್ದೆವು. ಈಗ ಮೋದಿ ಅವರ ಅಧಿಕಾರ ಸ್ವೀಕಾರ ಸಮಾರಂಭಕ್ಕೆ ಕೂಡ ರಾಜ್ಯ ಘಟಕದಿಂದ ಯಾರೂ ಭಾಗವಹಿಸುತ್ತಿಲ್ಲ’ ಎಂದು ಸಿಪಿಎಂ ಪಾಲಿಟ್ಬ್ಯುರೊ ಸದಸ್ಯ ಸೂರ್ಯಕಾಂತ್್ ಮಿಶ್ರಾ ಇಲ್ಲಿ ಸುದ್ದಿಗಾರರಿಗೆ ತಿಳಿಸಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.