ಬದಲಾವಣೆಗೆ ನೂರೆಂಟು ದಾರಿಗಳು

ವಿನೋದ್‌ ಹಿಂದೂಪುರ ಸಮೀಪದ ಕುಗ್ರಾಮದವರು. ಹಿಂದೂಪುರದಲ್ಲೇ ಎಂಜಿನಿಯರಿಂಗ್‌ ಮುಗಿಸಿ ಏನಾದರೂ ಸಾಧನೆ ಮಾಡಲೇಬೇಕೆಂಬ ಹಟದಲ್ಲಿ ಬೆಂಗಳೂರಿಗೆ ಬಂದರು. ಸಮೂಹ ಮಾಧ್ಯಮದಲ್ಲಿ ಸ್ನಾತಕೋತ್ತರ ಪದವಿ ಪಡೆದು ಕಿರುಚಿತ್ರ, ಸಾಕ್ಷ್ಯ ಚಿತ್ರ ಮತ್ತು ಜಾಹೀರಾತುಗಳನ್ನು ನಿರ್ಮಿಸುತ್ತಿದ್ದಾರೆ. ಜಾಹೀರಾತು ನಿರ್ಮಾಣ ಮಾಡುವುದು ಹೊಟ್ಟೆಪಾಡಿಗಾಗಿ ಮಾತ್ರ. ಆದರೆ ಕಿರುಚಿತ್ರ ಮತ್ತು ಸಾಕ್ಷ್ಯಚಿತ್ರಗಳನ್ನು ಜನರನ್ನು ಪ್ರಜ್ಞಾವಂತರನ್ನಾಗಿ ರೂಪಿಸಲು ತಯಾರಿಸುತ್ತಿದ್ದಾರೆ.

‘ಜನರನ್ನು ಬಹುಬೇಗ ತಟ್ಟುವ ಮಾಧ್ಯಮವೆಂದರೆ ಸಿನಿಮಾ. ಇದರ ಮೂಲಕವೇ ನಾವು ಜನರಲ್ಲಿ ಹಲವು ಸಾಮಾಜಿಕ ವಿಷಯಗಳ ಬಗ್ಗೆ ಜಾಗೃತಿ ಮೂಡಿಸಬಹುದು’ಎನ್ನುತ್ತಾರೆ ವಿನೋದ್‌.

ಇಲ್ಲಿಯವರೆಗೂ 15 ಕಿರು ಚಿತ್ರಗಳನ್ನು ನಿರ್ಮಿಸಿದ್ದಾರೆ. ಇಂಗ್ಲಿಷ್‌ ಭಾಷೆಯಲ್ಲಿ ನಿರ್ಮಾಣ ಮಾಡಿರುವ ‘ಚೇಂಜ್‌’ ಕಿರುಚಿತ್ರದ ಚಿತ್ರಕಥೆ ಆಸ್ಕರ್‌ ಸಿನಿಮಾ ಗ್ರಂಥಾಲಯದಲ್ಲಿದೆ. ವಿನೋದ್‌ ಅವರ ಲೇಪಾಕ್ಷಿ ಕಿರುಚಿತ್ರವನ್ನು ಕನ್ನಡ ಸೇರಿದಂತೆ 11 ಭಾರತೀಯ ಭಾಷೆಗಳಿಗೆ ರಿಮೇಕ್‌ ಮಾಡಲಾಗಿದೆ. ಇವರ ಎಲ್ಲಾ ಕಿರುಚಿತ್ರಗಳು ಸಾಮಾಜಿಕ ಸಮಸ್ಯೆಗಳ ಮೇಲೆ ಬೆಳಕು ಚೆಲ್ಲಿವೆ. ವಿನೋದ್‌ರ ಎಲ್ಲಾ ಚಿತ್ರಗಳಿಗೂ ಪ್ರಶಸ್ತಿ ಬಂದಿರುವುದು ವಿಶೇಷ. ಇವರ ಚಿತ್ರಗಳು ಒಂದು ಲಕ್ಷ ರೂಪಾಯಿ ಬಜೆಟ್‌ ಮೀರುವುದಿಲ್ಲ. ಇವರ ಚಿತ್ರಗಳಿಗೆ ಅವಾರ್ಡ್‌ ಆಫ್ ಎಕ್ಸೆಲೆನ್ಸ್‌ ಹಾಗೂ ಐದನೇ ದಾದಾ ಸಾಹೇಬ್ ಫಾಲ್ಕೆ ಅಂತರರಾಷ್ಟ್ರೀಯ ಸಿನಿಮೋತ್ಸವದಲ್ಲಿ ನಮ್ಮ ಆರ್ವಿ ಪ್ರೊಡಕ್ಷನ್‌ ಹೌಸ್‌ಗೆ ‘ಉತ್ತಮ ಚಿತ್ರ ನಿರ್ಮಾಣ ಸಂಸ್ಥೆ ಪ್ರಶಸ್ತಿ’  ದೊರೆತಿದೆ.

ಸುಹಾಸಿನಿ ಮತ್ತು ಅನಿಂದಿತಾ
ಅಕ್ಕ ತಂಗಿಯರು ಸೇರಿ ಕಟ್ಟಿದ ‘ಯೋಗಾ ಬಾರ್‌’ ಸಂಸ್ಥೆಯ ಕಥೆ ಇದು. ಮೂಲತಃ ಬೆಂಗಳೂರಿನವರಾದ ಸುಹಾಸಿನಿ ಮತ್ತು ಅನಿಂದಿತಾ ಯೋಗಾ ಬಾರ್‌ ಸ್ಥಾಪಿಸುವುದಕ್ಕಿಂತ ಮುಂಚೆ ಅಮೆರಿಕದ ನ್ಯೂಯಾರ್ಕ್‌ನ ಖಾಸಗಿ ಕಂಪೆನಿಗಳಲ್ಲಿ ಕೆಲಸ ಮಾಡುತ್ತಿದ್ದರು. ಸುಹಾಸಿನಿ ವಾಣಿಜ್ಯ ಶಾಲೆಯೊಂದರಲ್ಲಿ ಫೀಲ್ಡ್‌ ಆಫೀಸರ್‌ ಆಗಿ ಕೆಲಸ ಮಾಡುತ್ತಿದ್ದರು.

ಅನಿಂದಿತಾ ಶಕ್ತಿವರ್ಧಕ ಮತ್ತು ಪ್ರೋಟಿನ್‌ಯುಕ್ತ ಪಾನೀಯ ಮತ್ತು ತಿನಿಸುಗಳನ್ನು ಮಾರಾಟ ಮಾಡುವ ಕಂಪೆನಿಯಲ್ಲಿ ಕೆಲಸ ಮಾಡುತ್ತಿದ್ದರು. ಸುಹಾಸಿನಿ ಫೀಲ್ಡ್‌ ಆಫೀಸರ್‌ ಆಗಿ ಕೆಲಸ ಮಾಡುತ್ತಿದ್ದರಿಂದ ಅಲ್ಲಿನ ಪ್ರವಾಸದಿಂದ ಸಾಕಷ್ಟು ಸುಸ್ತಾಗುತ್ತಿದ್ದರು. ಆಗ ಅನಿಂದಿತಾ ಅಕ್ಕನಿಗೆ ಶಕ್ತಿವರ್ಧಕ ಮತ್ತು ಪ್ರೋಟಿನ್‌ಯುಕ್ತ ಪಾನೀಯ ಮತ್ತು ತಿನಿಸುಗಳನ್ನು ನೀಡುತ್ತಿದ್ದರು. ಅನಿಂದಿತಾಗೆ ಇಂತಹದ್ದೇ ಒಂದು ಉದ್ಯಮವನ್ನು ಭಾರತದಲ್ಲಿ ಯಾಕೆ ಆರಂಭಿಸಬಾರದು ಎಂಬ ಆಲೋಚನೆ ಹೊಳೆಯಿತು.

   ಭಾರತಕ್ಕೆ ಮರಳಿದ ಬಳಿಕ ‘ಯೋಗಾಬಾರ್‌’ ಆರಂಭಿಸುವ ಯೋಜನೆ ರೂಪಿಸಿದರು. ಈ ಯೋಗಾ ಬಾರ್‌ನಲ್ಲಿ ಶಕ್ತಿದಾಯಕ ತಿನಿಸುಗಳು ಮತ್ತು ಪಾನೀಯಗಳು ಲಭ್ಯ. ಈ ಉತ್ಪನ್ನಗಳನ್ನು ನೈಸರ್ಗಿಕ ಮತ್ತು ವೈಜ್ಞಾನಿಕವಾಗಿ ತಯಾರಿಸಲಾಗುತ್ತದೆ. ಈ ಉತ್ಪನ್ನಗಳನ್ನು ಸಾವಯವ ಪದಾರ್ಥಗಳನ್ನು ಉಪಯೋಗಿಸಿ ತಯಾರಿಸಲಾಗುತ್ತದೆ. ಈ ಯೋಗಾಬಾರ್‌ ಪರಿಕಲ್ಪನೆ ಭಾರತದಲ್ಲೇ ಹೊಸದು ಎನ್ನುತ್ತಾರೆ ಸುಹಾಸಿನಿ.

‘ಈ ಉದ್ಯಮವನ್ನು ಆರಂಭಿಸುವುದಕ್ಕೂ ಮುಂಚೆ ನಾವು ಕ್ಷೇತ್ರಕಾರ್ಯ ಮಾಡಿ ಗ್ರಾಹಕರ ಅಭಿರುಚಿಯನ್ನು ಆಲಿಸಿ ಆರಂಭಿಸಿದ್ದೇವೆ. ಬೆಂಗಳೂರಿನ ದೊಮ್ಮಲೂರಿನಲ್ಲಿ ಯೋಗಾಬಾರ್‌ ಉತ್ಪನ್ನಗಳು ತಯಾರಾಗುತ್ತವೆ. ನಗರದಾದ್ಯಂತ 50 ಫ್ರಾಂಚೈಸಿಗಳಿವೆ. ದೇಶದ ಇತರ ನಗರಗಳಲ್ಲೂ ನಮ್ಮ ಫ್ರಾಂಚೈಸಿಗಳನ್ನು ಆರಂಭಿಸಬೇಕು ಎಂಬುದು ನಮ್ಮ ಗುರಿ’ ಎನ್ನುತ್ತಾರೆ ಅನಿಂದಿತಾ. ‘ಸದಾ ಬ್ಯುಸಿಯಾಗಿರುವ, ಒತ್ತಡದಲ್ಲಿರುವ ಯುವಜನರ ಆರೋಗ್ಯವನ್ನು ದೃಷ್ಟಿಯಲ್ಲಿಟ್ಟುಕೊಂಡು ಈ ಉತ್ಪನ್ನಗಳನ್ನು ತಯಾರಿಸಲಾಗುತ್ತಿದೆ. ನಮ್ಮ ಕಂಪೆನಿಯ ಉತ್ಪನ್ನಗಳಿಗೆ ಉತ್ತಮ ಬೇಡಿಕೆ ವ್ಯಕ್ತವಾಗುತ್ತಿದೆ. ಇಲ್ಲಿಯವರೆಗೂ ಉತ್ಪನ್ನಗಳಿಗೆ ಸಂಬಂಧಿಸಿದಂತೆ ಯಾವುದೇ ದೂರುಗಳು ಬಂದಿಲ್ಲ’ ಎನ್ನುತ್ತಾರೆ ಸುಹಾಸಿನಿ.
www.yogabar.in