ಬಲವಂತದ ಮತಾಂತರ: ಬುಧವಾರ ಚರ್ಚೆ

ನವದೆಹಲಿ (ಪಿಟಿಐ): ಆಗ್ರಾ ಮತ್ತು ಕೆಲ ಪ್ರದೇಶಗ­ಳಲ್ಲಿ ಮಾಡಲಾಗಿದೆ ಎನ್ನಲಾದ ಬಲವಂತದ ಮತಾಂತರ ಕುರಿತು ಬುಧವಾರ (ಡಿ. 17) ಚರ್ಚೆಗೆ ಅವಕಾಶ ಮಾಡಿಕೊಡಲಾಗುವುದು ಎಂದು ಸರ್ಕಾರ ತಿಳಿಸಿದೆ.

ವಿರೋಧಪಕ್ಷಗಳು ಶುಕ್ರವಾರವೂ ರಾಜ್ಯಸಭೆಯಲ್ಲಿ ಮತಾಂತರ ವಿಚಾರ ಎತ್ತಿದವು. ಅಲೀಗಡದಲ್ಲಿ ಕ್ರೈಸ್ತರನ್ನು ಮತಾಂತರಗೊಳಿಸುವ ಬೆದರಿಕೆ ಹಾಕ­ಲಾ­ಗಿದೆ ಎಂದು ಆತಂಕ ವ್ಯಕ್ತಪಡಿಸಿ­ದವು. ಸಂಸದೀಯ ವ್ಯವಹಾರ ಖಾತೆ ರಾಜ್ಯ ಸಚಿವ ಮುಕ್ತಾರ್‌ ಅಬ್ಬಾಸ್‌ ನಕ್ವಿ ಸರ್ಕಾರ ಈ ವಿಚಾರದ ಕುರಿತು ಡಿ.17ರಂದು ಚರ್ಚಿಸಲಿದೆ ಎಂದರು.

ಇದಕ್ಕೂ ಮುನ್ನ ಮಾತನಾಡಿದ ಜೆಡಿಯುನ ಕೆ.ಸಿ.ತ್ಯಾಗಿ, ಮಸೀದಿಗಳಿಂದ ಮೈಕ್ ಕಿತ್ತುಹಾಕಲು  ವಿಶ್ವ ಹಿಂದೂ ಪರಿಷತ್‌ ಗೊತ್ತುವಳಿ ಮಂಡಿಸಿರುವ ವಿಷಯವನ್ನು ಸದನದ ಗಮನಕ್ಕೆ ತಂದರು. ಉಪ ಸಭಾಧ್ಯಕ್ಷ ಪಿ.ಜೆ. ಕುರಿ­ಯನ್‌ ಈ ಎರಡೂ ವಿಚಾರಕ್ಕೂ ಸಂಬಂಧ ಕಲ್ಪಿಸಬಾರದು ಎಂದು ತಿಳಿಸಿದರು.

ಎಚ್ಚರಿಕೆ (ಅಲೀಗಡ ವರದಿ): ಡಿ. 25ರಂದು ಸಾಮೂಹಿಕ ಮತಾಂತರ ಕಾರ್ಯಕ್ರಮ ಹಮ್ಮಿ­ಕೊಂಡಿ­ರುವ ಹಿಂದೂ ಸಂಘಟನೆಗಳಿಗೆ ಅಲೀಗಡ ಜಿಲ್ಲಾ ಆಡಳಿತ ಎಚ್ಚರಿಕೆ ನೀಡಿದೆ. ಧಾರ್ಮಿಕ ಮತಾಂತರ ವ್ಯಕ್ತಿಗಳ ವೈಯಕ್ತಿಕ ಆಯ್ಕೆಯಾಗಿದ್ದು, ಅದಕ್ಕೆ ಕಾನೂನಿನಲ್ಲಿ ಅವಕಾಶವಿದೆ. ಆದರೆ, ಈ ನಿಯಮವನ್ನು ದುರ್ಬಳಕೆ ಮಾಡಿ­ಕೊಂಡು ಯಾರಾದರೂ ಕೋಮು ಸೌಹಾರ್ದ ಕದಡಲು ಯತ್ನಿಸಿದಲ್ಲಿ ಅದನ್ನು ನಾವು ಸಹಿಸುವುದಿಲ್ಲ ಎಂದು ಜಿಲ್ಲಾಧಿಕಾರಿ ಅಭಿಷೇಕ್‌ ಪ್ರಕಾಶ್‌ ಅವರು ಎಚ್ಚರಿಸಿದ್ದಾರೆ.